Сӕлбиты Акимы ном фидар баст у нырыккон кинематографиимӕ, цы ӕвӕджиауы хъуыдытӕ йӕм фӕзыны, уыдон царды уӕндонӕй ӕвдисы. Цӕгат Ирыстоны цардмӕ у къӕрцъхъус, бӕстон ӕм кӕсы, йӕ бавнӕлд кӕм бахъӕуы, уым уайтагъд фӕзыны. Кӕд цӕргӕ ӕмӕ кусгӕ Мӕскуыйы кӕны, уӕддӕр йӕ бирӕ архайд у нӕ республикӕимӕ баст. Ӕрӕджы йемӕ фембӕлд уацхӕссӕг Хъуылымбегты Зӕринӕ ӕмӕ сын рауад ахӕм ныхас:
— Нӕ ныхас мӕ, Аким, фӕндид райдайын, фарон, 2019 азы, дӕ къухы цы стыр ӕнтыстдзинӕдтӕ бафтыд, уыдонӕй. Зӕгъӕм, Малиты Георгийы диссаджы поэмӕ «Темур-Алсахъ» куыд систай, уый. Уӕдӕ, Хетӕгкаты Къостайы райгуырды 160 азмӕ, йӕ уацмыстыл фыст киноныв «Фатимӕ»-йы архайджытӕ сдзырдтой иронау. Ды уыдтӕ йӕ ирон азӕлынады режиссер, ӕмӕ дын — стыр бузныг…
— Ног ӕмӕ йӕ бӕстон тӕлмац ракодта Цӕгат Ирыстоны адӕмон поэт, Хетӕгкаты Къостайы паддзахадон премийы лауреат Кокайты Тотрадз. Ӕмӕ дзы тынг разы дӕн. Нӕ зындгонд ансамблты дӕр фӕхуыдтой азы кӕрон Мӕскуымӕ, цӕмӕй архайой Хетӕгкаты Къостайы номимӕ баст концерты паддзахадон Стыр театры. Уым ма архайдтой уӕрӕсейаг театртӕ ӕмӕ кинойы зындгонддӕр артисттӕ дӕр.
Алы азты уыдон уыдысты Ирыстоны, кинофестивал «Владикавказ»-ы-иу архайдтой, фӕлӕ сын ныр нӕ номдзыд поэты ӕмдзӕвгӕтӕ бакӕсын уыдис стыр диссаг. Сӕ нӕмттӕ дӕр сын ранымайдзынӕн: Советон Цӕдисы адӕмон артисткӕ Людмилӕ Чурсина, Уӕрӕсейы адӕмон артисттӕ Александр Михайлов, Аристарх Ливанов, Юрий Шлыков…
«Темур-Алсахъ»-ы кой куы ракӕнон, уӕд уый у хицӕн цау. Ӕвӕццӕгӕн, мӕхиуыл цал азы цӕуы, уыйбӕрц нӕ бинонтӕ цӕрынц Малиты Георгийы фырты раз. Йӕ хистӕр фырт Мурат кусы Кировы районы рынчындоны хирургӕй. Поэт Малиты Васоимӕ та мӕхӕдӕг базонгӕ дӕн фӕстӕдӕр, фӕлӕ уый ацы премьерӕмӕ нал фӕцард… Киноныв хъуамӕ истаид уырыссаг режиссер, фӕлӕ ме ‘мбал, актер ӕмӕ зарӕггӕнӕг Цӕрикъаты Феликс фидарӕй загъта, цӕмӕй йӕ мӕхимӕ райсон. Ацы кинонывы Феликс тынг бӕрнонӕй ахъазыд. Ӕрбахуыдтам ма Василий Лановойы, зарӕггӕнӕг Зарӕйы, Дмитрий Харатьян ӕмӕ Вадим Пожарскийы, Ирыстоны стыр хӕлар Александр Панкратов-Черныйы…
— Ацы аз ӕнахуыр рауад ӕппӕт дунейӕн дӕр. Дӕуӕн та цавӕр уыдис?
