Дзӕуджыхъӕуы разамынд горӕты историон центр Сабырдзинады проспекты фӕндаджы уӕлцъар раивынӕн радих кӕндзӕн 150 милуан сомы.
Администрацийы куыд фехъусын кодтой, афтӕмӕй ахӕм куыстытӕ фӕстаг 70 азы кӕнынц фыццаг хатт. Фӕндаг конд уыдзӕн гранит дурӕй, сӕрмагонд мадзӕлттӕй йӕ афтӕ бацӕттӕ кӕндзысты, ӕмӕ дзы къах нӕ бырдзӕн.
Куыстыты рӕстӕг разындысты, 1950 азты цы цӕнгӕт хӕтӕлтӕй пайда кодтой, уыдон. Хъуыддӕгтӕ конд цӕудзысты графикы бӕрӕггонд ӕмгъуыдтӕм гӕсгӕ. Ӕмӕ 1-ӕм маймӕ ног уӕлцъар ӕвӕрд ӕрцӕудзӕн Мордовцевы уынгӕй Горькийы уынгмӕ, 15 мин квадратон метры фӕзуаты.
Сабырдзинады проспект у Цӕгат Ирыстоны сӕйраг горӕты аивдӕр ӕмӕ рӕсугъддӕр бынат. Бындур ын сӕвӕрдтой XIX ӕнусы фыццаг ӕмбисы, хъӕппӕрис равдыста Дзӕуджыхъӕуккаг хӕстон зылды фыццаг хицау ӕмӕ фидары комендант Петр Нестеров. 2016 азы проспекты цы стыр куыстытӕ конд ӕрцыд, уыдон къухы бафтыдысты ӕнӕбюджетон ӕхцайы фӕрцы. Сцалцӕг кодтой, XIX ӕнусы кӕй сарӕзтой, уыцы 27 бӕстыхайы.
Дзӕуджыхъӕуы бынӕттон хиуынаффӕйады администрацийы пресс-службӕ
