Цæгат Кавказы федералон зылды паддзахадон статистикæйы службæ куыд фехъусын кодта, афтæмæй 2020 азы фондз мæймæ Цæгат Ирыстоны хъæууонхæдзарадон продукцийы рауагъд, фароны уыцы æмгъуыдимæ абаргæйæ, 15,6 проценты фылдæр фæцис. Рауад 4,6 миллиард сомы аргъ.
Статистикты бæрæггæнæнтæм гæсгæ, æппæт хуызты хæдзарæдты стурвосы нымæц майы кæрон уыд 94,3 мин сæры, уый та у 5,6 проценты фылдæр, фаронимæ абаргæйæ. Зынгæ фæфылдæр хъæууонхæдзарадон продукци уæй кæныны бæрц дæр, уыдонимæ — маргъ, æйчытæ, дзидза.
Фыццæгæм июнмæ æппæт хуызты хæдзарæдтæ хоры æмæ хоры-хъæдуры уалдзыгæнды культуртæ байтыдтой 71,5 мин гектары, картоф — 4,1 мин гектары, гом зæххы халсартæ — 1,8 мин гектары. Халсартæ, фаронимæ абаргæйæ, 7,1 проценты фылдæр байтыдтой. Уалдзыгæнды иннæ культурты фæзуæттæ фæкъаддæр сты.
Нæ уацхæссæг
