«Азери»-йы юбилей

0
87

Цӕгат Ирыстоны азербайджайнаг национ-культурон ӕхсӕнад «Азери» бӕрӕг кӕны йӕ 30-азон юбилей. Фондзсӕдӕ адӕймаджы чи иу кӕны, уыцы ӕхсӕнад зӕрдиагӕй архайы нӕ республикӕйы ӕхсӕнадон-политикон ӕмӕ экономикон царды.

— Ӕртын азы размӕ сӕвзӕрд не ‘хсӕнад «Азери». Зын рӕстӕг уыд, ӕмӕ адӕм кӕрӕдзийӕн баххуыс кӕныныл архайдтой. Нӕ республикӕйы цӕрӕг иннӕ адӕмыхӕттытӕ дӕр национ ӕхсӕнадтӕ арӕзтой. Фараст организацийы нӕм фӕзынд. Баиу уӕвыны фӕнд скодтам, ӕмӕ афтӕмӕй фӕзынд нӕ республикӕйы адӕмыхӕттыты иумӕйаг змӕлд «Нӕ Ирыстон». Уыцы рӕстӕг ацы змӕлдӕн уыд стыр ахадындзинад. Ахӕм змӕлдтытӕ бӕстӕйы ӕндӕр регионты нӕ уыд. «Нӕ Ирыстон» кодта пайдайаг куыст. Ныртӕккӕ нӕм национ-культурон ӕхсӕнадтӕ ис цыппоры бӕрц ӕмӕ кӕрӕдзиимӕ хӕларӕй цӕрынц. Алы организаци дӕр хӕдбарӕй архайы, — загъта Цӕгат Ирыстоны Парламенты национ ахастдзинӕдтӕ ӕмӕ фӕсивӕды хъуыддӕгты комитеты сӕрдары хӕдивӕг Фуад Кязымов.

Йӕ ныхасмӕ гӕсгӕ, нӕуӕдзӕм ӕмӕ дыууӕминӕм азты райдайӕны, адӕмыхӕттыты ӕхсӕн гӕрзифтонг быцӕуты рӕстӕг, «Нӕ Ирыстон»-ы ахадындзинад уӕлдай тынгдӕр разынд. Цӕмӕй быцӕугӕнджытӕ кӕрӕдзиимӕ бафидауой, уымӕн национ ӕхсӕнадтӕ ӕххуыс кодтой.

— Ныртӕккӕ национ ӕхсӕнадтӕн национ хӕдхуыздзинад ӕмӕ мадӕлон ӕвзаг бахъахъхъӕнын ӕнцон нӕу. Ӕппӕтдунеон фӕзындтыты аххосӕй адӕмыхӕттыты хицӕндзинӕдтӕ фесӕфынц. Сӕвзӕрынц алыхуызон адӕмыхӕттыты иумӕйаг къайадтӕ. Ацы ӕууӕл иуӕрдыгӕй адӕмыхӕттыты ӕхсӕн ахастдзинӕдтӕ фидар кӕны, иннӕрдыгӕй та национ хӕдхуыздзинад сафы, — зӕгъы депутат.

Нӕ республикӕ архайы азербайджайнаг ӕвзаг парахат кӕныныл. Уыцы хъуыддаджы йын ӕххуыс кӕны Цӕгат Ирыстоны паддзахадон университет. Ацы аз дзы байгом фӕсарӕйнаг бӕстӕзонӕн магистерон программӕ.

— Цӕмӕй адӕмыхӕттытӕ рӕзой, уымӕн Цӕгат Ирыстоны арӕзт ӕрцыд ӕппӕт фадӕттӕ дӕр. Ирыстон нымайӕм нӕ дыккаг райгуырӕн бӕстӕйыл (Бакуйы цӕрӕг мингай ирӕттӕ дӕр Азербайджанӕй афтӕ зӕгъынц). Азербайджайнӕгтӕ ӕмӕ ирӕттӕ рагӕй дӕр иумӕ хӕларӕй цӕрынц. Ирон интеллигенцийы минӕвӕрттӕй бирӕтӕ райгуырдысты Азербайджаны, азербайджайнаг ахуыргӕндтӕй бирӕтӕ та райгуырдысты Ирыстоны. Нӕ бастдзинӕдтӕ дарддӕр рӕзынц, — загъта Фуад Кязымов.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here