— Ӕз дӕр ацы дунейы цӕрын, фӕлӕ мӕ къухы бафтыд нӕ номдзыд бӕхджыны тыххӕй киноныв сисын. Дыууӕ Олимпаг хъӕзтыты архайӕг, Уӕрӕсейы бӕхты спорты президент, спорты сгуыхт мастер Тугъанты Владимиры тыххӕй. Истон ӕй Германы, Голландийы, Мӕскуыйы, Ирыстоны… ӕцӕгдӕр у XXI ӕнусы спорты ахъаззагдӕр архайджытӕй иу, цы хъуыддагыл балӕууыд, уым у ӕнӕфӕцудгӕ.
Кӕронмӕ ахӕццӕ кодтон дыккаг ӕмӕ ӕртыккаг кинонывтӕ «Вдохновленные», уым сӕйраг архайӕг у хӕрзӕрыгон актрисӕ, поэт, тынг зондджын чызг Плиты Николь. Иннӕ куыст — «Ирыстоны джигиттӕ — «Сӕрмӕт», сӕ разамонӕг у Танделаты Олег. Иннӕ та — «Музыка Гоа» — ӕппӕты зындгонддӕр кинокомпозитор, сӕдӕ кинонывӕй фылдӕрӕн музыкӕ чи ныффыста, уыцы Анатолий Зубковы тыххӕй. Куыстытӕ цыдысты Индийы, штат Гоайы, композитор дзы бирӕ азты кусы. Анатолий Зубков зындгонд у, куыд уӕрӕсейаг хит-мейкер, йӕ зарджытӕ йын зарынц Аллӕ Пугачева, Филипп Киркоров, София Ротару, Николай Басков…
Мах йемӕ базонгӕ стӕм иу-фынддӕс азы размӕ. Фӕдзырдтон ӕм, цӕмӕй ныффысса музыкӕ мӕ киноныв «Ищу невесту без приданого»-мӕ… Уым, мӕхӕдӕг, ӕмӕ Анастасия азарыдыстӕм Риммӕ Казаковайы ӕмдзӕвгӕтыл фыст зарджытӕ… Абон сын ис сӕхи цард…
— Аким, кӕд бахиздзыстӕм, XX ӕнусы кӕрон зындгонд чи уыд, уыцы ирон кинематографмӕ?
— Уый у ме стыр рыст, мӕ бон цы уыд, уый скодтон… Мӕскуыйӕ ссыдтӕн Ирыстонмӕ, систон киноныв «Одиннадцать писем к Богу». Афтӕ бакодта ме ‘мкусӕг Галазты Аслан дӕр. Уый та систа киноныв «Ласточки прилетели»… Ныртӕккӕ ралӕууыд продюссерон кинонывты рӕстӕг. Уый дӕтты ӕхца, кӕд ӕм мӕ нысантӕ фехъуыстысты, мӕ бӕллицтӕ фӕхӕццӕ сты, уӕд. Ныртӕккӕ та уырдӕм ахӕсгӕ сты Гӕдиаты Секъайы «Азау», Плиты Харитоны «Сӕлимӕт». Ис нӕм хорз, ӕцӕг прозӕ. Кӕд ма нӕ истытӕ бакӕсын фӕнды, уӕд…
Ныр та ӕппӕты ахсджиагдӕр: фӕндид мӕ ногӕй Къостайы «Фатимӕ» сисын, нырыккон технологитӕ, дзыллон авналӕнтимӕ…
— Ӕмӕ уӕд абон куыд уайы? Алы кинематографист, алы режиссер дӕр ӕрмӕст йӕхи гуылы бын ӕндзары?
