Нӕ абоны чысыл ӕмӕ стыр ӕнтыстдзинӕдтӕ, хъуыддӕгтӕ нын фӕвӕййынц ӕмбӕлгӕ хатдзӕгтӕ сӕ скӕныны ӕмӕ дарддӕр, райсоммӕ, нысантӕ ӕвӕрыны фӕрӕз. Ахӕм фӕткмӕ гӕсгӕ куы нӕ архайӕм, уӕд арвистоны аныгъуылдзыстӕм, нӕ бон рӕстӕджы домӕнты аккаг мадзӕлттӕй спайда кӕнын нӕ бауыдзӕн. Цард йӕхӕдӕг ӕвӕры хъуыддӕгтӕ лыг кӕнынӕн, аразынӕн, къуырцдзӕвӕнӕй рахизынӕн ног уынаффӕтӕ, ӕндӕр ахаст, ӕндӕр бавнӕлд. Ӕнӕрхъуыды талф-тулфтӕ нӕ, фӕлӕ бӕстон, хӕдзардзин ахаст.
Зӕххы фарст та ахсджиаг кӕд нӕ уыд?! ӕппындӕр белгом дӕр чи никуы сӕппӕрста, дзӕгъӕл кӕрдӕг хуымӕй чи никуы стыдта, уый дӕр тӕрхӕттӕ кӕны, кӕм сты нӕ зӕххытӕ, куыд сӕ пайда кӕнӕм ӕмӕ афтӕ дарддӕр. Ӕвӕццӕгӕн, зӕххы ахастдзинӕдтӕ банывыл кӕнынӕй вазыгджындӕр хъуыддаг зын ссарӕн у. Куыд ӕнтысы уый, комкоммӕ дзуапп чи дӕтты, уыцы ведомствӕйӕн? Афтӕмӕй, абон «Рӕстдзинад»-ы уазӕг — РЦИ-Аланийы паддзахадон исбонад ӕмӕ зӕххы ахастдзинӕдты министр Тедеты Руслан.
— Министрады архайд бирӕвӕрсыг у, фӕлӕ нӕхицӕн сӕйрагдӕр хӕсыл нымайӕм хъуыддӕгтӕ закъоны бындуртӕм гӕсгӕ лыг кӕнын, алы хицӕн цау, быцӕу дӕр закъоны барӕнтӕй барын. Афтӕ ӕвӕры домӕн республикӕйы Сӕргълӕууӕг Битарты Вячеслав, уый у нӕ иумӕйаг зондахаст.
Уавӕртӕ алыхуызон вӕййынц, хъуамӕ сбӕрӕг кӕнӕм зӕххы нысаниуӕг, чи у йӕ хицау, цавӕр бындуртӕм гӕсгӕ йӕм ис ӕмӕ ӕндӕр фӕзилӕнтӕ. Ӕрмӕст ивгъуыд аз нӕ республикӕйы исбонмӕ сфидар кодтам 23 зӕххы хайы, сӕ иумӕйаг фӕзуат — 313 гектары. Бафыстам зӕххы хай ӕлхӕныны-уӕй кӕныны иу бадзырд, хаццоны раттыны тыххӕй та 34 бадзырды. Паддзахадон кусӕндӕттӕн, ӕппынӕдзух сӕ пайда кӕныны нысанимӕ, радих кодтам 11 зӕххы хайы…
— Руслан, республикӕйы разамынд ӕвӕры ӕртӕ ӕмӕ фылдӕр сывӕллонджын бинонтӕн зӕххы хӕйттӕ радих кӕныны хӕс…
— Мах ыл кусӕм, ныридӕгӕн уал 47 ахӕм бинонтӕ систы зӕххы хицӕуттӕ. Иннӕ вазыгджын домӕн ӕвӕрдтой хъӕуты цӕрджытӕ, ома, фосдарынвӕнд сӕм ис, фӕлӕ хизӕнуӕттӕ нӕ фаг кӕны. Афтӕмӕй, 700 гектары иумӕйагӕй чи ахсы, ахӕм зӕххы хӕйттӕ, ӕппынӕдзух сӕ пайда кӕнынӕн, хизӕнуӕттӕн лӕвӕрд ӕрцыдысты. Нӕ куысты иннӕ бӕрӕггӕнӕн — зӕхх хаццоны райсгӕйӕ чи кусы ӕмӕ йын афойнадыл чи нӕ фиды, уыцы адӕймӕгтӕй 279-мӕ арвыстам сӕрмагонд документтӕ-хъусынгӕнинӕгтӕ. Сусӕггаг нӕу, республикӕйы исбоны уӕвӕг зӕххӕй дӕр йӕ нысанмӕ гӕсгӕ кӕй нӕ фӕпайда кӕнынц, уый. Ома, ӕмхуызонӕй нӕ, фӕлӕ сӕ хъуамӕ бӕрӕг кӕнӕм, куыд ӕмӕ сӕм цавӕр ахаст ис, уыдӕттӕ.
