Ног азы агъоммӕ муниципалон сконд Дзӕуджыхъӕуы сӕргълӕууӕг Икъаты Русланбег балхӕдта поэт, драматург ӕмӕ литературӕиртасӕг Джусойты Нафийы уацмысты дӕстомон ӕмбырдгонды 20 комплекты ӕмӕ дзы 14 комплекты балӕвар кодта горӕты библиотекӕты централизацигонд системӕйӕн.
Библиотекӕты системӕйы директор Цъӕхилты Зӕлинӕ ӕхсызгонӕй сӕмбӕлд Русланбеджы лӕварыл.
— Фӕнды нӕ библиотекӕмӕ чиныгкӕсӕджы ӕрбаздахын. Ӕхцайы кадавары аххосӕй нын литературӕ ӕлхӕныны фадат кӕй нӕй, уый нымайгӕйӕ, ацы лӕварӕн ис стыр ахадындзинад. Ацы чингуытӕм адӕм се ‘ргом кӕй аздахдзысты, уый мӕ уырны, — загъта Зӕлинӕ.
Уымӕй уӕлдай ма Джусойы-фырты чингуытӕ лӕвӕрд ӕрцыдысты Цӕгат Ирыстоны Хетӕгкаты Къостайы номыл паддзахадон университеты ирон филологийы факультетӕн, нӕ республикӕйы Гуманитарон ӕмӕ социалон иртасӕнты институты библиотекӕйӕн, газет «Рӕстдзинад»-ы редакцийӕн, Дзӕуджыхъӕуы 13-ӕм астӕуккаг скъолайӕн, Алайнаг гимназ ӕмӕ сывӕллӕтты рӕзынгӕнӕг студи «Фӕндиаг»-ӕн дӕр.
— Джусойты Нафийы чингуытӕй нӕ библиотекӕ сфидаудзӕн. Нымӕцон информацийы рӕстӕг дӕр чиныг зынаргъ лӕварыл нымад кӕй у, ацы цау ууыл дзуры, — бахахх кодта университеты филологон факультеты декан Куыдзойты Анжелӕ.
— Джусойты Нафи зындгонд адӕймаг уыд канд Хуссар Ирыстоны нӕ, фӕлӕ Цӕгаты дӕр. Ирон ӕвзаг ӕмӕ литературӕйы рӕзтмӕ стыр ӕвӕрӕн бахаста, ӕмӕ йӕ ном ӕнусмӕ нӕ дзыллӕты зӕрдӕты цӕрдзӕн, — загъта Икъайы-фырт.
Дзӕуджыхъӕуы администрацийы пресс-службӕ