— Ныртӕккӕ цард афтӕ арӕзт у. Цалынмӕ нӕм ног киностуди нӕ уа, уӕдмӕ стӕм хицӕнтӕ. Ам нӕм ӕнтыстджынӕй кусы автор, режиссер ӕмӕ продюсер Туаты Теминӕ. Фӕлӕ ӕнӕуи та тырнӕм иудзинадмӕ, хъомысмӕ. Ӕрхъуыды ма кӕнӕм, аргъау «Сказка о репке», уым ныхас адӕмы иудзинадыл цӕуы… Иумӕ куы уӕм, уӕд нын ницы тас у, уӕд нын басӕттӕн нӕй. Абон уый ӕппӕты ахсджиагдӕр хъуыддаг у.
— Дӕ цӕстӕй акӕсгӕйӕ, абон кино амалхъомырдӕм здӕхт у?
— Ахӕм кинонывтӕ ис, ӕмӕ сӕ йӕ режиссер ӕнцонӕй бакусдзӕн ӕндӕр киноныв сисыны тыххӕй. Зӕгъӕм, рог кинонывтӕ, адӕймагӕн ӕхсызгондзинад хӕссӕг… Фӕлӕ уӕддӕр ӕцӕг кинонывтӕн сӕ хъару ӕндӕр у, уым ис ӕрвыст ныхас, ныхмӕлӕуд банывыл кӕныны, гуманизм ӕмӕ пассионарон хъуыдыкӕнынад. Уым бирӕ раст ныхӕстӕ ис, мах сӕ хъуамӕ нӕ зӕрдыл дарӕм, кӕд нӕ хуыздӕр уӕвын фӕнды, уӕд.
— Цӕй мидӕг ссарыс удӕнцойдзинад, дӕхи куыдӕй ӕрсабыр кӕныс? Нӕ цард тынг тагъд згъоры, нӕ бон ӕрлӕууын дӕр нӕу, кӕрӕдзи цӕстытӕм бакӕсын, цыдӕртӕ ӕрхъуыды кӕнын…
— Мӕ амонд уый мидӕг ис, ӕмӕ сӕ мӕ бон спайда кӕнын у… Нӕ рагон, зӕрдӕйы фӕндиаг кинонывтӕ фенын. Мӕнӕ ныртӕккӕ цы гаджеттӕ ис, ног технологитӕ — уыдон мын уыйас ахсджиаг не сты. Мӕ бон ӕнӕ уыдонӕй дӕр у, ахсджиаг мын сты фембӕлдтытӕ, бӕстон ныхас. Изӕрӕй та — чингуытӕ, нӕ композитортӕ, сӕ музыкӕ — нырма кӕронмӕ аргъ кӕмӕн не скодтой, уыцы музыкӕ: Кокойты Тӕтӕрхъан ӕмӕ Аслан, Плиты Христофор ӕмӕ Гӕбӕраты Илья…
— Кӕд, мыййаг, уыцы уавӕр нӕ республикӕйы разамындимӕ бӕттыс…
— Нӕ, уый афтӕ нӕу, иунӕг разамонӕг дӕр не ‘рлӕудзӕн киноныв исыны ныхмӕ. Ӕрмӕстдӕр ын баххуыс кӕндзӕн. Тынг хорз хъуыды кӕнын, уӕлдӕр ран чи бады, чиновниктӕ-иу сӕхи ӕхца куыд радтой киноныв сисыны тыххӕй. Фӕлӕ мӕм уӕддӕр афтӕ кӕсы, ног киностуди нӕм куы фӕзынид, уӕд фарстытӕн сӕ фылдӕр нал уаид.
— Уӕрӕсейаг кинойы бон ныхас хъуамӕ фӕуа дӕ ног фӕндӕттӕ ӕмӕ нысантӕй.
— Уый тыххӕй дын ницы зӕгъдзынӕн. Кӕй кой кӕнӕм, уыдон царды фӕзындзысты ӕви нӕ, уый у гуырысхойаг… ӕрхъуыды ма кӕнӕм, «Нарты кадджытӕй» цы рауад? Дзургӕ йыл бӕргӕ фӕкодтам, фӕлӕ цы? Кӕд исчи йӕ хъус ӕрдара мӕ пълантӕм, уӕд ӕз цӕттӕ дӕн ныхасмӕ…
