Къостайы ӕмдзӕвгӕтӕ — францаг ӕвзагыл

0
42

Къостайы райгуырӕн боны фӕдыл мадзӕлттӕ ацыдысты Дзӕуджыхъӕуы скъола-интернаты дӕр.

Ирон ӕвзаджы ахуыргӕнӕг Дзгойты Аллӕ куыд радзырдта, афтӕмӕй поэты  мысӕн изӕрмӕ  скъоладзаутӕ ӕрбахуыдтой режиссер, журналист Мишель Ренойы.

Уый, Парижы цӕргӕйӕ,  ӕрыгонӕй дӕр тырныдта Кавказмӕ,  ӕмӕ йӕ бӕллиц сӕххӕст. Ныр фондз ӕмӕ ссӕдз азы цӕры Ирыстоны ӕмӕ йӕ хоны йӕ дыккаг райгуырӕн бӕстӕ.

Мишель сывӕллӕттӕн радзырдта йӕ цард ӕмӕ сфӕлдыстадон куысты фӕдыл цымыдисаг хабӕрттӕ. Скъоладзаутӕ  бацӕттӕ кодтой чысыл равдыстытӕ Къостайы цардӕй, кастысты йын  йе ‘мдзӕвгӕтӕ францаг  ӕвзагыл.

Хистӕр кълӕсты ахуырдзаутӕ та акодтой «хонгӕ кафт» ӕмӕ гуымсӕгӕй  цалдӕр цагъды.

Мишель радзырдта, Къостайы «Особа»-йӕ йӕ зӕрдӕмӕ тынгдӕр цы цаутӕ фӕцыди,  уыдоны тыххӕй  йӕ хъуыдытӕ загъта, кавказиртасӕг-иранист Жорж Дюмезиль ирон адӕмӕн цы хӕрзты бацыд, уый тыххӕй дӕр.

Ацы интернаты ирон ӕвзаг бӕрзонд ӕмвӕзадыл ӕвӕрд у.  ӕмӕ уый у йӕ ахуыргӕнджыты удуӕлдай куысты ӕвдисӕн. Мадӕлон ӕвзагмӕ рӕзгӕ фӕлтӕры зӕрдӕйы «цырен арт ссудзын» ӕнцон нӕу. Алкӕй зӕрдӕмӕ дӕр хицӕн дӕгъӕл ссарын хъӕуы. Дзӕуджыхъӕуы скъола-интернаты та кусынц, сывӕллӕтты зонындзинӕдтӕ хъӕздыгдӕр кӕныныл чи архайы, канд уыдон нӕ, фӕлӕ ма йӕхиуыл дӕр иудадзыг чи кусы, йӕ зонындзинӕдтӕ   чи фылдӕр кӕны, ахӕм  ахуыргӕнджытӕ.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here