Знон сӕрмагонд информацион проект “ӕргом Хицауад”-ы фӕлгӕты республикӕйы дзыллон информацийы фӕрӕзты минӕвӕрттимӕ фембӕлд Цӕгат Ирыстоны физикон культурӕ ӕмӕ спорты министр Хуыгаты Алан.
Министр бӕстон радзырдта Ирыстоны спорт ӕмӕ физикон культурӕйы дарддӕры райрӕзты нысанты тыххӕй, стӕй дзуаппытӕ радта журналистты бирӕ фарстытӕн.
Министр ӕмӕ журналистты ‘хсӕн сахат ӕмӕ ‘рдӕджы дӕргъы цыд ӕргом ныхас. Хуыгаты Алан министрӕй кусы иу аз. Уыцы рӕстӕг Ирыстоны спортивон царды цы ‘рцыд, куыд ӕмӕ цӕмӕй райдыдта йӕ куыст, цавӕр зын лыггӕнӕн фарстытимӕ сӕмбӕлд, уыцы фарстытӕн Алан радта ӕргом дзуаппытӕ.
Журналистты фӕндыд базонын, тагъд рӕстӕджы гомгонд чи ‘рцӕудзӕн, уыцы футболы академимӕ хъомылгӕнинӕгты куыд ӕвзӕрстой, цавӕр уавӕртӕ сын арӕзт ӕрцыд цӕрынӕн, футболӕй хъазынӕн, скъолайы ахуыр кӕнынӕн ӕмӕ уыцы ӕппӕт хорз уавӕртӕ кӕй фӕрцы арӕзт сты? Хуыгаты Алан бахахх кодта, уыцы хъуыддагмӕ нӕ республикӕйы Сӕргълӕууӕг Битарты Вячеслав цы стыр ӕвӕрӕн бахаста, уый.
Нӕ республикӕйы сӕйраг стадион «Спартак»-ы арӕзтад куыд цӕуы, ӕмӕ нӕ командӕ «Алани» йӕхи стадионы кӕд райдайдзӕн хъазын? Уыцы фарстӕн та министр радта ахӕм дзуапп: «ӕз уын зӕрдӕ ӕвӕрын, 13 сентябры «Алани» йӕхи стадионы йӕ радон хъазт кӕй акӕндзӕн, уымӕй. Кӕй зӕгъын ӕй хъӕуы, стадионы ма кусинӕгтӕ уый фӕстӕ дӕр уыдзӕн, фӕлӕ хъазӕн фӕз ӕмӕ электрон фӕйнӕг уӕдмӕ уыдзысты цӕттӕ. Бынӕттӕ дӕр цӕттӕ уыдзысты, ныгуылӕны ‘рдыгӕй цы трибунӕ ис, уым. Хъыгагӕн, нырма стадионмӕ бирӕ футболуарзджыты нӕ уадздзысты, фӕлӕ дзы чи уа, уыдонӕн ӕвзӕр уавӕртӕ нӕ уыдзӕн».
7-11 октябры Дзӕуджыхъӕуы уӕгъдибар хъӕбысхӕстӕй Уӕрӕсейы чемпионат цавӕр уавӕрты цӕудзӕн, уый тыххӕй Алан загъта: «Мах нӕ зӕронд галуан «Манеж» уӕдмӕ алцӕмӕй дӕр баифтонг кӕндзыстӕм. Бацархайдзыстӕм, цӕмӕй спортсментӕ, тӕрхонгӕнджытӕ ӕмӕ уазджытӕн уа хорз уавӕртӕ. Уыцы куыстытӕ кӕнын райдыдтам. Уым дӕр ерыстӕ ӕнӕ спортуарзджытӕй аразгӕ куы ‘рцӕуой, уымӕй тӕссаг у. Уый та аразгӕ уыдзӕн, ныронг нӕ чи хъыгдары, уыцы хӕцгӕ низ йӕхи куыд дардзӕн, уымӕй».
Дзӕуджыхъӕуы ӕмӕ республикӕйы районты цӕмӕй фылдӕр спортивон фӕзтӕ ӕмӕ залтӕ уа, ууыл цавӕр куыст цӕуы? Уыцы фарстӕн дзуапп дӕтгӕйӕ, Алан радзырдта, Уӕрӕсейы хицауадон программӕмӕ гӕсгӕ цытӕ арӕзт цӕуы ӕмӕ цӕудзӕн, уыдоны тыххӕй: «Нӕ зӕрды ис фидӕны Дзӕуджыхъӕуы сӕрмагонд футболон стадион саразын. Уымӕй уӕлдай ма ныртӕккӕ куыст цӕуы бирӕвӕрсыг Спортивон галуаны проектыл дӕр. Уый хъуамӕ аразын райдайӕм иннӕ аз. Уӕдӕ нӕ хъӕууон районты дӕр арӕзт цӕуынц спортивон-хиирхӕфсӕн фӕзтӕ. Ӕрыдоны та аразӕм бирӕвӕрсыг Спортивон галуан. Нӕ къухтӕ нырма нӕма ӕххӕссынц ног Ихын галуан саразынмӕ, фӕлӕ уый проектыл дӕр кусӕм. Фӕнды нӕ, нӕ республикӕйы фылдӕр ленкгӕнӕн бассейнтӕ куы фӕзынид, уый дӕр. Ӕнӕмӕнг, уыдон хъӕугӕ хъуыддӕгтӕ сты, ӕмӕ архайдзыстӕм сӕ саразыныл. Ног спортивон фӕзтӕ ӕмӕ бӕстыхӕйттӕ саразынмӕ нын хъуамӕ фадат фӕуа 2021-2025 азты федералон программӕйы фӕрцы».
Йӕ ныхасы кӕрон Алан куыд загъта, афтӕмӕй фӕсивӕдимӕ хъомыладон фарстытӕ цӕмӕй хуыздӕр лыггонд цӕуой, уый тыххӕй фылдӕр араздзысты ӕрыгӕттимӕ зындгонд спортсментӕ ӕмӕ тренерты фембӕлдтытӕ.
Баскаты Уырызмӕг
