Сырх Стъалы æмæ Хъæбатырдзинады орденты кавалер Эдуард Тиникашвилийы номхæссæг Бæлтайы астæуккаг скъола сбæрæг кодта йæ юбилей – ахуыргæнæндоныл сæххæст 100 азы.
Уыцы рæсугъд бæрæгбоны фæдыл скъолайы коллектив æмæ йæ ахуырдзаутæн арфæ ракæнынмæ æрбацыд РЦИ-Аланийы Парламенты Сæрдар Тускъаты Таймураз. Йемæ ма уыдысты Парламенты социалон политикæ, æнæниздзинад хъахъхъæнынад æмæ ветеранты хъуыддæгты фæдыл комитеты сæрдар Реуазты Ларисæ, республикæйы ахуырад æмæ наукæйы министры хæстæ рæстæгмæ æххæстгæнæг Андрей Швецов, горæт Дзæуджыхъæуы Минæвæртты æмбырды сæргълæууæг Таболты Сергей, æхсæнадон организациты минæвæрттæ æмæ, кæй зæгъын æй хъæуы, скъолайы алы азты рауагъдонтæ.
Бæлтайы скъола байгом 1926 азы, кæддæр паддзахæн йæ бæхтæ кæм дардтой, уыцы бæстыхайы, æмæ уыд райдиан скъола. 1937 азы ссис авдазыккон скъола. Æмæ æрмæстдæр 1964 азæй фæстæмæ ссис 10-азыккон скъола. Абоны бон дзы ахуыр кæнынц канд Бæлтайы сывæллæттæ нæ, фæлæ йæм цæуынц алыварс цæрæнбынæттæй – Цыми, Ларс æмæ суанг Дзæуджыхъæуæй.
Скъолайы истори æнгом баст у, алы азты, алы рæстæджыты йæ сæргъы чи уыд, уыцы директорты нæмттимæ: карз 1942 азы скъолайы сæргъы уыд Николай Матюшкин, хæсты фæстæ азты та – Таматы Хавæ. Дарддæр йæ директортæ уыдысты Цопанты Барис, Нателла Бутзузи… Абон та скъолайæн разамынд дæтты Емзари Карелидзе.
Бæлтайы скъола сæрыстыр у йæ рауагъдонтæй æмæ, йæ цард сывæллæтты ахуырад æмæ хъомыладæн чи снывонд кодта, уыцы педагогтæй.
2015 азы Уæрæсейы Федерацийы Президенты Указæй скъолайæн раттой гвардийы дæлбулкъон Эдуард Тиникашвилийы ном. Эдуард уыд Сырх Стъалы æмæ Хъæбатырдзинады орденты кавалер, йæ рæстæджы хæцыд Афганистаны æмæ фæмард 1996 азы Галашкийы хъæуы бын уæззау хæсты. Йæ цард ратта, фæлæ аирвæзын кодта 32 хæстон лæппуйы.
Скъолайы 100 азы бæрæгбон баиу кодта, ацы ахуыргæнæндон йæ райгуырæн бынатыл чи нымайы, æппæт уыцы адæймæгты.
Сæ бæрæгбоны фæдыл сын йæхи æмæ Парламенты депутатты номæй арфæ ракодта Тускъаты Таймураз.
– Абоны юбилей бæрæгбон у Бæлтайы цæрæг алы бинонтæн, стæй æнæхъæн хъæуæн дæр. Уый у, скъолайы зонындзинæдты фæрцы цардмæ размæ чи рацыд æмæ сæ фæллойæ республикæйы райрæзтмæ аккаг бавæрæн чи бахаста, бирæ уыцы адæймæгты бæрæгбон, – загъта Парламенты Сæрдар.
Тускъаты Таймураз куыд бафиппайдта, афтæмæй республикæйы истори æмæ ахуырады къабазы райрæзты истори сты æнгом баст: скъола уыд Ирыстоны промышленнон æмæ культурон рæзты бындур. Дарддæр йæ ныхас уыд ахуыргæнджытæм.
– Уæ арф профессионалон зонындзинæдтæ æмæ хъуыддагмæ бæрнон цæстæнгасы фæрцы сымах хъомыл кæнут аккаг фæлтæр, йæ райгуырæн зæхх чи уарзы, ахæм кæстæрты. Нæ адæм иумæ арæзтой нæ Райгуырæн бæстæ, иумæ йæ хъахъхъæдтой, йæ къæхтыл æй ногæй слæууын кодтой, сарæзтой, æппæт дунейы дæр раззагдæр чи уыд, ахуырады, æнæниздзинад хъахъхъæнынады, культурæйы ахæм системæтæ. Адæмты иудзинад дарддæр дæр уыдзæн нæ фидæны æнтыстыты рахæцæн, – загъта Тускъаты Таймураз.
Цæгат Ирыстоны ахуырады къабазы кæй фесгуыхтысты, стæй бирæ азты дæргъы æнæзæрдæхудт фæллой кæй фæкодтой æмæ сæ равзæрст дæсныйадыл сæ зæрдæ кæй нæ сивтой, уый тыххæй Тускъаты Таймураз РЦИ-Аланийы Парламенты Кады гæххæттытæ ратта ахуыргæнджытæ Иринæ Павлиашвили æмæ Гæбæраты Мананæйæн. Арфæйы ныхæстимæ та Парламенты Сæрдар хæрзиуæг ратта, йæ педагогон фæллой 58 азы кæмæн у, уыцы ахуыргæнæг – Гаджиты Светланæйæн.
ДЕДЕГКАТЫ Зæлинæ
