Ирон вокалон аивады йæ ном æмæ йæ курдиат хорзæн мысинагæн кæмæн баззад, уыцы зындгонд зарæггæнджытæй иу уыд РЦИ-Аланийы сгуыхт артист ГÆДЖЫНАТЫ Руслан.
Уый райгуырд 1961 азы 24 апрелы уæздан æмæ æгъдауджын хистæртæ Гæджынаты Зауырбег æмæ Еленæйы хæдзары. Ирон æмбисондау, зарын æмæ кафынмæ уарзт Руслан рахаста æрдзæй. Йæ миддуне хъæздыг уыд цардмæ тырнындзинадæй, удварны хæзнатæ ахуыр кæныны æмæ сæ фылдæр фæхайджын уæвыны зондæй.
Йæ фыд фæллой кодта колхозы, йæ мад та медицинон кусæг уыд. Се ‘ртæ сывæллоны кæрæдзийыл уыдысты æнувыд. Мад уайтагъддæр рахатыдта, йæ цот, фыццаджыдæр, Руслан аивадмæ æмхиц кæй сты, уый. Изæрыгæтты-иу сæ кæртæй хъуыст зарын æмæ фæндыры цагъд.
Русланæн йæ хъæлæсы аивдзинад раджы рабæрæг. Хъæуы скъолайы ахуыргæнгæйæ архайдта хихъæппæрисадон къорды. Йæ курдиатæй-иу дисы бафтыдта ахуыргæнджыты, скъоладзауты æмæ ныййарджыты. Скъолайы аст къласы каст куы фæци, уæд бацыд Дзæуджыхъæуы аивæдты училищæмæ. Сахуыр дзы кодта дыууæ курсы, стæй бацыд Дзæуджыхъæуы 2-æм профессионалон училищæмæ. Æмæ дзы райста аразæджы дæсныйад. Куыд хорз студент, афтæ йæ 1980 азы арвыстой Мæскуыйы олимпиадæмæ. Уым фембæлд УФ-йы адæмон артист Уататы Бибоимæ. Аивадмæ йын йæ зæрдæргъæвддзинад куы бамбæрста, уæд ын загъта, цæмæй йæ гæххæттытæ бадæтта Мæскуыйы аивадон театры скъола-студимæ. Руслан æм байхъуыста, æмæ уым йæ курдиат ноджы тынгдæр сæрттывта.
Студи каст куы фæци, уæд къорд азы бакуыста нæ республикæйы куклаты театр «Саби»-йы, фæстæдæр та — Ирон театры. Русланы вокалон курдиатимæ базонгæ сты фæсарæнты дæр. Иуахæмы та РЦИ-Аланийы адæмон артисткæ Хуытыгаты Маринæ æмæ Гæджынаты Риммæимæ ацыд Туркмæ. Уым цы ирæттæ цæры, уыдонæн радтой сæрмагонд концерт. Æмæ дзы рауад аивады æцæг бæрæгбон. Уым иу карджын ирон сылгоймаг, Русланы зарджытæм хъусгæйæ, йæ цины цæссыгтæ нал баурæдта æмæ загъта:
— Мæнæ нæм Ирыстонæй адæймаджы хуызы зæд æртахтис!
Фæстæдæр Турчы цы аивадон æркаст уыд, уым та Руслан азарыд Кокайты Тотрадзы фыст зарæг «Цыма та…». Уый тыххæй йын саккаг кодтой 2-аг бынат, лæвæрд ын æрцыд «Сыгъзæрин микрофон».
Руслан, цымæ, дæ риуы цавæр зæрдæ уыд? Алкæмæн дæр дзы куыд ардтай бынат? Дæ аив хъæлæсмæ æхсызгонæй цы адæм хъуыстой, уыдонæй дæ адзал куыд æнафоны айста? Кæд не ‘хсæнæй ацыдтæ, уæддæр дæ курдиаты рухс фæд цæргæйæ баззайдзæн нæ зæрдæты…
ДЗАНДАРАТЫ
Зарифæ,
Беслæны цæрæг
