Цæгат Ирыстоны Хицауады æмбырды ныхас кæнгæйæ, Хицауады Сæрдары хæдивæг — æнæниздзинад хъахъхъæнынады министр ГОДЖЫЦАТЫ Тамерлан куыд фехъусын кодта, афтæмæй Уæрæсейы Хицауады æвæрæнты фондæй нæ республикæйæн радих кæндзысты 247,2 милуан сомы.
— Æхца дæттынц коронавирусæй адæмы дзæбæх кæнынæн, стæй анестезиологийы, реаниматологийы, пульмонологи æмæ хæцгæнизты къабæзтæм гæсгæ рацарæзты фæрцы уæлæмхасæн уагæй кæй сарæзтой, уыцы дзæбæхгæнæндæттæ медицинон газтæй сифтонг кæнынæн, — загъта Годжыцайы-фырт.
Уæ зæрдыл уын лæууын кæнæм: амæй размæ куыд фехъусын кодтой, афтæмæй коронавирусæй рынчынты дзæбæхгæнæг медицинон кусджытæн уæлæмхасæн мызд бафидынæн федералон бюджетæй республикæйæн радих кæндзысты 94 милуан сомы.
