Куыд Цæгат Ирыстоны, афтæ бæстæйы иннæ регионты дæр ныртæккæ хыгъд цæуынц æппæтуæрæсеон конкурс «Экспортер года»-йы бæрæггæнæнтæ. Æппæтуæрæсеон конкурсы регионалон къæпхæны раздзæуджыты нæмттæ фехъусын кодтой, дзæуджыхъæуккаг центр «Мой бизнес»-ы цы æмбырд уыд, уым.
Конкурсы архайынвæнд чи скодта, уыцы компаниты æрмæджытæм рагагъоммæ æркастысты РЦИ-Аланийы Амалхъомадæн æххуысы фонд æмæ республикæйы Экономикон рæзты министрады специалисттæ.
Æмæ ныр конкурсон къамис фехъусын кодта, цалдæр номинацийы чи фæуæлахиз, уыцы компаниты нæмттæ.
Афтæ, промышленносты къабазы хуыздæрыл нымад æрцыд æнæххæст бæрнондзинады æхсæнад «Агрофирмæ ФАТ», агропромышленнон комплексы — æнæххæст бæрнондзинады æхсæнад «Елети Альба», лæггæдты къабазы — æнæххæст бæрнондзинады æхсæнад «Грин», нырыккон технологиты къабазы — æнæххæст бæрнондзинады æхсæнад «Спецмаш». Номинаци «Азы æнтыстджындæр компани»-йы фæуæлахиз æнæххæст бæрнондзинады æхсæнад «Токар».
Конкурсы архайджытæн сæ æнтыстдзинады тыххæй арфæтæ ракодта æмæ дипломтæ радта Цæгат Ирыстоны экономикон рæзты министры хæдивæг Дзоблаты Зураб.
Уыимæ, иннæ уæрæсейаг регионты дæр бæрæггонд цæуынц, экспортон архайд æнтыстджындæрæй чи кæны, уыцы компанитæ. Конкурсы фæдыл бæрнон кусæндон — Уæрæсейы экспортон центры генералон директор Вероникæ Никишинæйы ныхасмæ гæсгæ, ацы конкурс ирдæй æвдисы, экспортон архайдмæ æмхицдæр чи у, стæй æнтысгæ дæр фылдæр кæмæн кæны, уыцы компаниты. «Конкурсы уæлахиздзаутæ æмæ лауреаттæ сæ æнтыстджын куыстæй дæнцæг сты иннæтæн дæр — зын экономикон уавæрты дæр фадæттæ ис ерысхъом уæвынæн, стæй уæрæсейаг продукцийæн фæсарæйнаг базартæм уæрæх фæндаг агурынæн», — фæнысан кодта Вероникæ Никишинæ.
ГУЫРДЗЫБЕТЫ Зæринæ
