Знон уыд Республикӕ Цӕгат Ирыстон-Аланийы Парламенты Советы радон ӕмбырд. Амыдта йӕ Парламенты Сӕрдар Алексей Мачнев.
Депутаттӕ цы 53 ахсджиаг фарстмӕ ӕркастысты, уыдонӕй цыппар уыдысты федералон закъонтӕм ивддзинӕдтӕ бахӕссыны тыххӕй закъоны проекттӕ. Дыууӕимӕ дзы Советы уӕнгтӕ не сразы сты, уымӕн ӕмӕ сӕ хъӕппӕрис равдисджытӕ цы фарстытӕ исынц, уыдон ӕвӕрд сты ӕндӕр федералон закъонты. Депутаттӕ равзӕрстой республикӕйы закъонтӕм ивддзинӕдтӕ бахӕссыны тыххӕй 45 закъоны проекты. Советы уагӕвӕрдмӕ гӕсгӕ, республикӕйы закъоны проекттӕй хорзыл кӕй банымайынц, уыдон фӕстаг уынаффӕ рахӕссыны тыххӕй бахӕссынц Парламенты боны фӕткмӕ. Федералон закъоны проекттӕ та Советы уынаффӕимӕ ӕрвыст ӕрцӕуынц Паддзахадон Думӕмӕ.
Закъонад, закъонӕвӕрынад ӕмӕ бынӕттон хиуынаффӕйады комитеты сӕрдар Ортабайты Тимур депутатты рӕгъмӕ цы 18 закъоны проекты рахаста, уыдоны ныхас цыд республикӕйы закъонтӕм Уӕрӕсейы Федерацийы закъонты домӕнтӕм гӕсгӕ ивддзинӕдтӕ бахӕссыныл.
Депутаттӕ хорзыл банымадтой, бынӕттон хиуынаффӕйады муниципалон ӕмӕ бынӕттон администрацийы сӕргълӕуджыты бынӕттӕм бацӕуынмӕ чи хъавы, уыдон сӕ исбонады, сӕ хӕрдзты тыххӕй бӕрӕг ӕмӕ бӕлвырд хабӕрттӕ дӕттыны уагӕвӕрд, ӕмбырдтӕ, митингтӕ, демонстрацитӕ ӕмӕ ӕндӕр дзыллон мадзӕлтты, республикӕйы бынӕттон хиуынаффӕйады, барадхӕлдтыты хицӕн хуызты ӕмӕ административон бӕрнондзинады тыххӕй фарстытӕ цы закъонты ӕвдыст ӕрцыд, уыдон. Ортабайты Тимур ма Советы уӕнгтӕн фехъусын кодта РЦИ-Аланийы Парламенты закъонадон хъӕппӕрис Уӕрӕсейы Федералон ӕмбырды Паддзахадон Думӕмӕ Федералон закъоны проект «Республикӕ Цӕгат Ирыстон-Аланийы Дигорайы районты ‘хсӕн тӕрхондон саразыны тыххӕй Дигорайы ӕмӕ Ӕрӕфы районты тӕрхондӕттӕ аивыны ӕмӕ сӕ Дигорайы районты ‘хсӕн тӕрхондонимӕ баиу кӕныны тыххӕй». Ацы хъуыддагыл дӕр Советы уӕнгтӕ схъӕлӕс кодтой ӕмхуызонӕй.
Бюджет, хъалонтӕ, исбонад ӕмӕ кредитон организациты комитеты сӕрдар Баликъоты Валери депутатты рӕгъмӕ цы иуӕндӕс ахсджиаг фарсты рахаста, уыдоны ‘хсӕн уыд закъоны проект «Республикӕ Цӕгат Ирыстон-Аланийы республикон бюджеты тыххӕй 2020 азӕн ӕмӕ пъланон 2021 ӕмӕ 2022 азтӕн» Республикӕ Цӕгат Ирыстон-Аланийы Закъонмӕ ивддзинӕдтӕ бахӕссыны тыххӕй». Ацы ӕмӕ иннӕ фарстытӕ дӕр хаст ӕрцыдысты Парламенты радон ӕмбырды фӕткмӕ.
Советы уӕнгтӕ бӕстон ӕрныхас кодтой Аграрон политикӕ,экологи ӕмӕ ӕрдзон фӕрӕзты комитеты сӕрдар Тетцойты Георги, Социалон политикӕйы, ӕнӕниздзинад хъахъхъӕнынад ӕмӕ ветеранты хъуыддӕгты фӕдыл комитеты сӕрдар Реуазты Ларисӕ, Промышленност, транспорт, бастдзинад ӕмӕ амалхъомады фӕдыл комитеты сӕрдар Бурдзиуты Валери, Национ политикӕ ӕмӕ фӕсивӕды хъуыддӕгты комитеты сӕрдары хӕдивӕг Тауытты Алыксандр сӕ размӕ цы ахсджиаг фарстытӕ рахастой, уыдоныл ӕмӕ сӕ бахастой Парламенты радон ӕмбырды боны фӕткмӕ.
Кӕронбӕттӕны депутаттӕ сбӕлвырд кодтой Республикӕ Цӕгат Ирыстон-Аланийы Парламенты ӕртын ӕвдӕм ӕмбырды боны фӕтк ӕмӕ йӕ саразыны бон.
Касаты Батрадз
