Ӕвзонг ӕрхъуыдыгӕнджытӕ ӕмӕ фидӕны ахуыргӕндтӕн Мӕздӕджы байгом ис технопарк «Кванториум». Уый ӕрбынӕттон ис ӕвзонг техникты станцӕйы. Раздӕр уал ӕм базылдысты, бӕстыхайӕн йӕ архитектурон хицӕндзинӕдтӕ бахъахъхъӕнгӕйӕ. Наукон-ахуырадон комплекс нӕ республикӕйы у дыккаг, фӕзынд национ проект “Ахуырад»-ы бындурыл.
Кванториумы сӕ бон уыдзӕн архайын 800 сывӕллонӕн, ахуыр кӕндзысты ӕхсӕз хъуыддагыл «Энерджиквантум», «Геоквантум», «Автоквантум» ӕмӕ ӕндӕр фӕзилӕнтыл. Лабораторийы ис нырыккон техникӕ, лазерон ӕмӕ фрезерон тӕрхтӕ, ӕндадзӕн ӕмӕ ныхасӕн станцӕтӕ, сканертӕ, микроскоптӕ ӕмӕ ӕндӕр аппаратурӕ. Кусдзӕн дзы шахматистты къорд дӕр.
Кадджын уавӕры «Кванториум» байгом кӕныны архайдтой РЦИ-Аланийы Сӕргълӕууӕг Битарты Вячеслав, Хицауады Сӕрдары хӕдивӕг Иринӕ Азимова, наукӕ ӕмӕ ахуырады министр Людмилӕ Башарина, Мӕздӕджы районы разамынд, С.А.Лавочкины номыл наукон-куыстадон иугонды генералон директоры фыццаг хӕдивӕг Къомайты Руслан ӕмӕ Мӕздӕджы «Кванториум»-ы директор Мурад Джахаев.
Хъуыддаджы архайджытӕн арфӕ кӕнгӕйӕ, нӕ республикӕйы разамонӕг фидарӕй загъта, «Кванториум»-ы ног бӕстыхайы бирӕ ахадгӕ фарстытыл кӕй бакусдзысты, уый тыххӕй. «Ацы ран нӕ сывӕллӕттӕ базонгӕ уыдзысты нырыккон наукӕ ӕмӕ техникӕимӕ. Уыцы ран сын ӕххуыс кӕндзысты бӕрзонд технологон зонындзинӕдтимӕ ахуыргӕнджытӕ. Афтӕмӕй, фӕстӕдӕр ӕрыгон профессионалтӕ ӕрбацӕудзысты экономикон къабазмӕ, сӕ бон уыдзӕн технологон хъуыддаг ӕххӕстӕй уынын ӕмӕ ӕмбарын. Уый фӕзындзӕн экономикон рӕзтыл»,— фӕбӕрӕг кодта Битары-фырт.
Республикӕйы разамынд ма рахаста, цӕугӕ «Кванториум» скӕныны уынаффӕ, уый-иу йӕ фӕндаг акӕндзӕн районтыл. Техникон ӕмӕ ӕрдзон-наукон архайд аххӕсдзӕн фылдӕр ахуырдзаутыл. Республикӕйы Сӕргълӕууӕг куыд бацамыдта, афтӕмӕй рӕзгӕ фӕлтӕрты хӕрзхъӕд ахуырад у сӕйраг нысан. Хӕстӕгдӕр рӕстӕг нӕм фӕзындзӕн егъау ахуырадон центр, уым фадӕттӕ уыдзӕн курдиатджын сывӕллӕтты рабӕрӕг кӕнынӕн. Национ проект «Ахуырад»-ы руаджы йӕ сараздзысты 2022 азы.
Ацы ахсджиаг цауы тыххӕй ӕрбацӕуӕг адӕмӕн раарфӕ кодта, Советон Цӕдисы Паддзахадон премийы лауреат Къомайты Руслан. «Цӕгат Ирыстон кӕддӕриддӕр зындгонд уыдис йӕ курдиатджын адӕймӕгтӕй . Кӕцыфӕнды ран дӕр не ‘мзӕххонтӕ сӕхи равдыстой ахъаззагӕй. Уымӕ гӕсгӕ, абон ацы хӕдзары къӕсӕрӕй чи ӕрбахызт, уыдонӕн мӕ зӕрдӕ зӕгъы, цӕмӕй хистӕр фӕлтӕрӕй дарддӕр ацӕуой, ӕнӕниздӕр, зондджындӕр уой. Хицӕн ныхӕстӕ мӕ фӕнды зӕгъын Битарты Вячеславӕн, уый фӕстаг азты стыр хъуыддӕгтӕ аразы нӕ райгуырӕн зӕххы рӕзтӕн», — загъта Къомайты Руслан.
Уый фӕстӕ хъуыддаджы архайджытӕ ӕрзылдысты «Кванториум»-ы бӕстыхайыл, федтой йын йӕ уавӕртӕ ӕмӕ фадӕттӕ.
