Æнтæф бонты цы не ‘мбæлы

0
139

Иртæстыты фæрцы ахуыргæндтæ базыдтой, æнтæф рæстæг кæнын цы не ‘мбæлы, уый.

Уæлдæфы температурæ 71 градусы тæвдмæ куы схæццæ уа, уæд уый адæймаджы цардæн у тынг тæссаг — ахæм уавæры сахатæй фылдæр нæ ахæсдзæн. Зынтæй, фæлæ быхсæн ис 30-32 градусæн. Фæлæ уыдон дæр фаг сты, цæмæй дæ хур ныццæва, уымæн, кæнæ та, тæвд рæстæг адæймагæй хид иу литры бæрц æддæмæ кæй цæуы, уый аххосæй организм донхъуаг цæмæй æййафа кæнæ бынтондæр æнæ донæй баззайа, уымæн.

 

Дызæрдыггаг сатæг

Тæвд æмæ хус рæстæг уазал дæттæ нуазын нæ хъæуы, уый раиртæстой ахуыргæндтæ. Иртæстытæ куыд равдыстой, афтæмæй бæрзонд температурæты рæстæг организм тагъддæр æруазал уыдзæн, чи рафыхт, ахæм тæвд дон кæнæ цъæх цай адæймаг куы нуаза, уæд.

Иртæстыты цы дæс адæймаджы архайдтой, уыдонæй фараст кодтой тренировкæтæ велотренажертыл 75 минуты дæргъы, æмæ-иу тренировкæты размæ, стæй, цалынмæ сæ кодтой, уæдмæ æртæ хатты нуæзтой хъарм дон, йæ температурæ 10, 37 æмæ 50 градусы кæмæн уыд, ахæм. Уый фæстæ-иу сын прибортæ сбарстой сæ температурæ, организммæ туаггуыр цас фæхæццæ кæнæ æвзалытуаг газ адæймаг цас раулæфыд, уыдæттæ. Уымæй уæлдай, иртасджытæ сæ цæст дардтой уæлдæфы уавæрмæ дæр. Афтæмæй рабæрæг, уазал доны бæсты æнтæф рæстæг тæвд дон нуазын хуыздæр кæй у, уый. Йæ температурæ 50 градусы кæмæн у, ахæм дон адæймаджы хъарм кæны мидæгæй. Адæймаг хид кæнын райдайы, æмæ буар æруазал вæййы. Æрмæст, уæлдæфы уымæлад æгæр бæрзонд куы уа, æмæ адæймагыл синтетикон хъуымацæй дзаума куы уа, уæд тæвд дон ницы æххуыс у, уымæн æмæ уый хид æддæмæ нæ уадзы.

Афтæмæй, иртæстытæ равдыстой, æнтæф рæстæг хорз кæй у тæвд дæттæ нуазын, къофи нæ, фæлæ. Англисаг ахуыргæндтæ цы иртæстытæ сарæзтой, уыдон дзурæг сты, адæймаг бонмæ дыууæ — æртæ агуывзæйы къофи куы нуаза, уæд, уыргтæм цы туг цæуы, уымæн йæ бæрц зынгæ фæфылдæр вæййы. Уый аххосæй организм йæхимæ нал фæисы натрий, æмæ адæймаг уазæгдонмæ арæхдæр цæуын райдайы.

Бæрзонд температурæйæ, адæймаг хид кæй кæны, уазæгдонмæ арæхдæр кæй цæуы, уыдæтты аххосæй организм донцух тагъддæр кæны. Адæймагмæ цæуы ноджы фылдæр нуазын, æмæ, къофи цас фылдæр нуаза, уый бæрц организмы фылдæр кæны кофеины бæрц, афтæмæй уыргтыл æвæрд цæуы фылдæр уаргъ.

Адæймаг къофи фондз — æхсæз агуывзæйæ фылдæр куы нуаза бонмæ, уæд ын тæссаг у зæрдæ æмæ дадзинты низтæй. Уымæ гæсгæ ахуыргæндтæ амонынц, тæвд рæстæг къофи кæнæ æппындæр нæ нуазын, кæнæ та йын йæ бæрц бынтон фæкъаддæр кæнын. Зæрдæ æмæ дадзинты системæ тæвд рæстæг æнæуи дæр æвзары зындзинæдтæ, къофи та йæ ахæм уавæрты бынтондæр мары. Уымæй уæлдай, ис æндæр бæрæггæнæнтæ дæр, æмæ, куыд амонынц, афтæмæй, тæвд къофи нуазын чи уарзы, уыдонæн тæссаг у, ласæггаджы онкологи сæм куы фæзына, уымæй.

 

Сæлдæгæй риссы сæр

Сæлдæгæн йæ бирæ хæрын пайда нæу. Тæвд рæстæг ихын адджинаг организм не ‘руазал кæндзæн, уымæн æмæ дзы калоритæ æгæр бирæ ис. Уыдон кусгæйæ, организм æддæмæ дæтты хъарм. Афтæмæй буар куыд хъуамæ æруазал уа?

Уымæй уæлдай, ахуыргæндтæ куыд раиртæстой, афтæмæй, сæлдæг тагъд-тагъд хæргæйæ, тæссаг у, сæр æваст куы срисса, уымæй, уæлдайдæр, тæвд рæстæг.

 

Вентилятор ницы æххуыс у

Ныртæккæ бирæтæ æвæрынц кондиционертæ. Фæлæ, аллергия кæй тыхсын кæны, æмæ йæ иммунитет лæмæгъ кæмæн у, уыцы адæймæгтæн кондиционертæ нæ бæззынц, уæлдайдæр, афоныл сыгъдæггонд куы нæ цæуой, уæд. Уыдон сын риссын кæнынц сæ сæртæ, æмæ адæймаг бынтондæр слæмæгъ вæййы. Уымæ гæсгæ кондиционерты бæсты иуæй-иутæ равзарынц вентилятор. Фæлæ уый дæр бирæ хуыздæр нæу, зæгъынц ахуыргæндтæ.

Вентилятортæ уæлдæф нæ уазал кæнынц, æрмæст æй иу уатæй иннæмæ ратæр-батæр кæнынц. Уæлдæфы температурæ тынг бæрзонд куы нæ уа, уæд ма ницы кæны — вентилятортæ адæймагæн йæ хид сур уæддæр кæнынц. Фæлæ уæлдæфы температурæ 35 градусы æмæ уымæй бæрзонддæр куы уа, уæд вентилятор буары тæвд кæны ноджы бæрзонддæр.

Уымæй уæлдай, специалисттæ куыд амонынц, афтæмæй æнтæф рæстæджы рудзгуытæ хъæуы æхгæдæй дарын. Дыууæрдыгæй дымгæ ахъаз у, уæлдæфы температурæ тынг бæрзонд куы нæ вæййы, уæд. Æнтæф рæстæг та рудзынгæмбæрзæнтæ хъæуы сæхгæнын æмæ æруадзын жалюзитæ, уымæн æмæ, хуры тынтæ уатмæ цас къаддæр хæццæ кæной, уый бæрц дзы уыдзæн сатæгдæр.

ОСТАВЬТЕ ОТВЕТ

Please enter your comment!
Please enter your name here