Цӕгат Ирыстоны ӕнтыстджынӕй ӕххӕстгонд цӕуы нӕ фыдӕлты ӕрмдӕсныйады бынтӕ бахъахъхъӕныны ног проект. Уый у ӕртыккаг проект, Президенты грантты фонд, социалон-культурон куыстуат «Благодать»-ы бындурыл ирон адӕмы рагон, «Этно Алания», зӕгъгӕ, ӕрмдӕсныйӕдтӕ бахъахъхъӕныны фӕдыл кӕмӕн ӕххуыс кӕны, уыдонӕй.
Фыццаг ахуырты «Национ ӕрмдӕсныйӕдтӕ раздахыны» проект ӕххӕстгонд ӕрцыд 2019 азы. Нӕ республикӕйы 97 сылгоймаджы сахуыр кодтой къуымбилы куысты ӕмӕ нымӕт цӕгъдыны сусӕгдзинӕдтӕ, базыдтой алдымбыдтӕ ӕмӕ цыллӕ кӕлмӕрзӕнтӕ бийын. Ацы хъуыддагмӕ се ‘ргом аздӕхтой, чи нӕ хъуыди, уыдонӕй дыууӕ хатты фылдӕр сылгоймӕгтӕ, ӕмӕ уымӕ гӕсгӕ, проекты дыккаг хай «Ирыстоны нымӕт цӕгъдыны национ скъола» байгом 2019 азы ноябры. Ӕмӕ абоны онг дӕр йӕ куыст кӕны Дзӕуджыхъӕуы. Нымӕт цӕгъдыны фӕстӕ уыцы цӕттӕ ӕрмӕгӕй сылгоймӕгтӕ кӕнынц къахы ӕмӕ уӕлӕйы дарӕс, сылгоймаджы хиаивгӕнӕн лыстӕг дзаумӕттӕ ӕмӕ нӕлгоймаджы худтӕ. Нымӕт цӕгъдыны национ скъолайы алы курсы дӕр сахуыр кӕнынц 45 сылгоймаджы. Алчидӕр дзы бӕлвырд, лӕмбынӕг ӕмӕ биноныгӕй базоны нымӕт цӕгъдыны ӕппӕт хъуыддӕгтӕ дӕр. Ахуырты фӕстӕ сын радтынц къуымбил, фӕсмын ӕмӕ сӕрмагонд кусӕнгӕрзтӕ, цӕмӕй уыдон сахуыр кӕной иннӕты. Ӕрмӕг ӕмӕ кусӕнгӕрзтӕ сын дӕттынц лӕвар. Нымӕт цӕгъдыны национ скъолайы ӕмӕ Ирыстоны фыдӕлты ӕрмдӕсныйӕдтӕ бахъахъхъӕныны ассоциацийы сӕргълӕууӕг Бзарты Аланӕ куыд радзырдта, афтӕмӕй ацы хъуыддаг нӕ республикӕйы ӕнтыстджыныл нымад цӕуы.
