Уæрæсейы Федерацийы Президенты Æххæстбарджын минæвар Цæгат Кавказы федералон зылды Юрий ЧАЙКА видеобастдзинады фæрцы арæзт æмбырды æрныхас кодта регионты разамонджытимæ.
Рæгъмæ рахастæуыд æнæниздзинад хъахъхъæнынады къабазы цæттæдзинады, коронавирусимæ тохы хъуыддаджы æмархайды ахсджиаг фарстытæ. Юрий Чайка куыд загъта, афтæмæй 22 апрелмæ зылды рабæрæг коронавирусимæ баст 2018 цауы. Федералон зылды рынчындæтты уæззау уавæры ис 93 адæймаджы, рæстæмбис уæззау сты 475 низджыны.
«Ахæм хатдзæг скæнæн ис æмæ нырма æххæст цæттæ нæма стæм низимæ тохмæ. Бирæ хъуыддæгтæ ма хъæуы скæнын хæрзцыбыр рæстæгмæ», — бафиппайдта Президенты минæвар.
РЦИ-Аланийы Сæргълæууæг Битарты Вячеслав куыд фæбæрæг кодта, афтæмæй республикæйы бирæвæрсыг куыст цæуы низ бауромынæн, парахат кæнын æй ма бауадзынæн. Цæгат Ирыстоны Хицауад æппæт гæнæнтæ æмæ амæлтты фæрцы архайы республикæйы æнæниздзинад хъахъхъæнынады къабаз фæхъомысджындæр æмæ фæифтонгдæр кæныныл.
Мартъийы райдайæны республикæйы цы сæрмагонд штаб райдыдта кусын, уырдæм бахуыдтой æххæстгæнæг хицаудзинады, цæстдарæг æмæ барадхъахъхъæнæг оргæнты разамонджыты. Ног хæцгæ низæн аккаг гæрæнтæ сæвæрыны нысанимæ штаб æппынæдзух хæссы бæлвырд фæндæттæ æмæ ахсджиаг уынаффæтæ. Национ пъланы бындурыл фидаргонд æрцыдысты низ ма ‘руадзыны нысанимæ уæлæмхасæн санитарон-эпидемиологон мадзæлттæ. Уыдонмæ Уæрæсейы Президенты амынддзинæдты бындурыл афойнадыл бахæссынц хъæугæ ивддзинæдтæ æмæ уæлæфтуантæ.
Эпидемиологон карз уавæры фæтыхджындæр санитарон-карантинон цæстдард паддзахадон æмæ административон арæнты сæрты æрбахизыны фæткмæ. Фæфылдæр сты, адæммæ, уæзæгтæм чи кæсы, бæлццæтты тæвд чи бары, уыцы кусджытæ. Ацы хъуыддагæн бæрнон ведомствæтæн ис хорз æмархайд. Низхъæстæ гуырысхойаджы тыххæй цавæр мадзæлттæ скæнын хъæуы, уыдæттæ сты бæлвырд, зындгонд. Рынчынтæн æнæмæнгхъæугæ дзæбæхгæнæн æххуыс бакæныны тыххæй бæрæг сты æртæ кусæндоны: Тагъд æххуысы республикон клиникон рынчындон, Сывæллæтты республикон клиникон рынчындон, Рахизфарсы районы центрон рынчындоны хайад.
Æдæппæтæй Цæгат Ирыстоны коронавирусимæ рынчынтæн бацæттæ кодтой 598 бынаты, уыдонæй 37 сты реанимацион. Федералон центры æххуысы, регионалон бюджет æмæ республикæйы Сæргълæууæджы фæстауæрцы фонды фæрæзты фæрцы къухы бафтыд æппæты вазыгджындæр фарстытæ алыг кæнын.
Федералон æмæ æнæпаддзахадон медицинон кусæндæттæ радтой рæуджыты æнæкъуыхцы куыстæн хъæугæ аппараттæ, уыдæтты руаджы къухы бафтыд фаг реанимацион бынæттæ сифтонг кæнын. Ныртæккæ коронавирусæй хъæстæ адæймæгтæн æмбæлгæ медицинон æххуыс бакæныны тыххæй Тагъд æххуысы клиникон рынчындоны кусынц хуыздæр реаниматологтæ. Ныры онг пъланмæ гæсгæ кусæг рынчындæттæ дæр цæттæ сты низхъæстæ адæмы дзæбæх кæнынмæ.
РЦИ-Аланийы
Сæргълæууæджы æмæ
Хицауады пресс-службæ
