Хуссар Ирыстоны Хъахъхъӕнынады министрады кадетты скъола тагъд рӕстӕг раивдзысты ног цалцӕггонд агъуыстмӕ. Уый тыххӕй фехъусын кодта информацион агентад «Осинформ».
Ныртӕккӕ кадеттӕ ахуыр кӕнынц Цхинвалы 1-ӕм астӕуккаг скъолайы агъуысты. Тагъд рӕстӕджы та ӕрбынӕттон уыдзысты, Цхинвалы районы Ирыхъӕуы сын цы бӕстыхай бацӕттӕ кодтой, уым.
Кадетты скъолайы директор, булкъон Тадтаты Артур куыд фехъусын кодта, афтӕмӕй ног ахуыры азы райдайӕнӕй фӕстӕмӕ скъола раивдзысты къазармайы фӕткмӕ, ома, курсанттӕ ӕхсӕвӕй-бонӕй уыдзысты скъолайы.
«Зындгонд куыд у, афтӕмӕй Уӕрӕсейы кадетты скъолатӕ кусынц къазармайы фӕткмӕ гӕсгӕ, курсанттӕ цӕрынц сӕрмагонд уагӕвӕрды бындурыл. Мах нысан дӕр куысты ахӕм фӕткмӕ раивынмӕ арӕзт у», — радзырдта Тадтайы-фырт.
Директоры ныхасмӕ гӕсгӕ, скъолайы ног бӕстыхай сӕ зӕрдӕмӕ фӕцыд. «Ныридӕгӕн уал нӕ ифтонггӕрзты иу хай ног бынатмӕ баластам. Дарддӕр дӕр архайдзыстӕм, цӕмӕй курсантты ахуыр ӕмӕ цардӕн ног бынаты ӕппӕт фадӕттӕ дӕр фӕзына. Уыимӕ, коллективы минӕвӕрттӕ ныртӕккӕ архайынц скъолайы алыварс фӕлгонцады куыстыты дӕр», — бафиппайдта Тадтаты Артур.
Директор куыд загъта, афтӕмӕй курсантты ныййарджытӕ дӕр разыйӕ баззадысты скъолайы ног бӕстыхӕйттӕй. Йӕ ныхасмӕ гӕсгӕ, ныртӕккӕ скъолайы ахуыр кӕны 100 курсанты. Хӕстӕгдӕр рӕстӕг сӕ нымӕц схӕццӕ уыдзӕн 160 адӕймагмӕ.
Нӕ уацхӕссӕг