— Алы ахуырты дӕр нӕм къордты ис, цы ‘мбӕлы, уымӕй фылдӕр ахуырдзаутӕ. Нымӕты куыст нӕ фыдӕлтӕй хуыздӕр чи зыдта? Ныр та ирон адӕмы ‘хсӕн уыцы дӕсныйад, зӕгъӕн ис, ӕмӕ сӕфтыл нымад ӕрцыд. Не скъолайы нымӕт цӕгъдыны уроктӕ дӕттынӕн ӕрхуыдтам Бетъырбухӕй фӕлтӕрдджын ӕмӕ дӕсны специалист Иринӕ Рубцовайы. Иринӕ, уӕвгӕ ирон чызг у — Хӕблиатӕй, фӕлӕ йӕ сӕрыхицауы мыггагӕй фыссы йӕхи. Уый куыд биноныг зоны къуымбилы куыст, ахӕм дӕснытӕ бирӕ нӕй. Проекты дыккаг хайы немӕ цӕдисӕмбал у ӕхсӕнадон змӕлд «Иудзинад». Йӕ разамонӕг Мӕрзойты Тамерлан нын ӕххуыс кӕны, цӕмӕй нӕ хъуыддаг ноджы тынгдӕр рӕза. Проекты ӕртыккаг хайы сӕйраг нысан у — ирон адӕмы рагфыдӕлтӕ къуымбил ӕмӕ цыллӕйӕ кӕй кодтой, уыцы дӕсныйӕдтӕ фӕстӕмӕ раздахын ӕмӕ сӕ бахъахъхъӕнын. Ацы ахуыртӕ арӕзт цӕуынц Алагиры, ӕрыдоны, Дыгуры, ӕрӕфы, Горӕтгӕрон, Кировы ӕмӕ Мӕздӕджы районты. Проекты бындурыл нӕ зӕрды ис уыцы районты — 525 сылгоймаджы сахуыр кӕнын, нымӕт цӕгъдын базонын кӕй фӕнды, ахӕмты, уӕлдайдӕр, йӕ авналӕнтӕ къуындӕг кӕмӕн сты, ӕгуыст чи у, ахӕм сылгоймӕгты. Программӕ ахъаз у мӕгуыр уавӕртӕ аиуварс кӕнынӕн. Проекты фӕрцы базонӕн ис хи къухтӕй цымыдисаг ӕмӕ экологон сыгъдӕг, ӕнӕниздзинад чи хӕссы, ахӕм ӕрмӕгӕй рӕсугъд нырыккон уӕлӕдарӕс ӕмӕ ӕндӕр предметтӕ кӕнын. Нымӕт цӕгъдыны скъолайӕн стыр ӕххуыс кӕны РЦИ-Аланийы Фӕллой ӕмӕ социалон рӕзты министрад дӕр. Нӕ архайд арӕзт у фыдӕлты традицитӕ цӕмӕй бынтондӕр сӕфт ма ‘рцӕуой, уымӕ. Проекты фӕрцы ацы хъуыддагмӕ здахӕм фӕсивӕды ӕргом дӕр, сылгоймӕгты, уыдон та дарддӕр сӕ зонындзинӕдтӕ фидӕны фӕлтӕртӕн дӕтдзысты, — загъта Бзарты Аланӕ.
Аланӕ у режиссер, юрист. Ахуырӕн бирӕ азтӕ снывонд кодта. Уыимӕ, алы дӕсныйӕдты. Фӕлӕ, ӕвӕццӕгӕн, йӕ ӕцӕг дӕсныйады дуг нӕма ралӕууыд ӕмӕ уымӕ гӕсгӕ йӕхи алы дӕсныйӕдтӕм «ӕппары». Йӕхӕдӕг куыд загъта, афтӕмӕй йӕ нымӕт цӕгъдыны куыстмӕ йӕ хъысмӕт ӕркодта. Гыццыл чызгӕн балхӕдта нымӕт дзабыртӕ ӕмӕ йӕм диссаг фӕкастис, сывӕллоны къӕхтӕ дзы хид кӕй нӕ кодтой, уый. Уӕд бамбӕрста, нымӕтӕй конд уӕлӕдарӕс экологон ӕгъдауӕй сыгъдӕг кӕй у, нӕй дзы химион буаргъӕдтӕ, ӕмӕ сфӕнд кодта уыцы дӕсныйад базонын. Фыццагдӕр райдыдта хӕрзмыггаг фыстӕ дарыны фарстайӕ. Сӕ къуымбил, хъуын хуыздӕр кӕцы мыггагӕн у, куыд сӕм хъӕуы зилын ӕмӕ афтӕ дарддӕр. Ныр йӕ къухы цы ӕнтыстдзинӕдтӕ бафтыд, уыдонмӕ уӕхӕдӕг къамты кӕсут, кӕнӕ та йӕ продукци балхӕнӕн ис Дзӕуджыхъӕуы базарадон центр «Вертикаль»-ы ӕртыккаг уӕладзыджы. Фӕлӕ, ӕрыгон специалисты сӕйраг нысан у — Ирыстоны сылгоймӕгтӕн ацы ахуыртӕ аразын. Табуафси, кӕй фӕнды дӕсныйад ӕвдисӕг ахуыртӕ ацӕуын, уыдон мӕнӕ ацы телефонтӕй дзу-рӕнт: 8-988-873-92-64, 8-988-871-33-17, 8-918-836-10-95.
Саутӕты Тамилӕ
