Ацы бонты Цæгат Ирыстоны кусæг балцы уыд Уæрæсейы юстицийы министры хæдивæг Алу АЛХАНОВ. Республикæйы уазæгимæ фембæлд РЦИ-Аланийы Сæргълæууæг БИТАРТЫ Вячеслав. Ныхасы архайджытæ бæстон æркастысты УФ-йы Юстицийы министрады регионалон управленийы æнæкъуыхцы куысты фарстытæм.
Фембæлды райдайæны Алу Алханов Цæгат Ирыстоны разамындæн арфæ ракодта, министрады республикон управленийы архайдмæ иудадзыг бæстон цæстдард кæй ис, уый тыххæй. Зæгъæм, Битарты Вячеславы архайды фæрцы лыггонд æрцыд управленийæн хуыздæр бæстыхай радих кæныны фарст. Уым ныртæккæ цæуы бындурон цалцæг, кæнынц дзы алфамбылай фæлгонцадон куыстытæ дæр. Азы кæронмæ Цæгат Ирыстоны Юстицийы управленийы коллектив хъуамæ кусын райдайа бындуронæй цалцæггонд уæрæхдæр бæстыхайы.
Алу Алханов республикæйы Сæргълæууæгæн куыд фехъусын кодта, афтæмæй УФ-йы юстицийы министр Константин Чуйченкойы амынддзинадмæ гæсгæ, Дзæуджыхъæуы байгом уыдзæн тæрхонадон экспертизæйы нырыккон лаборатори.
— Зонын æй, ацы фарст республикæйы юстицийы къабазæн ахсджиаг кæй у, уый. Республикæйы абоны онг нæма ис бынæттон тæрхонадон лаборатори. Æмæ бахъуаджы сахат иртасинаг æрмæджытæ æрвитын бахъæуы Дагестан æмæ Стъараполы краймæ. Кæй зæгъын æй хъæуы, Цæгат Ирыстоны ахæм лаборатори куы байгом уа, уæд алыхуызон тæрхонадон иртæстытæ æмæ экспертизæтæ æххæст кæныны рæстæг зынгæ фæцыбырдæр уыдзæн. Куыд нысангонд цæуы, афтæмæй хæстæгдæр аз лабораторийы арæзтад райдайдзæн, — загъта федералон министры хæдивæг.
Лабораторийы арæзтад, стæй федералон министрады иннæ хъæппæристæ хорзыл банымайгæйæ, Битарты Вячеслав куыд фæнысан кодта, афтæмæй æппæтвæрсыг æххуыс уыдзæн уыцы проекттæн.
— Махæн æхсызгон у, Юстицийы федералон министрадимæ æмархайд æнгомдæр кæй кæны, уый. Федералон ведомствæйы рæдау æххуыс алкæддæр æнкъарæм, стæй нæхицæй цы аразгæ у, уыцы хъуыддæгтæ дæр афойнадыл араздзыстæм, цæмæй республикæйы юстицийы къабаз æнаипп куыст кæна, — бафиппайдта Битары-фырт.
Фембæлды архайджытæ æркастысты æндæр фарстытæм дæр.
РЦИ-Аланийы
Сæргълæууæджы æмæ Хицауады пресс-службæ
