Цæгат Ирыстоны æнæниздзинад хъахъхъæнынады уагæвæрд хъуамæ цæттæ уа сæвзæргæ уавæрты ахадгæ хуызы архайынмæ. Зæгъæм, Тагъд медицинон æххуысы рынчындоны бынæттæ куы нал уа, уæд коронавирусæй рынчынæй кæуыл фæгуырысхо уой, уыдоны æвæрын райдайдзысты Республикон клиникон рынчындоны дæр. Ахæм уынаффæ хаст æрцыд, РЦИ-Аланийы Сæргълæууæг БИТАРТЫ Вячеславæн республикæйы медицинон кусæндæтты разамонджытимæ цы радон фембæлд уыд, уым.
Ныхасы архайджытæ уыдысты Хицауады Сæрдар Тускъаты Таймураз, æнæниздзинад хъахъхъæнынады министр Годжыцаты Тамерлан, «Роспотребнадзор»-ы республикон управленийы хицау Тыбылты Алан, стæй æндæр ведомствæтæ æмæ службæты бæрнон кусджытæ.
Фембæлды райдайæны Битарты Вячеслав куыд фæнысан кодта, афтæмæй республикæйы æппæт медицинон кусæндæттæ дæр хъуамæ æрбангом кæной сæ хъарутæ æмæ сæвзæргæ уавæрты ноджы бæрнондæрæй архайой.
— Æппæт дунейы уавæр дæр куыд ивы, уый уынæм, хъыгагæн, рынчынты нымæц фылдæрæй-фылдæр кæны. Уыцы æууæл хынцгæйæ, хъуамæ уæм цæттæ карз уавæрты архайынмæ дæр. Кæй зæгъын æй хъæуы, æнцон нæ уыдзæн карз низæфтауæджы ныхмæ тохы. Фæлæ ныртæккæ æппæт хъарутæ дæр саразын хъæуы нæ адæмы фæрныгадæн. Фарстыты сæйрагдæр ныртæккæ у не ‘мзæххонты æнæниздзинад æмæ æдасдзинад, — фæнысан кодта республикæйы Сæргълæууæг.
Ныхасы архайджытæ бæстон æркастысты, медицинон кусæндæттæ хъæугæ хостæ æмæ техникæйæ куыд ифтонг сты, стæй районты рынчындæттæ ног уавæрты сæ куыст куыд рацарæзтой, уымæ.
Битарты Вячеслав республикæйы цæрджытæм ноджыдæр ма иу хатт фæсидт, цæмæй дарддæр дæр æнаиппæй æххæст кæной хииппæрддзинады фæтк. Ацы домæн, фыццаджы-фыццагдæр, æххæст кæнын хъæуы хистæр кары фæлтæрæн, стæй, сæ уавæр алыхуызон низты аххосæй лæмæгъ кæмæн у, уыцы адæмæн.
РЦИ-Аланийы
Сæргълæууæджы æмæ Хицауады пресс-службæ
