Ивгъуыд азы физикон культурæ æмæ спорты стыр æнтыстдзинæдтæ æмæ уæлахизтæ чи равдыста, уыдонимæ фембæлд республикæйы Сæргълæууæг БИТАРТЫ Вячеслав. Хуынд адæмæй уæлдай ма фембæлды архайдтой Хицауады Сæрдары хæдивæг Иринæ АЗИМОВА æмæ физикон культурæ æмæ спорты министр ХУЫГАТЫ Алан.
«Сæмбырд стæм спортсментæ æмæ сæ тренертæн бузныг зæгъыны тыххæй. Иумæ ивгъуыд азы, амæй-ай, бæрзонддæр ерысты уæлахиздзаутæ систут, уымæй ирыстойнаг спорты историмæ стыр бавæрæн бахастат. Тренертæ сæ курдиат, сæ дæсныдзинад, арæхстдзинад кæстæртæн дæттынц, се ‘ппæт къахдзæфтæм сты къæрцхъус, се сгуыхтдзинæдтæн сбарæн дæр нæй. Арфæ уын кæнын уыцы æнтыстдзинæдты тыххæй, зæрдæ дардзыстæм, ацы аз дæр ахæм уæлахизтæй кæй сбæрæг кæндзыстут, ууыл. Æнтыстджын, æнæниз ут, ног уæлахизтæ уæ къухы æфтæнт», — загъта йæ арфæйы ныхасы Битарты Вячеслав.
Уæрæсейы Федерацийы Президенты Указæй «Уæрæсейы Федерацийы физикон культурæйы сгуыхт кусæджы» кадджын ном радтой уæззау атлетикæйæ Цæгат Ирыстоны иугонд командæйы хистæр тренер Золойты Хъазыбегæн. Цæгат Ирыстоны Сæргълæууæджы Указæй «РЦИ-Аланийы физикон культурæ æмæ спорты сгуыхт кусæджы» нæмттæ радтой Æрæфы районы спортивон скъолайы тренертæ Бериты Алыбегæн, Лæгкуты Ербекæн, спортивон скъола «Юность»-ы тренер Дзулаты Игорæн, Физикон культурæ æмæ спорты министрады информацион хайады хицау Туаты Дианæйæн, олимпаг фæстауæрцы спортивон скъолайы тренер Цæгæраты Хъазыбегæн, спортивон скъола «Урожай»-ы тренер Цъæхилты Таймуразæн.
Физикон культурæйы къабазы æнтыстджын архайды тыххæй Республикæ Цæгат Ирыстон-Аланийы Кады грамотæйæ хорзæхджын æрцыдысты спортивон скъола «Юность»-ы директор Гаджиты Инал, нæ республикæйы Джиу-джитсуйы федерацийы президент Дзитойты Артур, боксы олимпаг фæстауæрцы спортивон скъолайы тренер Елойты Алан, Мæздæджы сывæллæтты спортивон скъола «Дзюдо»-йы тренер Еленæ Трофименко, аивадон гимнастикæйы олимпаг фæстауæрцы спортивон скъолайы тренер Цуциты Фатимæ, тхэквондойы олимпаг фæстауæрцы спортивон скъолайы тренер Рашид Шоров, лæгæй-лæгмæ хæсты спортивон скъолайы армрестлинджы тренер Светланæ Якимова.
Битарты Вячеслав фатер балæвар кодта цыбыргонд физикон авналæнтимæ спортивон скъола «Стимул»-ы спортсмен Гамаонты Игорæн. «Мæхи номæй дæр, Ирыстоны иннæ спортсменты номæй дын стыр бузныг зæгъын, спорты рæзтмæ цы стыр æргом здахыс, уый тыххæй. Мах уыдæттæ нæхæдæг дæр уынæм, æнкъарæм æмæ сæ спортивон бæрæггæнæнтæй æвдисæм. Æнæниз у, дæ къухы æнтыстдзинæдтæ æфтæнт!» — йæ арфæйы ныхасы загъта Гамаоны-фырт.
Инфекцион низæй тæссагдзинæдтæ кæй æвзæры, уымæ гæсгæ, нæ республикæйы дæр дзыллон мадзæлттæ къаддæргæнгæ цæуынц. Ацы фембæлдмæ дæр кæй хъавыдысты, уыдоны се’ппæты не ‘рбахуыдтой.
РЦИ-Аланийы
Сæргълæууæг æмæ Хицауады
пресс-службæ
