Алы мæй дæр, — уæлдайдæр, афæдзы æмбис куы ахицæн вæййы, уæд, — Уæрæсейы сæ тыхы бацæуынц адæмы цардимæ баст ног закъонтæ кæнæ закъонæвæрынадон ивддзинæдтæ. Афтæ у ныр дæр июлæй райдайгæйæ.
Æххуыс — сывæллонджын бинонтæн
2004 азы майæ 2020 азы июны онг цы сывæллæттæ райгуырд, уыдонæй алкæмæн дæр паддзахад иухаттон æххуыс кæны 10 мин сомы. Уыимæ, коронавирусы уавæримæ баст рæстæгæн пособи ныййарджытæ ныридæгæн кæд райстой, уæд сæ ацы хатт гæххæттытæ æмбырд кæнын нал хъæуы. Цæгат Ирыстоны ахæм æххуыс июлы райсдзысты 70 мин бинонтæй фылдæр, кæнæ та 116 497 сывæллоны.
Хъалонтæ…
2020 азы 1 июлæй фæстæмæ Уæрæсейы регионтæн фæзынд бар, цæмæй сæ алчи йæхимæ гæсгæ сфидар кæна, хицæн амалхъомтæ кæй хъуамæ фидой, ахæм хъалон. Абоны бонмæ амалхъомтæ сæ профессионалон æфтиагæй хъалон фыстой æрмæстдæр нæ бæстæйы 23 регионы, уыимæ, хъалон фидыны ацы æгъдау уыцы регионты уыд фæлварæны хуызы. 19 регионы та хъалон уыд æнæмæнг фидгæ, ацы аз куы райдыдта, уæдæй фæстæмæ. Ныр алы регион дæр фарст лыг кæндзæн йæхæдæг.
Фæлладуадзæн рæстæг райдыдта
1 июлæй официалон æгъдауæй Уæрæсейы кусын райдыдта туризмы къабаз. Фæллад суадзынæн гæнæнтæ арæзт æрцыд Уæрæсейы 67 регионы. Зæгъæм, ныридæгæн дæр Краснодары краймæ улæфынмæ ис сæрибарæй ацæуæн — адæмæй нæ домынц нæдæр справкæтæ, нæдæр сын обсервацийы иуцасдæр рæстæг æрвитын кæнынц. Æрмæст фæлладуадзæн рæстæг рохгæнинаг не сты низæй хи бахъахъхъæныны мадзæлттæ. Раст зæгъын хъæуы, денджызы был цы ирхæфсæн гæнæнтæ ис, уыдон дæр се ‘ппæт нæма кусынц. Уæдæ маскæтæ дарыны фæтк дæр нырма ис йæ тыхы.
1 сентябры — скъоламæ
Ахуыры аз райдайдзæн 1 сентябры, æмæ, алкæддæр куыд уыд, афтæ ацы хатт дæр сывæллæттæ бахиздзысты се скъолаты къæсæртыл. Ахуыргæнджытæ æмæ скъоладзаутæ кæрæдзи тынг мысынц æмæ сæхи цæттæ кæнынц ног ахуыры азмæ. Фæлæ, коронавирус кæй расайдта, уыцы эпидемиологон уавæр хынцгæйæ, низæй бахъахъхъæныны мадзæлттæ фæкарздæр уыдзысты. Ног уавæрты ахуырадон процесс æнæкъуылымпытæй цæмæй цæуа, уымæн ныридæгæн специалисттæ бацæттæ кодтой сæрмагонд амынддзинæдтæ.
Инвалидтæн — æнцондæр фадæттæ
Цы бафыстытæ сын æмбæлы, уый райсыны тыххæй инвалидты нал хъæудзæн се справкæтимæ Пенсион фондмæ цæуын.
Уымæй уæлдай, «Инвалидты социалон æгъдауæй бахъахъхъæныны тыххæй» закъонмæ цы ивддзинæдтæ хаст æрцыд, уыдон ахъаз уыдзысты, машинæ чи скъæры, уыцы инвалидтæн. Ивддзинæдтæ сæ тыхы кæй бацыдысты, уымæ гæсгæ, машинæтæн æрлæууæн бынæттæ кæмдæриддæр ис, алы ран дæр уыдзæн æппынкъаддæр иу бынат, инвалид-шофыр дзы йæ машинæ цæмæй сæвæра, уымæн.
Хæрзхъæддзинадмæ — ноджы бæрнондæрæй
1 июлæй фæстæмæ æппæт хостыл, тамакотæ æмæ къахыдарæсыл æвæрд цæудзæг сæ хæрзхъæддзинадыл дзурæг нымæцтæ æмæ дамгъæтæй арæзт æмбæлгæ нысан. Товар кæнæ хостæ уадзæн компанитæн, æрвитæг компанитæн, æлхæнæг компанитæн, базарады æппæт хуызтыл сæ парахат чи кæны, уыдонæн ахæм нысан æвæрын уыдзæн æнæмæнг æххæстгæнгæ хъуыддаг.
Ахæм æмбæлгæ нысан æвæрд цыд нырмæ дæр, æрмæст абоны бонмæ хъуыддагмæ каст цыд фæлварæны хуызы, æмæ æнæмæнг æххæстгæнгæ нæ уыд.
Домæнтæ, машинæ чи скъæры, уыдонмæ
Машинæ чи скъæры, стæй, шофыры æвдисæндар райсыны фæнд чи кæны, уыдонмæ медицинон æгъдауæй каст цæудзæн ноджы карздæрæй. Нырмæ сæ цы домдтой, уымæй уæлдай сæ ныр 1 июлæй фæстæмæ хъæудзæн уæлæмхасæн бæрæггæнæнтæ бавдисын, зæгъæм, психоактивон буаргъæдтæ сæ анализты ис æви нæй, туджы уæрæхдæргонд æмæ ноджы бæстондæр анализ æмæ æндæртæ.
