Цӕмӕй нӕ республикӕйы ӕрыгон музыканттӕн нывыл ахуыр кӕнынӕн хорз фадӕттӕ уа, ууыл зӕрдиагӕй архайы РЦИ-Аланийы Культурӕйы министрад.
Сӕрмагонд проект «Культурӕйы тыгъдад» царды рауадзыны программӕмӕ гӕсгӕ Дзӕуджыхъӕуы Гергиты Валерийы номыл Аивӕдты колледжӕн ӕлхӕд ӕрцыд музыкалон инструменттӕ. Знон колледж бабӕрӕг кодта нӕ республикӕйы культурӕйы министр Къубалты Эльбрус. Уый ӕрзылд кълӕстыл ӕмӕ йӕхӕдӕг федта, музыкалон инструменттӕ кӕмыты ӕвӕрд ӕрцыдысты, уый. Фортепианойыл ахуыргӕнӕн кълӕсты ӕвӕрд ӕрцыд цыппар фортепианойы. Адӕмон инструментты къласы та — домрӕтӕ, балалайкӕтӕ, баян, къӕрцгӕнӕнтӕ.
Колледжы директор Бериты Изабеллӕ министрӕн куыд радзырдта, афтӕмӕй колледжы кълӕстӕм музыкалон ног инструменттӕ ӕлхӕд нӕ уыд суанг 1980 азӕй фӕстӕмӕ. Уымӕй уӕлдай ма сын балхӕдтой сӕрмагонд ахуыргӕнӕн литературӕ. Колледжы информатикӕйы къласмӕ та ӕлхӕд ӕрцыд интерактивон фӕйнӕджытӕ.
Къубалты Эльбрус куыд загъта, афтӕмӕй проект «Культурӕйы тыгъдад»-мӕ гӕсгӕ ма музыкалон инструменттӕ ног ахуыры аз райсдзӕн Мӕздӕджы Михаил Глинкӕйы номыл музыкалон скъола дӕр. Уый фӕрцы та курдиатджын фӕсивӕдӕн фӕзындзӕн фылдӕр ӕмӕ хуыздӕр фадӕттӕ ахуырадон ӕмӕ сфӕлдыстадон ӕнтыстджын архайдӕн.
Гасанты Валери
Къамтӕ систа КЪӔБЫСТЫ Харитон
