Цӕгат Ирыстоны дзыллон информацийы фӕрӕзты минӕвӕрттӕ ӕмӕ ведомствӕты пресс-службӕты кусджыты къорд хорзӕхджын ӕрцыдысты зӕрдылдарӕн «Ӕппӕтуӕрӕсеон хӕрзаудӕн акци «Мах иумӕ стӕм»-мӕ бавӕрӕны тыххӕй» майдантӕй.
Акцийы зӕрдиаг архайджытӕн сӕ хӕрзиуджытӕ сӕмбӕлын кодта РЦИ-Аланийы Мыхуыр ӕмӕ дзыллон коммуникациты хъуыддӕгты фӕдыл комитеты сӕрдар Фидараты Юри. Уыцы бон хорзӕхджын ӕрцыдысты телерадиокомпани «Алани»-йы радиойы службӕйы разамонӕг Джыккайты Заремӕ ӕмӕ уацхӕссӕг Хъалӕгаты Надеждӕ, телеканал «Ирыстон»-ы уацхӕссӕг Дзапарты Георги, Ӕнӕниздзинад хъахъхъӕнынады министрады пресс-службӕйы кусӕг Джихаты Стеллӕ ӕмӕ ӕппӕтуӕрӕсеон адӕмон фронты регионалон хайады пресс-службӕйы координатор Бӕдтиаты Оксанӕ.
Ӕмбырды рӕстӕг куыд загъдӕуыд, афтӕмӕй иннӕ уӕрӕсейаг регионтимӕ ӕппӕтуӕрӕсеон акци «Мах иумӕ стӕм»-ы зӕрдиагӕй архайдтой Цӕгат Ирыстоны цӕрджытӕ дӕр: дохтыртӕ, медицинон ахуыргӕнӕндӕтты студенттӕ ӕмӕ ахуырдзаутӕ, бархионтӕ, фӕсивӕдон организациты уӕнгтӕ ӕмӕ афтӕ дарддӕр. Цыппар мӕймӕ уыцы акцийы фӕлгӕты алыхуызон ӕххуысы мадзӕлттӕ аххӕссыдысты республикӕйы 19 мин цӕрӕгыл. Акцийы штабы хъӕппӕрисджынӕй куыстой 580 бархионӕй фылдӕр.
Зӕгъын хъӕуы уый, ӕмӕ «Ӕппӕтуӕрӕсеон хӕрзаудӕн акци «Мах иумӕ стӕм»-мӕ бавӕрӕны тыххӕй» майдан лӕвӕрд цӕуы Уӕрӕсейы Президент Владимир Путины уынаффӕмӕ гӕсгӕ.
Нӕ уацхӕссӕг
