Мыхуырӕй рацыд ЦИПУ-йы ирон филологийы факультеты ирон литературӕйы кафедрӕйы кусӕг, филологон наукӕты кандидат, доцент Хозиты Идӕйы монографион иртасӕн куыст «Беджызаты Чермены аивадон сфӕлдыстад 20-ӕм ӕнусы 30-ӕм азты ирон прозӕйы рӕзты контексты».
Чиныг арӕзт у ӕртӕ хайӕ: «Адӕмы социалон-историон уӕвынад ӕмӕ фӕткӕвӕрды проблемӕтӕ Беджызаты Чермены прозӕйы («Мӕсгуытӕ дзурынц»)», «Ног ӕцӕгдзинад Беджызаты Чермены аивадон интерпретацийы», «Ног ӕцӕгдзинады фӕткӕвӕрды идеалты национ хӕдхуыз Беджызаты Чермены очерктӕ ӕмӕ радзырдты».
Мӕнӕ цы зӕгъы автор чиныджы разныхасы: «Беджызаты Чермены аивадон сфӕлдыстад (1898-1937) у 20-ӕм ӕнусы 30-ӕм азты ирон прозӕйы амад хай. Йӕ гуманистон райдианимӕ ӕнӕ фӕхицӕнгӕнгӕ баст уӕвгӕйӕ, уый лыг кодта йӕ дуджы вазыгджын фарстытӕ. Адӕмы цард ӕвдисын йӕ историйы тӕккӕ ӕндыгъддӕр рӕстӕджыты — уый у фыссӕджы сфӕлдыстады сӕйрагдӕр миниуджытӕй иу. Фӕлӕ адӕмы иумӕйаг фӕлгонцы ӕмрӕнхъ Чермены прозӕйы хъайтар сси йӕ хуыздӕр миниуджытӕ ӕвдисӕг, кусӕг дзыллӕты сӕрибардзинадыл тохгӕнӕг гоймаг. Уымӕ прозаик ӕрцыд бӕлвырд историон уавӕрмӕ гӕсгӕ. Адӕймаджы ӕвдисы йӕ царды ӕппӕт ахастдзинӕдтимӕ, адӕмы хъысмӕтимӕ бастӕй бӕстӕйы истори, ивгъуыдимӕ. Ӕвдисы йын, йӕ удыхъӕды рӕзт. Беджызаты Чермены аивадон сфӕлдыстады ӕвдыст ӕрцыд ног ӕцӕгдзинад уӕрӕх эпикон формӕйы ӕмӕ йе ‘мдугонӕн равдыста ӕххӕст хуызы йӕ миддуне, йе ‘ддагон ахастдзинӕдтӕ.
Беджызаты Чермены ирд фӕлгонц йӕхимӕ раздӕхта словакиаг прозаик Петер Илемницкийы ӕмӕ сси йӕ роман «Хъыбыллӕ нӕхимидӕг»-ы персонажтӕй иу.
Беджызаты Чермены хӕдхуыз сфӕлдыстады ссардтой сӕ диалектикон иудзинад, аивадон фӕлгонц, Ирыстоны ивгъуыд ӕмӕ абон. Фыссӕджы цард трагикон хуызы аскъуыд хъысмӕтлыггӕнӕн рӕстӕджы, фӕлӕ йӕ литературон бынтӕ систы йӕ адӕмы национ исбон.
