Куыддæр фæбонтæ кæна, афтæ фæндагаразджытæ бавналдзысты цалцæггæнæн куыстытæм. Æрмæст ивгъуыд аз Дзæуджыхъæуы национ проект «Æдас æмæ хæрзхъæд автомобилон фæндæгтæ»-йы фæлгæты цалцæггонд æрцыди 28 фæндаджы.
Ацы аз дæр фæндагаразджытæм бирæ хъуыддæгтæ æнхъæлмæ кæсы, Дзæуджыхъæуы бынæттон хиуынаффæйады администрацийы бардзырдæй сбæрæг сты, сæ иумæйаг дæргъ 22,49 километры кæмæн у, ахæм цалцæггæнинаг 28 уынджы æмæ проспекты. Стырдæр куыстытæ бакæндзысты горæты цæгат-ныгуылæйнаг хайы уынгты. Уалдзыгон уынг дæр у Дзæуджыхъæуы сæйрагдæр уынгтæй иу, цы транспорт ыл цæуы, уый азæй-азмæ фылдæр кæны.
Горæт рæзы, ацы уынджы фæйнæфæрсты фæзынд бирæ ног хæдзæрттæ, уæйгæнæн центртæ, медицинон кусæндæттæ, скъолатæ, рæвдауæндæттæ. Æрмæст маршруттæ дзы ис дæсы бæрц. Уынгæн йæ иу хай (Цоколайы-фырты уынгæй Калинины уынджы онг) цалдæр азы размæ цалцæггонд æрцыд. Фæндагыл фæзындис, транспорт дыууæрдæм кæм цæуы, ахæм парахат тæлмытæ. Ацы аз хъуамæ бындуронæй рацаразой Цоколайы-фырты уынгæй Дзусы-фырты уынджы онг хай дæр. Ахсы 1,1 километры, цы уæлæмхасæн тæлмытæ дзы фæзындзæн машинæтæн, уыдоны фæрцы фæахадгæдæр уыдзæн фæндаггон змæлды архайджыты æдасдзинад, транспорт дæр дзы цæудзæн æнцондæрæй.
Ныридæгæн куыстытæ æххæст кæнын райдыдта организаци «Стройгарант», сæ хæрзхъæддзинадмæ æппынæдзух сæ цæст дарынц «Фæндаггон фонд», æмæ Фæндаггон хæдзарады комитеты специалисттæ. Бадзырдмæ гæсгæ аразджытæ хъæндзинæдтæ куы ‘руадзой, уæд сæ иуварс кæндзысты сæхи хъару æмæ æхцайы фæрцы. Куыстытæ хъуамæ сæххæст кæной сентябры.
РЦИ-Аланийы
Фæндаггон
хæдзарады комитеты пресс-службæ
