Хъомысджындæр æмархайдæн

0
215

Дзæуджыхъæуы центр «Мæ бизнес»-ы арæзт æмбырды архайджытæ — æнæкоммерцион къабазы, Цæгат Ирыстоны Экономикон рæзты министрады, Адæмæн куыстдæттæг комитеты, Уæрæсейы Банчы цæгатирыстойнаг хайады, центр «Мæ бизнес» æмæ Базарадон-промышленнон палатæйы минæвæрттæ, стæй амалиуæггæнджытæ — æрныхас кодтой æнæкоммерцион кусæндæтты, бизнес æмæ Хицауады æмгуыстадыл.

Æмбырдæн фадæттæ чи сарæзта, æнæкоммерцион кусæндæттæ уыцы автономон æнæкоммерцион кусæндон «Социалон стратегиты» æххуысæй Цæгат Ирыстоны социалон проекттæ æххæст кæнынæн æрæмбырд кодтой 200 милуан сомæй фылдæр.

— Нæ къабазæн ис стыр ахадындзинад. Ныхас æмгуыстады фарстытыл кæм цæуы, ахæм фембæлдтытæ рæстæгæй-рæстæгмæ аразын æмбæлы, — зæгъы проект «Æнæкоммерцион кусæндæттæн æххуысы авналæнты центр»-ы разамонæг Хохойты Этери.

Цæгат Ирыстоны Экономикон рæзты министрады æнæкоммерцион кусæндæттимæ куысты æмæ паддзахадон-хицæн адæймæгты æмгуыстады хайады хицау Хацъæты Наталья радзырдта æнæкоммерцион кусæндæттимæ æмгуыстады хуызты тыххæй хабæрттæ. Ведомствæ нымад у амынд къабазы æххæстбарджын оргæныл. Æнæкоммерцион къабазæн исбонæй, уынаффæтæй æмæ организацион уагæй æххуыс кæнынц.

— Президенты грантты фондмæ цæстдарæг комитет Цæгат Ирыстоны æнæкоммерцион кусæндæттæн æххуысæн 14,05 милуан сомы радих кæныны хъуыддаг банымадта растыл. Регионалон конкурс сараздзыстæм. Конкурс кæд цæудзæн, уый уæлæмхасæн уагæй фехъусын кæндзыстæм, фæлæ ныридæгæн уæ фарстытæн дзуаппытæ дæттынмæ цæттæ стæм. Ахсджиаг фиппаинаг: федералон конкурсмæ æвдыст проект республиконмæ æвдисын не ‘мбæлы, — загъта Хацъæты Наталья.

Бизнес æнæкоммерцион къабазы фæндæттæн æххуыс хъуамæ кæна æви нæ, уый фæдыл рауад быцæуныхас.

— Проектты презентацийы хуыз ивинаг у. Уæвæн ис, æмæ æнæкоммерцион кусæндæтты проектты армукъайæ рауайдзæн куысты мидисджын хуызæг. Ацы армукъайы фæрцы æнæкоммерцион кусæндæттæ сæ хъуыдытæ амалиуæггæнджытæн бавдисиккой, — загъта амынд палатæйы президент Тугъанаты Хъазыбег.

Æмбырды архайджытæ амынд фæндоныл сразы сты. Фембæлды архайджыты хъуыдымæ гæсгæ, æмбырдтæ ахъаз кæнынц куысты фæлтæрддзинадæй кæрæдзийæн фæхай кæнынæн æмæ социалон фарстытæ лыг кæныны фæткыл бакусынæн.


Гуырдзыбеты Зæринæ

 

ОСТАВЬТЕ ОТВЕТ

Please enter your comment!
Please enter your name here