Алы ирд иртасӕн куыстӕн дӕр йӕ ратӕдзӕн суадон сты кӕронбӕттӕн хатдзӕгтӕ. Мӕнӕ цы фыссы автор йӕ кӕронбӕттӕн ныхасы: «Прозаикы хъусдарды астӕу ис, сӕрмагонд социалон-политикон уавӕрты чи сырӕзт, ахӕм адӕймаг. Беджызаты Чермен фӕткон, этикон ӕмӕ эстетиконы ӕууӕлтӕ иртасгӕйӕ, ӕххӕст кӕны сфӕлдыстадон хӕслӕвӕрдтӕ. Уыдон та ахъаз сты йе сфӕлдыстад аивадон хуызы иртасынӕн. Уый, фыццаджыдӕр, ӕвдыст цӕуы авторы фӕлгонцты системӕты — революцийы, граждайнаг хӕсты, хуссайраг ирӕтты геноциды тыххӕй фыст уацмысты, фӕткон-этикон категориты. Дыккаджы, ӕвдисы героикон, трагикон райдиантӕ, ӕртыккаджы, ивгъуыд ӕмӕ фидӕн иртасы арф психологон хуызы. Цыппӕрӕмы, аивадон фӕлгонцтӕ ӕмӕ характеры лыг кӕны адӕмон ӕгъдӕутты проблемӕ. Фӕндзӕм, йӕ прозаикон сфӕлдыстады героиконыл дзургӕйӕ, ӕргом кӕны традициты ӕмӕ ӕгъдӕутты диалектикӕ. Ӕхсӕзӕм, бӕрӕг-бӕлвырдӕй хицӕн кӕны йӕ персонажты моралон архайд ног ӕхсӕнадон ахастдзинӕдтӕ сфидар кӕныны хъуыддаджы. Ӕвдӕм, адӕмы ӕвдисы бӕрзонд фӕткон-этикон миниуджытӕ хӕссӕгӕй.
Беджызаты Чермен ирон литературӕмӕ ӕрбацыд ӕхсӕнады стыр рацарӕзты дуджы ӕмӕ йӕ прозӕйы фидар кодта ног ӕцӕгдзинады фӕлдисӕджы характер. Йӕ аивадон системӕ та здӕхт у ахӕм хъайтармӕ, кӕцы цард арӕзта, цин кодта адӕмы ног ахастдзинӕдтыл, фылдӕр кодта бӕстӕйы материалон ӕмӕ удварны хъӕздыгдзинад. Ардыгӕй цӕуы йӕ аивадон прозаикон уацмысты сӕйраг персонажты разӕнгарддзинад. Ӕппӕт уыдӕттӕй хицӕн кӕны Беджызаты Чермены хӕдбындур прозӕ, йе сфӕлдыстадон ӕрмдзӕф. Йӕ уацауты, радзырдты, ӕмӕ очеркты хуыздӕр фӕлгонцтӕ хицӕн кӕнынц психологон хуызы сӕ дӕсны ӕвдисынӕй, ис сӕ мидӕггаг динамизм. Уыдон сты ӕнӕфӕлхатгӕнгӕ адӕймаджы характертӕ, ӕвдыст ӕрцыдысты дзаг ӕнкъарӕнтӕ ӕмӕ хъуыдытӕй, сты вазыгджын ӕмӕ ныхмӕвӕрд».
Чиныджы наукон редактор у, филологон наукӕты доктор, профессор, Цӕгат Ирыстоны гуманитарон ӕмӕ социалон иртасӕнты институты наукон кусӕг, фольклор ӕмӕ литературӕйы хайады сӕйраг наукон кусӕг Фидараты Риммӕ, рецензенттӕ: филологон наукӕты доктор, гуманитарон ӕмӕ социалон иртасӕнты институты ирон ӕвзагзонынады хайады наукон кусӕг Гуӕцӕлты Ларисӕ, филологон наукӕты кандидат, газет «Северная Осетия»-йы сӕйраг редактор Битарты Маринӕ.
Хозиты Идӕйы монографион иртасӕн куыст нӕ курдиатджындӕр прозаиктӕй иу Беджызаты Чермены аивадон сфӕлдыстадыл стыр ахъаз фӕуыдзӕн ахуыргӕндтӕн — филологтӕн, аспиранттӕн, магистранттӕн ӕмӕ ирон филологийы факультетты студенттӕн.
Абайты Эдуард
