Куыд иннӕ уӕрӕсейаг регионты, афтӕ Цӕгат Ирыстоны дӕр дарддӕр ӕххӕстгонд цӕуы ӕппӕтуӕрӕсеон экологон акци «Хъӕд бахъахъхъӕнӕм».
Уыцы акцийы фӕлгӕты октябры Кировы ӕмӕ Горӕтгӕрон районты хъӕды хӕдзарӕдты 72 гектары фӕзуатыл ныссадздзысты 280 мин алыхуызон бӕласы талайы.
Цӕгат Ирыстоны ӕрдзон фӕрӕзтӕ ӕмӕ экологийы министрады пресс-службӕ куыд фехъусын кодта, афтӕмӕй экологон акцийы архайыны хъӕппӕрис равдыстой хицауады ӕххӕстгӕнӕг оргӕнты специалисттӕ, куыстуӕттӕ ӕмӕ ӕхсӕнадон организациты минӕвӕрттӕ, журналисттӕ ӕмӕ бархионтӕ — ӕдӕппӕт 1000 адӕймагӕй фылдӕр.
Акцийы кӕй архайдзысты, уый тыххӕй куырдиат ӕрбалӕвӕрдтой паддзахадон телерадиокомпани «Аланыстон»-ы, ӕппӕтуӕрӕсеон адӕмон фронты, ӕрдз хъахъхъӕныны ӕппӕтуӕрӕсеон ӕхсӕнады регионалон хайады, Скъоладзауты ӕппӕтуӕрӕсеон змӕлды дӕлхайад ӕмӕ ӕндӕр организациты минӕвӕрттӕ.
Кировы ӕмӕ Горӕтгӕрон районты ӕппӕтуӕрӕсеон акцийы мадзӕлттӕ райдайдзысты 8 октябры. Куыд нысангонд цӕуы, афтӕмӕй уыцы бон бӕлӕстӕ садзыны мадзалы архайдзысты республикӕйы Хицауады Сӕрдары фыццаг хӕдивӕг Сӕбӕтхъуаты ӕхсарбег ӕмӕ хицаудзинады оргӕнты иннӕ бӕрнон кусджытӕ.
Зындгонд куыд у, афтӕмӕй ӕрвылазон ӕппӕтуӕрӕсеон акци райдайы Камчаткӕйы. Афтӕ уыд ныр дӕр. Хурыскӕсӕны регионтӕй акци «анхъӕвзы» бӕстӕйы иннӕ рӕттӕм. Экологон мадзал арӕзт цӕуы УФ-йы ӕрдзон фӕрӕзтӕ ӕмӕ экологийы министрады, Хъӕды хӕдзарады федералон агентад ӕмӕ ӕрдз хъахъхъӕныны ӕппӕтуӕрӕсеон ӕхсӕнады хъӕппӕрисӕй. Акцийы мадзӕлтты тыххӕй бӕстондӕр ӕрмӕг базонӕн ис йӕ официалон сайты — «сохранимлес.рф».
Нӕ уацхӕссӕг
