Ирыстон, ирон адӕм Райгуырӕн бӕстӕйӕн цы дӕсгай сгуыхт лӕгтӕ — Советон Цӕдисы Хъӕбатыртӕ — радта, уыдоны ӕмсӕр сты Намысы ордены 12 ӕххӕст кавалеры. Уыдонӕй иу у Уӕллагкомы хъӕутӕй иу — Гӕлиатӕй рацӕуӕг Хъалаты Дзаджейы фырт Симон (Семен).
1941 азы октябры Хъалайы-фыртмӕ ӕрсидтысты Сырх ӕфсады рӕнхъытӕм. Иунӕг мӕймӕ минометӕй ӕхсын афтӕ хорз базыдта, ӕмӕ йыл йӕ командиртӕ дис кодтой. Уыцы аз 11 ноябрӕй фӕстӕмӕ Симон архайдта тугкалӕн хӕсты, ӕвдыста иу сгуыхтдзинад иннӕйы фӕдыл. 1944 азы сусӕны мӕйы райдайӕны не ‘фсӕдты бахизын хъуыд цӕугӕдон Ныгуылӕн Двинайы сӕрты. Ам Хъалаты хӕстон цы лӕгдзинад равдыста, уый тыххӕй йын хӕрзиуӕг радтыны фӕдыл гӕххӕтты фыст ис: «Командир расчета первой минометной роты гвардии старший сержант Калаев быстро и организованно переправил расчет, материальную часть и боеприпасы при форсировании Западной Двины. При артналете оперативно, без потерь вывел расчет из-под огня».
Ацы сгуыхтдзинады тыххӕй минометон расчеты арӕхстджын командирӕн лӕвӕрд ӕрцыд Намысы ордены ӕртыккаг къӕпхӕн.
1944 азы 18 августы Латвийы зӕххыл хъӕу Стайсткальнейыл тохы Хъалайы-фырты расчет ныддӕрӕн кодта знаджы минометон батарейы ӕхсӕнгӕрзтӕ: ӕртӕ къухӕйхӕсгӕ ӕмӕ дыууӕ тӕрхджын пулеметы ӕд адӕм, танкты ныхмӕ тохгӕнӕн иу сармадзан, скуынӕг кодта 12 немыцаг салдаты. Уымӕй нӕ фистӕгӕфсӕддонтӕн радта размӕ цӕуыны фадат. 6-ӕм гвардион ӕфсады командыгӕнынады бардзырдӕй 1944 азы 22 октябры хистӕр сержант Хъалайы-фырт хорзӕхджын ӕрцыд Намысы ордены дыккаг къӕпхӕнӕй. Гӕлиатаг сӕрӕнгуырд ӕртыккаг хатт фесгуыхт 1944 азы декабры. Уӕд дӕр латвиаг зӕххыл, хъӕу Пробьийы районы. Хъалаты Симон йӕ минометӕй ныддӕрӕн кодта ӕртӕ тӕрхджын пулеметы, скуынӕг кодта 20 гитлероны бӕрц.
ССР Цӕдисы Сӕйрат Советы Президиумы Указӕй 1945 азы 29 июны гвардийы хистӕр сержант Хъалаты Симон хорзӕхджын ӕрцыд Намысы ордены 1-аг къӕпхӕнӕй.
1945 азы 24 июны Мӕскуыйы цы историон Уӕлахизы Парад уыд, уым чи архайдта, уыдонӕй иу уыдис Гӕлиаты хъӕуы минӕвар, минометон расчеты командир, гвардийы сержант Хъалаты Симон. Сырх фӕзы йе ‘рттиваг цырыхъхъыты къӕрцц-къӕрцгӕнгӕ цӕугӕйӕ, федта, Ленины Мавзолейы рӕбынмӕ советон уӕлахиздзаутӕ фашистон тырысатӕ куыд ӕппӕрстой, уый.
Уыцы аз августы ссӕрибар хӕстӕй Симон ӕмӕ сыздӕхт Ирыстонмӕ. Цард ӕрӕфы районы Сырх-Дыгуры хъӕуы. Кодта зӕххы куыст, уыд Гетъойы-фырты номыл колхозы фосдарӕн фермӕйы сӕргълӕууӕг.
Намысы ӕртӕ ордены фарсмӕ Хъалаты уӕлахиздзау Симоны риуыл цӕхӕртӕ калдтой Фыдыбӕстӕйы хӕсты ll-аг ӕмӕ l-аг къӕпхӕнты ордентӕ, майдантӕ «ӕхсардзинады тыххӕй», «ӕнӕзӕрдӕхудт фӕллойы тыххӕй» ӕмӕ ӕндӕртӕ.
1971 азы Хъалаты Симон ӕрцард Дзӕуджыхъӕуы. 1991 азы 13 июлы уӕлахизӕрхӕссӕг Хъалайы-фырт бацыд йе ‘нусон дунемӕ. Хӕсты хъӕбатырӕн куыд ӕмбӕлы, афтӕ йӕ кад ӕмӕ радимӕ баныгӕдтой Сырхгвардион парчы Намысы Аллейы.
Фӕлӕ, куыд фӕзӕгъынц, хъӕбатыртӕ нӕ мӕлынц, уыдон цӕрынц бронзӕйӕ, гранитӕй конд цыртдзӕвӕнты, уынгты нӕмтты, адӕмы зӕрдӕты. Нӕ баззад рохуаты Хъалаты хъӕбатыр хӕстон дӕр, йӕ ном хӕссы Сырх-Дыгуры уынгтӕй иу, горӕты цы хӕдзары цард, уый къулыл ис номарӕн къӕй.
БАГАТЫ Аврам
