Акци «Чемпионимӕ фӕлтӕрӕн» кӕй спортивон залы ацыд, уыцы 21-ӕм скъолайы ахуырдзаутӕн Дзӕуджыхъӕуы администрацийы Фӕсивӕдон политикӕйы, физкультурӕ ӕмӕ спорты комитеты кусджытӕ скодтой сабидуджы спортивон бӕрӕгбон.
Ацы хатт сывӕллӕттимӕ фембӕлдысты уӕгъдибар хъӕбысхӕстӕй дунейы фыццаг бынат бацахсыныл ерысты призер Къозонты Зауыр ӕмӕ грекъаг-ромаг хъӕбысхӕстӕй Европӕйы чемпион Тыбылты Георги.
Зындгонд спортсментӕ скъолайы хъӕбысӕйхӕцджытимӕ равдыстой спортивон фӕзилӕнтӕ, фӕстӕдӕр та фӕсивӕд сарӕзтой командӕтӕ ӕмӕ ерыс кодтой эстафетӕты.
— Амӕй размӕ дӕр ма ахӕм мидисджын акциты архайдтам. Фӕнды нӕ сывӕллӕтты царды ӕнӕниз уагыл сахуыр кӕнын, — загъта Къозоны-фырт.
— Горӕты ахуыргӕнӕндӕтты кӕй саразӕм, уыцы ӕвӕджиауы акци «Чемпионимӕ фӕлтӕрӕн»-ы хӕс у спортмӕ фӕсивӕды ӕргом аздахын. Спортивон секцийы архайд адӕймагӕн пайда кӕй у, уый хъуамӕ ахуырдзаутӕ зоной, — зӕгъы комитеты сӕрдар Фидараты Аслан.
