4 февралы не ‘мзӕххон, зындгонд футболон тренер Гӕззаты Валери нысангонд ӕрцыд УФ-йы Паддзахадон Думӕйы нациты хъуыддӕгты фӕдыл комитеты сӕрдарӕй.
Куыд зонӕм, афтӕмӕй Гӕззайы-фырт у ӕвдӕм равзӕрст Паддзахадон Думӕйы депутат парти «Рӕстаг Уӕрӕсе»-йӕ 2016 азы сентябрӕй фӕстӕмӕ. Ныронг уыд Паддзахадон Думӕйы физикон культурӕйы, спорты, туризм ӕмӕ фӕсивӕды хъуыддӕгты фӕдыл комитеты сӕрдары хӕдивӕг.
Ног бынатмӕ снысан кӕныны фӕстӕ журналисттимӕ фембӕлды Гӕззайы-фырт куыд фӕнысан кодта, афтӕмӕй бузныг у Паддзахадон Думӕйы разамынд ӕмӕ йӕ фракцийы уӕнгтӕй, стӕй иннӕ депутаттӕй, ахӕм ӕууӕнк ӕм кӕй равдыстой ӕмӕ йын уыцы бӕрнон бынат кӕй бахӕс кодтой, уый тыххӕй.
— Комитеты уӕнгты размӕ бирӕ ахсджиаг нысантӕ лӕууы. Ӕмӕ ме ‘мкусджытимӕ уӕхскуӕзӕй адарддӕр кӕндзыстӕм уыцы куыст Уӕрӕсейы адӕмты этнокультурон хӕдбындурдзинад бахъахъхъӕныны ӕмӕ дарддӕр райрӕзын кӕныны сӕраппонд.
Паддзахадон Думӕйы комитеты, ног разамонӕджы ныхасмӕ гӕсгӕ, ныртӕккӕйы ӕддагон ӕмӕ мидбӕстон уавӕрты архайгӕйӕ, национ политикӕйы фарстытӕ Уӕрӕсейӕн сты фыццаградон.
Гӕззаты Валери куыд фӕнысан кодта, афтӕмӕй комитеты уӕнгтӕ кусынц бирӕ ахсджиаг закъонты проекттыл. Уыдоны нымӕцы — УФ-йы паддзахадон национ политикӕйы сӕйраг уагӕвӕрдты тыххӕй, бӕстӕйы адӕмты культурӕ бахъахъхъӕныны тыххӕй, чысыл национ къордты минӕвӕртты бахъахъхъӕнын ӕмӕ бирӕ ӕндӕр ахсджиаг фарстытӕ.
