Цæгат Ирыстоны Сæргълæууæг БИТАРТЫ Вячеслав 11 майы видеоконференцийы фæткмæ гæсгæ архайдта, УФ-йы Президент Владимир ПУТИН цы уæрæх æмбырд сарæзта, уым. Фембæлды архайджытæ æрдзырдтой сæвзæргæ эпидемиологон уавæрыл, стæй бæстæйы цæрджытæн æххуыс æмæ экономикæйы нывылдзинады фарстытыл.
Владимир Путин æмбырды райдайæны куыд фæнысан кодта, афтæмæй 12 майы ахицæн уыдзæн æнæкусгæ бонты æмгъуыд. Уыимæ, йæ ныхасмæ гæсгæ, регионты разамонджытæн бар лæвæрд ис, эпидемиологон уавæры ивддзинæдтæ хынцгæйæ, хииппæрддзинады фæтк æмæ карантины мадзæлттæ æруромын кæнæ адарддæр кæнынæн.
— Æруадзæн нæй, цæмæй низ ногæй фæкарздæр уа, цæмæй, низ парахатдæр кæныны ныхмæ цы гæрæнтæ сæвæрдтам, уыдон фæлæмæгъдæр уой. Кæй зæгъын æй хъæуы, эпидемийы размæ цы фæткмæ гæсгæ цардыстæм, уымæ ногæй раздæхынæн бахъæудзæн дзæвгар рæстæг. Уымæ гæсгæ, 12 майæ райдайгæйæ, эпидемийы ныхмæ мадзæлтты кæронмæ дарддæр дæр бæстон цæстдард хъæудзæн санитарон домæнтæ æмæ æндæр профилактикон уагæвæрдтæм, — загъта Президент.
Зындгонд куыд у, афтæмæй Цæгат Ирыстоны Сæргълæууæджы Указæй хииппæрддзинады фæтк республикæйы адарддæр кодтой 31 майы онг. Уыцы æмгъуыды кæронмæ республикæйы цæрджытæ, транспорты цæугæйæ æмæ æндæр æхсæнадон бынæтты уæвгæйæ, хъуамæ пайда кæной хихъахъхъæнæн сæрмагонд фæрæзтæй (маскæтæй, респиратортæ æмæ ‘рмкъухтæй).
Уыимæ, бæстæйы æппæт регионты дæр нырма аразæн нæй дзыллон мадзæлттæ дæр. Кусыны бар цы организацитæ æмæ компанитæн радтой, уыдоны та æнаиппæй хъуамæ æххæстгонд цæуой æппæт санитарон домæнтæ дæр.
Владимир Путин æмбырды архайджыты æргом аздæхта хистæр фæлтæрты минæвæртты æдасдзинадмæ. Йæ ныхасмæ гæсгæ, 65 азæй уæлæмæ кæуыл цæуы, уыцы адæм амæй фæстæмæ дæр архайдзысты хииппæрддзинады фæткы бындурыл.
Президент куыд фæнысан кодта, афтæмæй сæвзæргæ уавæрты уæлдай уæз æрæнцад, социалон лæггæдтæ чи кæны, уыцы кусæндæтты специалисттыл дæр. Президент бахæс кодта, цæмæй уыдонæн бафидой уæлæмхасæн мызд.
— Фæндон хæссын, цæмæй уыцы кусæндæтты коллективтæн уæлæмхасæн федералон фиддонтæ нысангонд æрцæуой 3 мæйы æмгъуыдмæ (15 апрелæй — 15 июлы онг). Сæрмагондæй мæ зæгъын фæнды, уыцы кусæндæтты специалисттæ апрелы хыгъдмæ дæр ахæм фиддонтæ кæй райсдзысты, уый. Социалон кусæндæтты дохтыртæн уæлæмхасæн фиддон уыдзæн 40 мин сомы (дыууæ къуырийы куыстæн). Уыимæ, кæд уыдон коронавирусæй рынчынтимæ комкоммæ архайынц, уæд уыцы фиддоны бæрц уыдзæн 60 мин сомы. Уыцы уагдæтты социалон æмæ педагогон кусджытæн, астæуккаг медицинон æмæ административон специалисттæн — фæйнæ 25 мин сомы. Уыдонæй коронавирусæй рынчынтимæ комкоммæ чи архайы, уыдонæн та — фæйнæ 35 мин сомы. Кæстæр къорды специалисттæн — фæйнæ 15 æмæ 20 мин сомы бæрц, техникон кусджытæн та — фæйнæ 10 æмæ 15 мин сомы бæрц, — загъта Владимир Путин.
Президент йæ раныхасы стыр æргом аздæхта уæрæсейаг бинонтæн æххуысы сæрмагонд мадзæлттæм дæр. Афтæ, дыууæ хатты (3375 сомæй — 6751 сомы онг) фæфылдæр уыдзысты сывæллæтты пособитæ. Уымæй уæлдай, Президент фæндон бахаста, цæмæй, 3 азы кæуыл нæма сæххæст, ахæм сывæллæттæ кæм ис, уыцы бинонтæн апрелæй июны онг æххуысы хуызы лæвæрд цæуа фæйнæ 5 мин сомы. Уыимæ, 1 июлæй фæстæмæ фæйнæ 10 мин сомы дæтдзысты, 3 азæй 16 азы онг кæуыл цæуы, ахæм сывæллæттæ кæм ис, уыцы бинонтæн. Ахæм фиддонтæ райсыны фæдыл куырдиæттæ дистанцион хуызы бадæттæн ис Паддзахадон лæггæдты портал æмæ УФ-йы Пенсион фонды дæлхайæдтæм. Президенты ныхасмæ гæсгæ, паддзахадон æххуысы ахæм мадзæлттæ аххæсдзысты 27 милуан сывæллоныл.
Эпидемийы рæстæг сæ архайд кæмæн фæкъуыхцы, уыцы амалхъомтæн дæр сæрмагонд æххуыс уыдзæн паддзахады ‘рдыгæй. Уыцы фарстмæ дæр Президент аздæхта йе ‘ргом. Афтæ, уыцы компанитæн сфысдзысты, дыккаг кварталы цы хъалонтæ хъуамæ бафыстаиккой, уыдоны фылдæр хай. Уыимæ, Президенты амынддзинадмæ гæсгæ, Хицауад ныртæккæ кусы амалхъомады къабазæн уæлæмхасæн паддзахадон æххуысы программæйыл. Уымæй уæлдай, Владимир Путин Хицауадæн бахæс кодта, цæмæй бакуса экономикæйы къабæзтæн æфстæуттæ æмæ æндæр паддзахадон зæрдæдарæнтæ дæттыны мадзæлттыл дæр.
РЦИ-Аланийы Сæргълæууæджы
æмæ Хицауады пресс-службæ
