РЦИ-Аланийы Парламенты Сæрдар Алексей Мачнев амыдта советы æмбырд.
Депутаттæ æркастысты ссæдз федералон закъоны проектмæ. Уыдонимæ уыди Уæрæсейы Федерацийы Конституцимæ ивддзинæдтæ бахæссыны тыххæй документ дæр. Уыцы закъоны проект советмæ рахаста закъонæвæрынады, закъонад æмæ бынæттон хиуынаффæйады комитеты сæрдар Ортабайты Тимур. Уый куыд радзырдта, афтæмæй закъоны проект Паддзахадон Думæ æртыккаг бакасты сфидар кодта, Федерацийы Совет æй хорзыл банымадта. Уагæвæрдмæ гæсгæ йæ фарс хъуамæ рахæцой регионты закъонæвæрынадон æмбырдты дыууæ æртыккæгæм хайы. Парламенты Совет закъоны проект сфидар кодта æмæ йæ арвитдзæн Парламенты комитеттæ æмæ къамистæм. Дарддæр æй рахæсдзысты Парламенты æмбырдмæ.
Бюджеты, хъалонтæ, исбонад æмæ кредитон организациты комитеты сæрдар Баликъоты Валери депутатты базонгæ кодта «Уæрæсейы Федерацийы Хъалонты кодексмæ ивддзинæдтæ бахæссыны фæдыл» закъоны проектимæ. Ныхас дзы цæуы, инвестор субсидитæй цы исбон сараза, уыдон паддзахадæн лæвар ныууадзгæйæ, хъалонтæй кæй суæгъд уыдзæн, ууыл. Закъон фидаргонд куы ’рцæуа, уæд стыр ахъаз фæуыдзæн инвесторты нымæц фæфылдæр кæнынæн, инфраструктурæйы, социалон объекттæ саразынæн, æмæ сæ субсидиты хардзæй паддзахадон æмæ муниципалон исбонадмæ раттынæн.
Наукæ, ахуырад, культурæ æмæ информацион политикæйы комитеты разамонæг Еленæ Князева рæгъмæ рахаста «Уæрæсейы Федерацийы ахуырады тыххæй» закъонмæ ивддзинæдтæ бахæссыны фæдыл акт. Уымæ гæсгæ уæлæмхасæн домæнтæ фæзындзæн педагогон æмæ наукон-педагогон кусджыты архайдмæ.
Социалон политикæ, æнæниздзинад хъахъхъæнынад æмæ ветеранты хъуыддæгты комитеты сæрдар Реуазты Ларисæ советы уæнгтæн радзырдта, ноггуырд сывæллон чи хъомыл кæны декреты уæвгæйæ, уыцы сылгоймæгтæн профессионалон ахуырад, кæнæ цавæрдæр уæлæмхасæн дæсныйад райсынæн бартæ кæй дæттынц, уый тыххæй. Йæ ныхасмæ гæсгæ, ныртæккæ декреты уæвæг сылгоймæгтæн сæ бон ахæм ахуырад райсын у, æрмæстдæр кæм цæрынц, уыцы бынæтты. Закъоны проекты фæрцы та сæ гæнæнтæ фæпарахатдæр уыдзысты, уæлæмхасæн дæсныйад сæ бон райсын уыдзæн, кæм сæ бафæнда, уым. Ацы хъæппæрис адæмæн куыстдæттæг центртыл хæс æвæры, цæмæй сын æххуыс кæной.
Советы уæнгтæ æркастысты Удмуртийы республикæйы Паддзахадон Советы хъæппæрисмæ. Уый дзуры паддзахадон нысаниуæджы æлхæнинæгты тыххæй закъон фæхуыздæр кæныныл. Промышленносты, транспорты, бастдзинад æмæ амалхъомады комитеты сæрдары хæдивæг Дмитрий Дюбуа куыд радзырдта, афтæмæй инвалидтæн паддзахадон æххуыс бакæныны охыл организацитæй æлхæнын хъæуы сæ продукци æнæ конкурсæй.
Парламенты национ политикæ æмæ фæсивæды хъуыддæгты комитеты разамонæг Тауытты Алыксандр рæгъмæ цы федералон закъоны проект рахаста, уымæ гæсгæ хæсты ветеранты госпитæлтæ сæхгæнæн ис æрмæстдæр Уæрæсейы Федерацийы Хицауады уынаффæйæ. Иуæй-иу регионты алы æфсæнттæй сæхгæдтой ветеранты госпиталтæ, радтой сæ социалон ведомствæтæм, æмæ уымæй ныллæгдæр кæны сæ медицинон ахадындзинад.
КАСАТЫ Батрадз
