Бæрæгбоны арфæ

0
365

Зынаргъ ветерантæ, фæсчъылдымы фæллойгæнджытæ, æппæт ирыстойнæгтæ!

Арфæ уын кæнын Фыдыбæстæйы Стыр хæсты советон адæмы Уæлахизы 75 азы боны тыххæй.

9 май нæ бæстæйы алы цæрæгæн дæр у æппæты уæззаудæр æмæ зæрдæмæ хæстæгдæр бон. Фыдыбæстæйы Стыр хæсты нæ адæм равдыстой диссаджы хъæбатырдзинад, сæ къухы бафтыд фашизм ныддæрæн кæнын. Милуангай адæймæгтæ, уыдонимæ нæ сахъ Ирыстоны минæвæрттæ дæр, радтой сæ цард, цæмæй нацизм йæхиуыл ма схæца. Хистæр фæлтæрмæ æрхауд æвирхъау зындзинæдтæ, хъуагдзинæдтæ, фæлæ нæ хистæртæ сæ сæрты ахызтысты.

Ацы бонты та мах ногæй арфæйы ныхæстæ дзурæм хæсты ветерантæн, чидæриддæр йæ фæллойадон архайдæй Цытджын Уæлахиз хæстæгдæр кодта, уыдонæн. Хицæн бузныг æмæ арфæ «хæсты» сывæллæттæн, уыдоны сабидугмæ æрхаудысты хæстон азтæ, зындзинæдтæ, æххормаг рæстæг. Фæстæдæр та хистæрты æмрæнхъ балæууыдысты пырхгонд хæдзарад йæ къæхтыл слæууын кæныныл. Абон уыцы фæлтæртæ сæхæдæг систы хистæртæ, зæрдиагæй архайынц æхсæнадон-патриотон, хъомыладон куысты, сæ диссаджы фæлтæрддзинад фæсивæдæн амонынц.

Зынаргъ ветерантæ! Сымах сæрбæрзондæй фæцыдыстут хæстон фæндæгтыл, куыстат быдырты æмæ заводты. Фæуæлахиз стут, нæ Фыдыбæстæйы сæрибардзинады тыххæй равдыстат диссаджы лæгдзинад æмæ хъæбатырдзинад. Уымæй систут фæзминаг кæстæртæн.

Уæлахизы бон уыд æмæ баззайдзæн æппæты уарзондæр, зæрдæмæ хæстæгдæр, риссагдæр æмæ цæссыгджындæр, фæлæ уыцы-иу рæстæг райдзастдæр бæрæгбонæй. Кæд  1945 азы 9 май махæй дардæй-дарддæр кæны, уæддæр нæ рох нæу, Цытджын Уæлахизæн  адæм цавæр аргъ бафыстой, уый.

Фыдыбæстæ хъахъхъæнджытæ æмæ хъæбатырты мысгæйæ сын зæгъæм бузныг нæ сабыр царды тыххæй. Ныллæг уын мæ сæрæй кувын, сымах бахъахъхъæдтат сабырдзинад æмæ Фыдыбæстæйы хæдбардзинад. Уæлахизы бæрæгбоны хорзæх уæ уæд!

 

ФАДЗАЙТЫ Арсен,

УФ-йы Федерацийы Советы уæнг

ОСТАВЬТЕ ОТВЕТ

Please enter your comment!
Please enter your name here