Знон уыд Республикæ Цæгат Ирыстон-Аланийы Муниципалон скондты советы æмбырд. Амыдта йæ Советы сæрдар, Кировы районы сæргълæууæг Нæкуысаты Барис.
Æмбырды архайдтой нæ республикæйы районты æмæ горæт Дзæуджыхъæуы муниципалон скондты разамонджытæ, хъæуты бынæттон хиуынаффæйадты сæргълæуджытæ. Æмбырды куысты архайдта Парламенты Сæрдар Алексей Мачнев. Уый æмбырды архайджытæн арфæ ракодта æмæ загъта:
— Сымахæн уæ архайд комкоммæ баст у цæрджытимæ, сæ тыхстытæ æмæ сæ домæнтимæ æмæ зынгæ бæрæг дары. Уымæ гæсгæ мах дæр нæ закъонæвæрынадон архайды, ног закъонты проекттыл кусгæйæ, æрвылбон æнцой кæнæм уæ хорз фæндæттæ æмæ хъæппæристыл. Ахæм æмархайд хорзæрдæм фæбæрæг вæййы адæмы цардыл. Мæ зæрдæ уын зæгъы, дарддæр дæр ахæм æнтыстджын куыст куыд кæнат æмæ парламентаритимæ ноджы æнгомдæр бастдзинад куыд дарат, уый.
Муниципалон скондты æппæтуæрæсеон конгрессы президент, Паддзахадон Думæйы «Иумæйаг Уæрæсе»-йы фракцийы разамонæджы фыццаг хæдивæг Виктор Кидяев æмбырды архайджытæм цы арфæйы гæххæтт æрбарвыста, уый бакаст Нæкуысаты Барис æмæ дарддæр скодта доклад «2020 азы Республикæ Цæгат Ирыстон-Аланийы Муниципалон скондты советы архайды бæрæггæнæнты тыххæй».
— Ацы аз нæ республикæйы Муниципалон скондты советæн у юбилейон — июлы йыл æххæст кæны 17 азы. Уыцы рæстæджы дæргъы Совет æххæст кодта йæ сæйраг хæстæ: хъахъхъæдта муниципалон скондтæн сæ бартæ, УФ-йы Конституцийы 131 федералон закъонмæ гæсгæ фæтк æвæрдта се ‘мгуыстадæн, — загъта раныхасгæнæг.
Куыд радзырдта, афтæмæй, куыд алкæй, афтæ Советы дæр ивгъуыд аз кусын бахъуыд коронавирусы низы аххосæй сæвзæрæг уавæрты. Афтæмæй, Совет архайдта æхсæнады сæвзæрæг фарстатæ лыг кæныны хъуыддæгты, æппæт æхсæнадон мадзæлтты æмæ æмгуыст кодта паддзахадон хицауады æппæт оргæнтимæ дæр.
Уæлдай раппæлыны аккагыл раныхасгæнæг банымадта Æрыдоны æмæ Горæтгæрон районты муниципалон скондты æнтыстытæ. Уымæй уæлдай, хорз цæвиттонæн æрхаста, сæ архайдæн аргъгæнæг рейтингтæм гæсгæ сæ куыст уæлдай хорзыл нымад кæмæн æрцыд æмæ уымæ гæсгæ æхцайы премитæ чи райста, республикæйы уыцы æртæ муниципалон сконды: Æрæфы район — 10 милуан сомы, Æрыдоны район — 5 милуан сомы æмæ Кировы район — 3 милуан сомы.
«Хуыздæр муниципалон практикæ», зæгъгæ, æппæтуæрæсеон уыцы конкурсы та ивгъуыд аз дыккаг бынат бацахста Кировы районы Комсомольскы хъæуы бынæттон хиуынаффæйад, æмæ йын лæвæрд æрцыд æхцайы преми 15 милуан сомы.
Доклады фæдыл сæ хъуыдытæ æмæ фиппаинæгтæ загътой, стæй, алкæмæндæр дзы йæ районы ивгъуыд азы цы ивддзинæдтæ, цы хорз хъуыддæгтæ арæзт æрцыд, цы лыггæнинаг фарстатæ сæм ис, уый фæдыл ныхас кодтой: Æрыдоны районы сæргълæууæг Тотраты Владислав, Горæтгæрон районы Черменыхъæуы администрацийы сæргълæууæг Æгкацаты Бэлæ, Кировы районы Комсомольскы хъæу «Дашков»-ы территориалон æхсæнадон хиуынаффæйады уæнг, райдайæн кълæсты ахуыргæнæг Бадиаты Льянæ æмæ Мæздæджы районы 9-æм территориалон æхсæнадон хиуынаффæйады сæрдар Галинæ Николаева.
Æмбырды архайджытæ ивддзинæдтæ бахастой Советы правленийы скондмæ: Хидирты Батраз йæ куысты бынат кæй аивта, уымæ гæсгæ йæ бæсты æвзæрст æрцыд Æрæфы районы сæргълæууæг Гъуцъунаты Хъазыбег.
Ивддзинæдтæ хаст æрцыд ревизион æмæ нымайæн къамисты сконды дæр: нымæрдарæй дзы æвзæрст æрцыд Советы æххæстгæнæг директор Дзестелты Барис, къамисы уæнгтæй та — Æрыдоны районы Красногоры хъæуы сæргълæууæг Баситы Владислав æмæ Кировы районы Комсомольскы хъæуы сæргълæууæг Аулохты Валери.
Уымæй уæлдай, æмбырды архайджытæ хорзыл банымадтой ивгъуыд азы дæргъы Муниципалон скондты советы куыст, сфидар кодтой ивгъуыд азæн финансты тыххæй Советы дзуаппон доклад æмæ рахастой хъæугæ уынаффæтæ æмæ хатдзæгтæ.
ДЕДЕГКАТЫ Зæлинæ
Къам систа
ХЪАЙЫРТЫ Дианæ
