Æгас дунейы адæмтæ цы ног низы тасæй фæудаист сты, уыцы коронавирус кæд Ирыстонмæ нæма схæццæ, уæддæр йæ азарæй хи бахъахъхъæныны мадзæлттæ арæзт цæуы нæ республикæйы дæр.
Уый, кæй зæгъын æй хъæуы, ахæм уавæры хъæугæ хъуыддаг у. Уыцы мадзæлттæ хауынц алкæмæ дæр, уымæн æмæ æгас адæмы æдасдзинадыл дзурæг сты.
Карантин цы бирæ куыстуæттæ, ахуыргæнæндæттæ, культурон æмæ аивадон мадзæлттæм хауы, уыдонимæ сты спортивон ерыстæ æмæ ахуыртæ дæр. Рæстæгмæ сæ куыст баурæдтой спортивон скъолатæ æмæ клубтæ. Уæгъдибар хъæбысхæсты академийы директор Беккуызарты Дианæ куыд зæгъы, афтæмæй сæм ныртæккæ нæй спортивон ахуыртæ. Ахæм уавæр хъуамæ ахæсса 10 апрелы онг.
Æхгæд сты иннæ спортивон скъолатæ æмæ клубтæ дæр. Суанг ма Уæрæсейы иугонд командæтæй йæхи дунеон æмæ европæйаг ерыстæм чи цæттæ кодта, уыдон дæр сæ ахуыртæ аивтой фæстæдæрмæ. Кæдмæ, уый та абон бæлвырдæй зæгъæн нæма ис.
Коронавирусы азарæй Европæйы чемпионат иннæ азмæ хаст кæй æрцыд, уый тыххæй Уæрæсейы иугонд футболон командæйы сæйраг тренер Черчесты Станислав загъта: «Афæдз — бирæ у æнцад бадынæн. Мах хъуамæ уыцы рæстæгæй раст спайда кæнæм. Знон чи цы уавæры уыди, уый профессионалон футболы ницы давы. Ныртæккæ цы уавæр сæвзæрд, уый канд махæн нæу. Уæрæсейы иугонд командæйы уæнгтæй фæсарæйнаг клубты чи хъазы, уыдонæй сты Черышев, Головин, Кудряшов. Æз уыдонимæ бастдзинад дарын æмæ зонын, сæхи куыд хатынц, уый. Цы уавæры бахаудтам, ууыл марой кæныны бæсты агурын хъæуы ахæм мадзæлттæ, цæмæй дзы æнæкъуыхцытæй рацæуæм”.
Нæ зындгонд спортсмен æмæ тренер раст зæгъы: кæд ныртæккæ ерыстæ урæд æрцыдысты, уæддæр сын фæстæдæр æнæ сног кæнæн нæй æмæ уымæ та хъæуы цæттæ уæвын. Ацы ныхæстæ хауынц æппæт спортивон ерыстæм дæр. Уырны нæ, нæ тренертæ æмæ спорты разамонджытæ ныры уавæрæй раст хатдзæгтæ кæй скæндзысты, уый.
БАСКАТЫ Уырызмæг
