Къомианы мысгӕйӕ

0
197

Уырыссаг аив дзырды дӕсны, педагог, ахуыргонд ӕмӕ ӕхсӕнадон архайӕг, УФ-йы уӕлдӕр скъолайы сгуыхт кусӕг, Хетӕгкаты Къостайы номыл паддзахадон премийы лауреат ӕмӕ филологон наукӕты кандидат, профессор Къомайты Риммӕ Зауырбеджы чызджы райгуырдыл сӕххӕст 90 азы. Къомиан йӕ цард ӕнӕхъӕнӕй дӕр снывонд кодта ахуырад, хъомылад ӕмӕ наукӕйӕн. Йӕ зӕрдӕ ӕнӕвгъауӕй радта Ирыстоны кӕстӕр фӕлтӕрӕн, Ирыстоны хӕрзӕбонӕн.

Риммӕ цы хъӕздыг зонындзинӕдтӕ байтыдта суинаг филологтӕ ӕмӕ журналистты миддунейы, уыдон «дидинӕг рафтыдтой» нӕ республикӕйы наукон ӕмӕ уӕлдӕр ахуырады царды. Бирӕ сты йӕ фӕллойы бынтӕ, нӕ бӕстӕ ӕмӕ йын Ирыстон бузныг цӕй тыххӕй зӕгъой, уыдон. Мах не ‘ппӕт дӕр, Риммӕ ахуыргӕнӕг кӕмӕн уыд, уыдон абон зӕгъынц: «Бузныг хъысмӕтӕн, Риммӕйы нын чи радта».

Цӕгат Ирыстоны, Хетӕгкаты Къостайы номыл университеты разамынд, йӕ сӕргъы ректор Огъуаты Алан, журналистикӕйы факультеты декан Хӕбӕлаты Фатимӕ ӕмӕ журналистикӕйы кафедрӕйы сӕргълӕууӕг Тедтойты Зинӕйы хъӕппӕрисӕй ныр дыккаг хатт Къомайты Риммӕйы кадӕн арӕзт ӕрцыд номарӕн мадзал «Къомианы бакастытӕ». Архайдтой дзы канд университеты ахуыргӕнджытӕ ӕмӕ студенттӕ нӕ, фӕлӕ ма наукон институты кусджытӕ, нӕ республикӕйы ӕхсӕнады ӕмӕ дзыллон хабархӕссӕг фӕрӕзты минӕвӕрттӕ дӕр.

Ӕмбырд райдыдта, зындгонд педагог ӕмӕ стыр ахуыргонды ном, иу минут ӕдзӕмӕй алӕугӕйӕ, ссарынӕй. Уый фӕстӕ журналистикӕйы факультеты декан Хӕбӕлаты Фатимӕ радзырдта, Къомайты Риммӕйы цард ӕмӕ ӕхсӕнадон архайды, ахуырады ӕнтыстджын куысты тыххӕй.

ЦИПУ-йы ректоры номӕй ӕмбырды архайджытӕн арфӕ ракодта проректор Дыгуры Аллӕ ӕмӕ загъта:

— Кӕд абон Риммӕ не ‘хсӕн нал ис, уӕддӕр ӕй ӕнкъарӕм, хъусӕм ын йӕ ныхас. Журналистикӕйы факультет арӕзт ӕрцыд Мӕхӕмӕтты Ахуырбеджы хъӕппӕрисӕй ӕмӕ, цыдӕриддӕр фӕнд кодта йӕ райрӕзтӕн, уыцы хъуыддӕгтӕ рохуаты нӕ баззадысты. Рӕсугъд фидӕнмӕ хъӕздыг зонындзинӕдтимӕ кӕй афӕндараст кодта, уыцы фӕлтӕртӕ йын дарддӕр ӕххӕст кӕнынц йӕ хъуыддӕгтӕ. Ӕз мӕхи тынг амондджын хонын, Къомиан мӕ царды кӕй уыдис, кӕй мӕ ахуыр кодта мӕ хъуыдытӕ раст зӕгъыныл ӕмӕ ӕхсӕнады аккаг адӕймаг уӕвыныл.

Цымыдисаг уыдысты ӕппӕт архайджыты мысинӕгтӕ дӕр. РЦИ-Аланийы дзыллон коммуникациты ӕмӕ мыхуыры хъуыддӕгты фӕдыл комитеты сӕрдар Фидараты Юри йӕ мысинӕгты радзырдта, цавӕр уды хицау уыд Къомайты Риммӕ, студенттимӕ йӕ ахастдзинӕдтӕ куыд ӕвӕрдта, уый тыххӕй:

— Къомиан — ахӕм номӕй йӕ хуыдтой иууылдӕр, уыимӕ йӕм комкоммӕ афтӕ сдзурын, кӕй зӕгъын ӕй хъӕуы, ничи бауӕндыдаид. Риммӕ кӕд йӕхи тызмӕг ӕвдыста, уӕддӕр йӕ зӕрдӕ уыдис фӕлмӕн, тӕригъӕдгӕнаг. Фӕстӕдӕр бамбӕрстон, уыцы тызмӕгдзинад арӕзт кӕй уыд, кӕстӕрты раст хъомыладӕн. Нӕ йӕм уӕндыдыстӕм фӕстӕмӕ сдзурын, уӕлдай ныхас скӕнын. Уымӕн ӕмӕ зыдтам, «Къомиан» хӕстӕг ран кӕмдӕр ис. Кӕд-иу фӕзагъд кодта, уӕддӕр уарзӕгой зӕрдӕйы ахастимӕ. Йӕхицӕн нӕ ницы агуырдта. Ахуыргӕнӕджы курдиат-иу кӕй уды банкъардта, уымӕ та йӕ домӕнтӕ дывӕр уыдысты. Не ‘ппӕт дӕр ӕй уарзтам, никуы нӕ уыдзӕн рох нӕхи Къомиан.

Нӕ республикӕйы зындгонд скульптор Дзбойты Михал та ӕрымысыд, зӕрӕстон зӕххытӕм ӕрвыст ӕрыгон студентты ‘хсӕн Къомайты Риммӕимӕ куыд базонгӕ ис, ӕмӕ суанг зӕронды бонтӕм ӕнувыд хӕлӕрттӕй куыд баззадысты, уый.

Телерадиокомпани «Алани»-йы директор, Журналистты цӕдисы сӕрдар Хъуысаты Тимур Къомайты Риммӕйы тыххӕй равдыста документалон киноныв. Зындгонд ахуыргӕндтӕ ӕмӕ ӕхсӕнадон кусджытӕ дзы мысынц сӕ уарзон ахуыргӕнӕджы, уырыссаг аив дзырды дӕсны, курдиатджын ахуыргонд Къомайты Зауырбеджы чызг Риммӕйы.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here