Ахӕм бӕрӕггӕнӕн куысты бындурыл 29 фыстӕджы арвыстам Уӕрӕсейы реестры цӕгатирыстойнаг управленимӕ, уымӕ хауы паддзахадон цӕстдард зӕххы тыххӕй закъонӕвӕрынад ӕххӕст кӕнын. Цӕрджытимӕ фембӕлдтыты рӕстӕг ахӕм ӕмӕ ӕндӕр хъуыддӕгтӕй уӕлдай рӕгъмӕ рахӕссынц, ацы кӕнӕ ӕндӕр адӕймагмӕ зӕххы хай цавӕр бындуртӕм гӕсгӕ ӕрхауд, уыимӕ баст фарст. Куыд зонут, афтӕмӕй ис ведомствӕты ‘хсӕн республикон къамис. Уым ӕппӕт ахӕм фарстытӕ лӕмбынӕг ӕвзарынц.
Ӕнӕзмӕлгӕ исбон паддзахадон кадастрмӕ бахӕссыны охыл министрад бакодта Алагиры, ӕрӕфы, Рахизфарсы, Горӕтгӕрон районты, Дзӕуджыхъӕуы арӕнтӕ сбӕрӕг, сфидар кӕныны, ныффыссыны куыстытӕ. Горӕтгӕрон районы администрациимӕ ма иумӕйаг кадастрон куыстытӕ бакодтам Джызӕл ӕмӕ Ногиры.
— Уыдӕттӕ дзурӕг сты зӕххимӕ баст хъуыддӕгтӕ афойнадыл ӕмӕ закъоны домӕнтӕм гӕсгӕ ӕххӕст кӕныныл…
— Афтӕ, зӕгъӕм, фарон нӕ дӕлхайад «Паддзахадон кадастрон аргъ кӕныны центр» аргъ скодта промышленнон, энергетикон, транспортон, бастдзинады, радиодзурынады, телеуынынады, информатикон, космосон архайды, бӕстӕхъахъхъӕнӕн, ӕдасдзинады ӕмӕ ӕндӕр сӕрмагонд нысаниуӕджы зӕххытӕн. Уымӕй дарддӕр, уӕлдай тынгдӕр хъахъхъӕд чи цӕуы, уыцы хъӕды, доны фондты зӕххытӕн.
Цӕмӕй хъӕууонхӕдзарадон нысаниуӕджы зӕххыты кадастрон аргъ ма фӕныллӕг кӕной, уый тыххӕй Кадастрон аргъ кӕныны центры кусджыты бахъуыд РЦИ-Аланийы Сӕйраг тӕрхондоны 50 ӕмбырды бацархайын.
— Ӕндӕр исбонӕй пайда кӕнынимӕ цавӕр хъуыддӕгтӕ баст сты?
