Уӕрӕсейы цӕрджыты ирон адӕмы истори ӕмӕ ӕгъдӕуттимӕ базонгӕ кӕнын, национ культурӕйы хӕзнатӕн аккаг аргъ кӕнын ӕмӕ сӕ хъахъхъӕнынмӕ зӕрдиаг ӕргом здахын, туризмы райрӕзтӕн уӕлӕмхасӕн фадӕттӕ аразын — ахӕм ахсджиаг нысантӕ лӕууы Ирон чъиритӕ ӕмӕ цыхты ӕппӕтуӕрӕсеон фестивалы организацион комитеты размӕ.
Фестивалы оргкомитетӕн цы фыццаг ӕмбырд уыд, уымӕн разамынд лӕвӕрдта РЦИ-Аланийы Хицауады Сӕрдары хӕдивӕг Иринӕ Азимова. Фембӕлды архайдтой республикон министрадтӕ ӕмӕ ведомствӕты бӕрнон кусджытӕ, стӕй Дзӕуджыхъӕуы бынӕттон хиуынаффӕйады администрацийы минӕвӕрттӕ.
Куыд нысангонд цӕуы, афтӕмӕй ӕппӕтуӕрӕсеон фестивалы мадзӕлтты иу хай цӕудзӕн Хетӕгкаты Къостайы номыл Центрон фӕлладуадзӕн парчы. Уым Цӕгат Ирыстоны цӕрджытӕ ӕмӕ республикӕйы уазджытӕн фестивалы фыццаг бонты уыдзӕн алыхуызон цымыдисаг акциты архайыны фадат — бӕрнон министрадтӕ ӕмӕ ведомствӕтӕ сын бацӕттӕ кӕндзысты концертон программӕтӕ, ирон чъиритӕ кӕнын ӕмӕ цыхт ахсыны мастер-класстӕ, национ спортивон хъӕзтытӕ, районты равдыст-презентацитӕ…
Фестивалы кӕронбӕттӕн сӕйраг хай арӕзт ӕрцӕудзӕн, Хъесайы-фырты уынджы цы фӕлладуадзӕн тӕлм ис, уым. Сӕрмагонд бынӕтты бацайдагъ уыдзысты ирон чъириты дӕсныты, бӕгӕныфыцджытӕ ӕмӕ цыхтахсджыты ерыстӕ… Алы районтӕ ӕмӕ регионты минӕвӕрттӕн фадат уыдзӕн сӕ арӕхстдзинад равдисынӕн. Кӕй зӕгъын ӕй хъӕуы, фестивалы фӕзты сӕ куыст кӕндзысты алыхуызон равдыстытӕ, армукъатӕ, ӕрмдӕсныты ӕрмадзтӕ… Фестивал сӕ архайдӕй барӕсугъд кӕндзысты сфӕлдыстадон коллективтӕ ӕмӕ хицӕн артисттӕ.
— Фестивалы размӕ цы вазыгджын нысантӕ лӕууы, уыдонӕй иу у алы адӕмтӕ ӕмӕ регионты минӕвӕртты кӕрӕдзимӕ фенгомдӕр кӕнын. Уыцы ӕууӕл хынцгӕйӕ, ахсджиаг у, цӕмӕй мадзалы уӕрӕх архайой республикӕйы национ-культурон ӕхсӕнадтӕ ӕмӕ уӕрӕсейаг регионты, стӕй фӕсарӕнты ирон диаспорӕты минӕвӕрттӕ дӕр, — оргкомитеты уӕнгты хӕстӕ бӕлвырд кӕнгӕйӕ, загъта Иринӕ Азимова.
Ӕмбырды архайджытӕ ӕрдзырдтой фестивалы рагагъоммӕйы программӕйы уагӕвӕрдтыл.
РЦИ-Аланийы Сӕргълӕууӕджы ӕмӕ Хицауады пресс-службӕ
