2020 азы Цӕгат Ирыстон йӕ размӕ цы нысан сӕвӕрдта, уымӕ гӕсгӕ дыргъы куыстады продукцийы рауагъды бӕрц хъуамӕ 30 мин тоннӕйӕ фӕфылдӕр уа.
Ахӕм нымӕцтӕ фехъусын кодта республикӕйы хъӕууон хӕдзарад ӕмӕ хойраджы министр Уазиты Хъазыбег. Министры ныхасмӕ гӕсгӕ, Цӕгат Ирыстоны хорз фадӕттӕ ис дыргъы куыстад рапарахат кӕнынӕн. Ууыл хорзӕрдӕм ахадынц, куыд федералон центры ӕххуыс, афтӕ сӕрмагонд республикон программӕтӕ дӕр.
Уазийы-фырт куыд фӕнысан кодта, афтӕмӕй, зӕгъӕм, 2019 азы хъӕууон хӕдзарады райрӕзты республикон программӕйы нысангонд мадзӕлттӕн дихгонд ӕрцыд 813 милуан сомӕй фылдӕр (уыдонӕй федералон бюджеты фӕрӕзтӕ уыдысты 672 милуан сомы бӕрц). Ӕмӕ уыцы ӕууӕл зынгӕ фӕхъомысджындӕр кодта республикон агропромышленнон комплексы архайд. Афтӕ, 2019 азы хор ӕмӕ кӕрддзӕмджын культурӕты тыллӕг рауад 791,2 мин тоннӕйы (2018 азимӕ абаргӕйӕ, 27,4 мин тоннӕйы фылдӕр).
Тыллӕджы ӕрзадыл хорзӕрдӕм ахады, зӕхкусджыты хӕдзарӕдтӕн хъӕугӕ хъӕууонхӕдзарадон техникӕ ӕлхӕд кӕй цӕуы, уый дӕр. Афтӕ, зӕгъӕм, 2021 азы республикӕ балхӕндзӕн хъӕууонхӕдзарадон техникӕйы 50 иуӕджы (уыцы нысанӕн радих кӕндзысты 180 милуан сомы бӕрц). Абарынӕн: ацы аз республикӕйы хъӕууонхӕдзарадон куыстуӕттӕ балхӕдтой алыхуызон техникӕйы 38 иуӕджы (схардз сыл кодтой 126 милуан сомы бӕрц).
Министр куыд загъта, афтӕмӕй ӕндӕр мадзӕлттӕ дӕр арӕзт ӕмӕ нысангонд цӕуы республикӕйы агропромышленнон комплексы райрӕзтӕн.
Нӕ уацхӕссӕг