— Республикӕйы исбон хъахъхъӕнгӕйӕ нӕ бахъӕуы тӕрхондоны ӕмбырдты архайын. Фарон нӕ специалисттӕ балӕууыдысты 265 тӕрхонадон ӕмбырды. Афтӕмӕй нӕ къухы бафтыд Зӕрӕмӕджы ГЭС-ты акциты хайыл РЦИ-Аланийы бартӕ сфидар кӕнын, Дзӕуджыхъӕуы Пашковскийы уынджы 26-ӕм бӕстыхай дӕр республикон исбонмӕ бахастам, Алагиры районы Тибы хъӕуӕн йӕ хуссайраг-ныгуылӕн хайы цы донисӕн, донцъирӕн ӕмӕ ӕндӕр бӕстыхӕйттӕ уыдис, уыдон дӕр.
Тӕрхондоны фӕрцы зӕххӕн хаццоны фиддонтӕ бацагуырдтам 1 018 117,16 сомы, «Аланияэлектросеть»-ӕй ӕнӕзмӕлгӕ исбонӕй пайда кӕныны тыххӕй — 27 595 000 сомы. Нымӕцтӕ сӕхӕдӕг ӕвдисынц нӕ архайд: фарон республикӕйы исбоны сфидар кодтам 200 ӕнӕзмӕлгӕ объекты. Уыдонимӕ — сидзӕр сывӕллӕтты фатертӕ, республикон ахадындзинадимӕ культурӕйы цыртдзӕвӕнтӕ, «Электроцинчы” объекттӕ, автофӕндӕгтӕ ӕмӕ ӕндӕртӕ.
Республикӕйы Хицауады уынаффӕйӕ «РЦИ-Аланийы инвестицион рӕзты корпораци»-йы уставон фӕрӕзтӕ фӕфылдӕр кӕныны мадзӕлттӕ сӕххӕст кодтам. Рауадысты 537 635000 сомы ӕмӕ 1 000 000 000 сомы.
Хаццоны лӕвӕрд зӕххӕй фиддонтӕ республикон бюджетмӕ фарон барвыстӕуыд 32 292 320 сомы, исбон хаццоны радтынӕй — 4 332 723 сомы, зӕххы хӕйттӕ ауӕй кӕнынӕй ӕфтиӕгтӕ — 163 200 сомы, акциты дивидендты хӕйттӕй ӕфтиӕгтӕ — 1029 000 сомы.
Паддзахадон ӕнӕзмӕлгӕ исбон хаццоны дӕттыны мах райдайӕнӕй кӕронмӕ, уыдыстӕм 263 бадзырды архайджытӕ. Бафыстам паддзахадон исбонӕй ӕппынӕдзух пайда кӕныны 35 бадзырды, уыдонимӕ исбоны хицӕуттӕ систы 6 ӕнӕкоммерцион социалон ахадындзинадимӕ организацийы. Чысыл ӕмӕ рӕстӕмбис амалхъомадӕн ӕххуысы нысанимӕ алы кварталы дӕр фӕфылдӕр кӕнӕм республикӕйы паддзахадон исбоны хыгъд. Уымӕй радих кӕнӕм амалхъомтӕн сӕ куыстад фӕпарахатдӕр кӕнынӕн, хъуыддӕгтӕ аразынӕн. Хаццоны фиддонтӕ вӕййынц ӕнцондӕрархайд.
Нӕ куыст кабинетты бадынимӕ баст нӕу, фарон районтӕм, хъӕутӕм ацыдыстӕм 81 хатты. Ӕрмӕстдӕр афтӕмӕй ис уавӕр бӕстон базонӕн, не ‘ппӕт исбонӕн аргъ скӕнӕн, кӕм хъӕуы, уым ӕй бабӕстон кӕнӕн…
— Бузныг, Руслан. Уӕ ведомствӕйыл ахъаззаг хӕстӕ ис ӕвӕрд, кӕй уын ӕнтысынц, уый бӕрӕг у. Ӕнӕмӕнг, уыдӕттӕ фӕзындзысты республикӕйы нывыл цардыл.
Ныхас ныффыста Бутаты Эльзӕ
