Мыхуыры рацыд литературон-аивадон ӕмӕ ӕхсӕнадон-политикон ӕрвылмӕйон журнал «Мах дуджы» 8-ӕм номыр.
Ацы аз зындгонд ирон курдиатджын поэт, тӕлмацгӕнӕг, драматург, публицист Чеджемты Георы райгуырдыл 80 азы кӕй сӕххӕст, уый фӕдыл журналы бакӕсӕн ис йе ‘мдзӕвгӕты цикл ӕмӕ биографион зонӕнтӕ.
Номдзыд актрисӕ, УФ-йы адӕмон артисткӕ, Хъариаты Тамарӕ Ирон театры сценӕйы бирӕ зӕрдӕагайгӕ сурӕттӕ сарӕзта. Уыдонӕй сӕ алкӕцыдӕр бацыд национ театралон аивады сыгъзӕрин фондмӕ. Уый канд курдиатджын актрисӕ нӕ уыд, фӕлӕ ма ныффыста нӕ театралон аивады тыххӕй бирӕ ахадгӕ иртасӕн ӕрмӕджытӕ, сывӕллӕттӕн радзырдтӕ ӕмӕ аргъӕуттӕ дӕр. Ацы аз йӕ райгуырдыл 105 азы кӕй ӕххӕст кӕны, уый фӕдыл журналы бакӕсӕн ис йӕ радзырд «Сылгоймӕгты тох».
Прозӕйӕ ма номыры мыхуыргонд ӕрцыд зындгонд журналист Гаджиты Иласы радзырд «Фыййаукуыдз Бури».
Ирон чиныгкӕсӕгӕн зонгӕ ӕмӕ уарзон у поэт, фыссӕг, музыкант, УФ-йы Фысджыты цӕдисы уӕнг Бызыккаты Земфирӕйы ном. Уый у бирӕ поэтикон ӕмӕ сывӕллӕттӕн фыст радзырдты чингуыты автор. Ныр 30 азӕй фылдӕр Земфирӕ кусы газет «Рӕстдзинад»-ы хайады сӕргълӕууӕгӕй. Журналы ацы номыры мыхуыргонд ӕрцыдысты йӕ мысинӕгтӕ, газеты редакцийы кусын куыд райдыдта, хӕрзгӕнӕг ын чи басгуыхт хистӕр ӕмӕ астӕуккаг кары журналисттӕй, уыдоны тыххӕй.
Журналы иудадзыгон рубрикӕ «Карз хӕсты фӕндӕгтыл — Уӕлахизмӕ»-йы бынмӕ та бакӕсдзыстут тлийыхъӕуккаг, Фыдыбӕстӕйы Стыр хӕсты архайӕг Къадзаты Состыччы царды ӕмӕ лӕгдзинады цаутыл фыст Тъехты Тамерланы очерк «Берлинмӕ дамбацаимӕ… Берлинӕй ракетӕимӕ».
Ацы рубрикӕйы бынмӕ ма мыхуыргонд ӕрцыд зындгонд поэт, Фыдыбӕстӕйы Стыр хӕсты архайӕг Цырыхаты Михалы кадӕг «Мастисӕг». Поэзийы рубрикӕйы та — РЦИ-Аланийы аивӕдты сгуыхт архайӕг, Адӕмон сфӕлдыстады республикон хӕдзары директор Цӕриаты Валерийы ӕмӕ Бутаты Ритӕйы ног ӕмдзӕвгӕтӕ.
Ирыстоны архитектурӕйы аивады зынгӕ фӕд чи ныууагъта, уыцы арфӕйаг лӕгтӕй иу уыд Гуыбаты Зауыр. Ӕрӕджы уый фӕхъуыд не ‘хсӕнӕй. Журнал «Мах дуджы” ацы номыры мыхуыргонд цӕуынц йӕ хӕлар, зындгонд архитектортӕ Алыккаты Русланы, Кодзырты Русланы, УФ-йы сгуыхт нывгӕнӕг Дзбойты Михалы, УФ-йы культурӕйы сгуыхт кусӕг Гӕгойты Таймуразы, УФ-йы Нывгӕнджыты цӕдисы уӕнг Езеты Марклены мысинӕгтӕ.
Ирыстоны хӕхтӕ йӕ удӕй фылдӕр чи уарзта, стыр хъыгагӕн, сӕ хъӕбысы йӕ адзал чи ссардта, уый уыд зӕрдӕхӕлар, курдиатджын лӕппу ӕмӕ дӕсны къамисӕг Сӕбанты Валери. Ӕрӕджы Национ наукон библиотекӕйы байгом, Валери алы азты кӕй систа, уыцы къамты равдыст. Журнал «Мах дуджы» редакцийы кусджытӕ сӕхицӕн хӕсыл банымадтой, Валерийы ист къамтӕн сӕ хуыздӕртӕ уӕ размӕ рахӕссын.
Рубрикӕ «Адӕмон сфӕлдыстад»-ы бынмӕ бакӕсдзыстут «ӕртӕ усгуры аргъау».
«Ирон прозӕйы антологи»-йы мыхуыргонд ӕрцыд газет «Рӕстдзинад»-ы хайады сӕргълӕууӕг, УФ-йы культурӕйы сгуыхт кусӕг Цгъойты Хазбийы уацау «Уӕлахизы сидзӕртӕ» ӕмӕ авторы биографион ӕрмӕг.
Уыдонӕй уӕлдай ма журналы бакӕсӕн ис ацы мӕйы культурӕйы цаутыл афӕлгӕст.
Гасанты Валери
