Мыхуыры рацыд журнал «Ногдзау»-ы ацы азы фӕндзӕм номыр.
Ӕрӕджы журналы редакци нӕ республикӕйы скъоладзауты ‘хсӕн цы конкурс сарӕзта, уым фӕуӕлахиз Елойты Дианӕ. Ӕмӕ ацы номыры бакӕсдзыстут йемӕ чысыл интервью.
Рагон ирон бӕрӕгбон Ичъынайы тыххӕй ӕрмӕг мыхуыргонд цӕуы рубрикӕ «Бӕрӕгбӕттӕ»-йы.
Нӕ фыдӕлты фынгӕвӕрды культурӕйы фынгисӕггаг цы амоны, уый сабитӕ базондзысты рубрикӕ «Ирон ӕгъдӕуттӕ»-йы.
Журнал «Ногдзау» кӕддӕриддӕр стыр ӕргом здахы ӕрыгон авторты сфӕлдыстадмӕ. Ацы номыры та дзы бакӕсдзыстут Дзӕуджыхъӕуы скъола-интернаты ахуыргӕнинаг Къӕбысты Аннӕйы ӕмӕ Ӕрыдоны 3-ӕм астӕуккаг скъолайы ахуырдзау Гӕбӕраты Миланӕйы ӕмдзӕвгӕтӕ: «Нана», «Тӕргайгӕнаг цъиу» ӕмӕ «Мӕ гӕды», Дзӕуджыхъӕуы 7-ӕм астӕуккаг скъолайы 5-ӕм къласы ахуыргӕнинаг Къуыллыты Чермены радзырд «Ӕмбаргӕ куыдз».
РЦИ-Аланийы сгуыхт ахуыргӕнӕг, поэтессӕ Хабӕты-Гӕджынон Риммӕ ӕмӕ зындгонд музыкант, фӕндырдзӕгъдӕг Евгений Воложанин сфӕлдыстадон ӕмгуыстад рагӕй кӕнынц. Журнал «Ногдзау»-ы мыхуыргонд ӕрцыд сӕ фыст зарӕг «Уарз дӕ чиныг».
Уый фӕстӕ журналы бакӕсӕн ис «Худӕджы нывтӕ» скъолайы цардӕй.
Тӕргайгӕнаг сабитӕн, ӕмбӕлттӕ кӕй нӕ вӕййы, уый бӕлвырддӕр базондзыстут, таурӕгъ «Бахъуыды кӕн» куы бакӕсат, уӕд.
Рубрикӕ «Аргъау»-ы бакӕсӕн ис Дзӕуджыхъӕуы 43-ӕм астӕуккаг скъолайы 5-ӕм къласы ахуырдзау Габеты Элинӕйы фыст аргъау «Зондджын уасӕг».
Хистӕр кары сабитӕ та дзы ӕхсызгонӕй бакӕсдзысты Айларты Михалы ӕмдзӕвгӕтӕ «Мӕ байраг» ӕмӕ «Дзывылдар».
Ирыстоны номдзыд богал Хъаныхъуаты Болайы царды ӕмӕ сгуыхтдзинады тыххӕй ӕрмӕг бакӕсӕн ис рубрикӕ «Ирыстоны кад»-ы.
Журнал «Ногдзау»-ы редакци стыр ӕргом здахы сыхаг адӕмты культурӕмӕ ӕмӕ аивадмӕ. Ацы номыры та бакӕсдзыстут Сухумы 1-ӕм астӕуккаг скъолайы ахуырдзау Рамиз Хашибайы ӕрмӕг «Мӕхи Абхази».
Ирон фыдӕлтыккон хореографийы хӕзнатӕй иу у «Бӕлӕтты кафт». Куыд ӕмӕ йӕ кӕм кафыдысты, уый базондзыстут, рубрикӕ «Аивады бынмӕ» цы ӕрмӕг мыхуыргонд ӕрцыд, уый куы бакӕсат, уӕд.
Дзӕуджыхъӕуы 3-ӕм астӕуккаг скъолайы 6-ӕм къласы ахуыргӕнинаг Уалыты Дианӕйы уац Црауыхъӕуы тыххӕй бакӕсдзыстут сӕрмагонд рубрикӕйы.
Цӕлыччыхъӕуы астӕуккаг скъолайы ахуыргӕнинаг Сокаты Дианӕйӕн та журналы ацы номыры мыхуыргонд цӕуы ӕрмӕг йӕ мыггаджы равзӕрды тыххӕй. Журналы ма бакӕсӕн ис ӕндӕр цымыдисаг ӕрмӕджытӕ дӕр.
Анвараты Валери
