Фембæлд рынчындоны кусджытимæ

0
284

РЦИ-Аланийы Сæргълæууæг БИТАРТЫ Вячеслав бабæрæг кодта æмæ фембæлд Тагъд æххуысы клиникон рынчындоны кусджытимæ. Ныртæккæ уым дзæбæх кæнынц коронавирусон хæцгæнизæй рынчынты, низæй гуырысхойаг адæймæгты.

Фембæлды ма архайдтой æнæниздзинад хъахъхъæнынады министр Годжыцаты Тамерлан, рынчындоны сæйраг дохтыр Хъаныхъуаты Сергей, анестезиолог Быценты Роланд. Республикæйы цæрджыты номæй Битарты Вячеслав æппæт коллективæн дæр сæ удуæлдай фæллойы, сæ хæстæ зæрдæбынæй кæй æххæст кæнынц, уый тыххæй бузныг загъта.

«Ацы вазыгджын рæстæг æвдисут хъæбатырдзинад æмæ патриотизм. Хъæбатыртæ уæ куы схонæм, уæд нæ фæрæдидзыстæм. Уæлиау ныхæстыл мын сæ ма банымайут, ныртæккæ адæмæн куыд лæггад кæнут, мах уый уынæм. Уæ хæдзæрттæ ныууагътат, психологон æгъдауæй уый æнцон нæу. Уæ куыстæн уын аргъ кæнæм æмæ æппæтвæрсыг æххуысмæ стæм цæттæ», — бафиппайдта республикæйы Сæргълæууæг.

Уый бафарста куысты уавæртæй, цæмæй тыхсынц, медицинон ифтонггæрзтæй, дзæбæхгæнæн мадзæлттæй куыд цæттæ сты, уæлæмхасæн ма цавæр æххуыс хъæуы рынчынты хуыздæр æмæ ахадгæдæр дзæбæх кæныны тыххæй. Рынчындоны кусджытæ куыд бамбарын кодтой, афтæмæй хъуагдзинæдтæ не ‘ййафынц, арфæ ракодтой, республикæйы разамындæй сæм цы æххуыс цæуы, уый тыххæй. Куыд бацамыдтой, афтæмæй ацы уавæрты æмбарындзинадмæ æнхъæлмæ кæсынц адæмы ‘рдыгæй.

Хъуамæ алчидæр уавæр æнкъара æмæ низ ма ‘руадзыны мадзæлттæ, хииппæрд уæвыны фæтк æххæст кæна. Нывылгæнинаг у рынчынты хиуæттимæ æмархайды фæтк, арæх хиуæттæ телефонæй дзурынц, фæрсынц рынчыны уавæрæй, уыдæттæ та дохтыртæ æмæ медицинон хоты архайд къуылымпы кæнынц. Рынчындонмæ бацæуæны æрæмбырд вæййынц хæстæджытæ,  хиуæттæ, хорз уаид, ацы ран куы балæууиккой бархионтæ-медицинон кусджытæ. Уыдон телефонæй дзурджытимæ ныхас кæниккой, рынчынты уавæры тыххæй сын хъусын кæниккой. Уæдæ рынчындонмæ бацæуæны цур дæр цавæрдæр информацион фæйнæджытæ ис сæвæрæн, уым рынчынты уавæры тыххæй уаид бакæсæн æппæт хабæрттæ дæр.

Медицинон кусджытæ æппынæдзух рынчындоны кæй вæййынц, уымæ гæсгæ сын уым цæрынæн хъуамæ æппæт уавæртæ дæр уа. Æххуыс сын кæнынц бынæттон амалхъомтæ, сæхимæ райстой хойраджы продукттæ æрвитыны хъуыддаг. Хæцгæнизæй рынчынтимæ цы дохтыртæ, æндæр персонал кусы, уыдон алы дыууæ къуырийы дæр исдзысты мызд регионалон æмæ федералон уæлæмхасæн æхцаимæ. Ахæм хæс æвæрд ис республикæйы финансон ведомствæйыл.

 

РЦИ-Аланийы

 Сæргълæууæджы æмæ Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here