Зындгонд куыд у, афтæмæй 2020 азы 25 мартъийы Уæрæсейы Президент Владимир Путин цы Указ бафыста, уый бындурыл 30 мартъийæ 3 апрелы онг рæстæгмæ урæд æрцыд бирæ куыстуæтты архайд. Уыимæ, сæ куыст бауромæн кæмæн нæй, уыцы организацитæ æмæ кусæндæттæй уæлдай, иннæ адæмæн бафæдзæхстой, цæмæй ацы бонтæ хæдзары арвитой.
Уыцы документы уагæвæрдтæ æххæст кæныны нысанимæ РЦИ-Аланийы Сæргълæууæг Битарты Вячеслав бафыста сæрмагонд Указ. Уый тыххæй фехъусын кодта Цæгат Ирыстоны Сæргълæууæджы пресс-службæ.
Уыцы Указмæ гæсгæ, 28 мартъийæ — 6 апрелы онг Цæгат Ирыстоны фæзуæттыл хъуамæ арæзт ма цæуой дзыллон, хиирхæфсæн, культурон æмæ æндæр ахæм мадзæлттæ паркты, базарадон центрты æмæ, адæм бирæгæйттæй кæм вæййынц, æндæр ахæм бынæтты. Уыимæ, уыцы æмгъуыдты хъуамæ æхгæд уой музейтæ, библиотекæтæ, кинотеатртæ, иннæ культурон æмæ хиирхæфсæн кусæндæттæ. Ресторантæн, кафетæ æмæ хæлцады иннæ объекттæн бахæс кодтой, цæмæй сæ куыст арæзт цæуа æрмæстдæр дистанцион заказтæ исгæйæ æмæ цæттæ хойраг хæдзармæ æрвитгæйæ.
Цæгат Ирыстоны Сæргълæууæджы Указы бындурыл уыцы æмгъуыды хъуамæ сæ куыст æруромой розницæйы базарады кусæндæттæ æмæ армукъатæ. Уыимæ, сæ куыст адарддæр кæндзысты хойраджы продуктты дуканитæ æмæ афтектæ, стæй, фыццаградон æгъдауæй хъæугæ хойраджы продукттæ æмæ промышленнон товартæ чи уæй кæны, уыцы базарадон организацитæ. Сæ архайд адарддæр кæндзысты, заказтæ дистанцион æгъдауæй чи исы æмæ товартæ æлхæнæгмæ хæдзармæ чи хæццæ кæны, уыцы базарадон организацитæ дæр.
Нысангонд æмгъуыдты сæ куыст хъуамæ æруромой косметологон салонтæ, абанатæ, саунæтæ, бассейнтæ, фитнес-центртæ æмæ æндæр физкультурон-спортивон объекттæ, физкультурон-спортивон секцитæ, туристон клубтæ æмæ базæтæ.
Уыимæ, рæстæгмæ адæмæн лæвæрд нæ цæудзысты стоматологон лæггæдтæ дæр. Фæлæ æвæстиатон æмæ æнæмæнгхъæугæ стоматологон æххуыс райсæн уыдзæн.
Рæстæгмæ гæрæнтæ æвæрд æрцыд паддзахадон æмæ муниципалон лæггæдты центрты архайды дæр. Афтæ, паддзахадон æмæ муниципалон лæггæдтæ рæстæгмæ райсæн уыдзæн æрмæстдæр уыцы центртæм рагагъоммæ хи ныффысгæйæ.
Указы бæлвырдгонд æрцыдысты уæлдæр, астæуккаг профессион, иумæйаг астæуккаг æмæ скъолайы агъоммæ ахуырады кусæндæтты каникулты æмгъуыдтæ дæр. Уыцы фæтк æххæстгонд цæудзæн 28 мартъийæ 12 апрелы онг. Уыимæ, ныййарджыты иумæйаг уынаффæйæ гæнæн ис, цæмæй рæвдауæндоны куса иу къорд — уырдæм кæнæн уыдзæн сæ ныййарджытæ кусгæ кæмæн кæнынц, уыцы сывæллæтты.
Цæгат Ирыстоны Сæргълæууæг йæ Указæй бæлвырд амынддзинæдтæ радта республикон министрадтæ æмæ ведомствæтæн дæр.
Афтæ, Æнæниздзинад хъахъхъынады министрад рæстæгмæ æрурома диспансеризаци æмæ профилактикон цæстдарды мадзæлттæ, стæй рæстæгмæ сæхгæна, министрады дæлбар цы санаторитæ ис, уыдон.
Фæллой æмæ социалон рæзты министрад дæр хъуамæ рæстæгмæ фæкъаддæр кæна адæмимæ специалистты комкоммæ фембæлдтытæ, уыимæ, ацы бонты фылдæр æргом аздахын хъæуы адæмæн лæггæдтæ дистанцион хуызы (телефонæй, посты æмæ электронон бастдзинады фæрцы) æххæст кæныны хъуыддагмæ. Уыимæ, ведомствæйæн бахæс кодтой, цæмæй, йæ хæдзары карантины фæткмæ гæсгæ цыппæрдæс боны чи æрвиты, уыцы адæмæн социалон æххуыс кæнын.
Уæлдæр амынд æмгъуыдты Экономикон рæзты министрад хъуамæ иудадзыгдæр йæ цæст дара, хойраг æмæ æндæр фыццаградон продукттæ æмæ промышленнон товартæй базарадон организацитæ куыд ифтонггонд цæуынц, уымæ. Уымæй уæлдай, Монополиты ныхмæ архайды федералон службæйы республикон управлениимæ иумæ хъуамæ бæрæг кæной фыццаградон хойраг æмæ товарты æргъты уавæр дæр.
Промышленност æмæ транспорты министрадæн бахæс кодтой, цæмæй фæбæстондæр кæной республикæйы арæнтыл контролон-уадзæн пунктты цæстдарды мадзæлттæ. Афтæ, республикæйы арæнты сæрты чи хизы, уыцы адæмы уавæрмæ хъуамæ каст цæуа тепловизорты фæрцы. Сæрмагонд санитарон цæстдард хъуамæ уа транспорты сыгъдæгдзинадмæ дæр. Уымæй уæлдай, министрад æмæ иннæ æмбæлгæ ведомствæтæ иумæйаг хъарутæй хъуамæ бацархайой, цæмæй сæрмагонд тепловизортæ адæймаджы тæвд барынæн æвæрд æрцæуой аэропорты, æфсæнвæндаджы æмæ автомобилон транспорты вагзалты.
Санитарон æмæ административон цæстдарды мадзæлттæ фæахадгæдæр кæныны фæдыл сæрмагонд амынддзинæдтæ лæвæрд æрцыдысты бынæттон хиуынаффæйады оргæнтæ æмæ æндæр республикон ведомствæтæн дæр.
Фарн уæм бадзурæд, хорз адæм!
Иууылдæр æй зонут, канд Ирыстон æмæ Уæрæсейыл нæ, фæлæ æгас дунейыл дæр ацы тæссаг хæцгæ низы аххосæй цы уæззау бонтæ скодта, уый.
Хуыцауы хатыр бакæнут, фæлæ дзы нæхæдæг нæхи куы нæ бахъахъхъæнæм, уæд нын ничи баххуыс кæндзæн. Уымæ гæсгæ уæ уый курæг стæм æмæ ÆДДÆМÆ (уынгтæм, æхсæнадон бынæттæм) æнæхъуаджы МА ЦÆУТ! Дохтырты ныхæстæм хъусут! Уæхи дæр æмæ уæ бинонты дæр стыр фыдбылызæй бахизут!
КАЛМАНТЫ Аслан
