Ралӕууыд август. Къӕлиндармӕ гӕсгӕ, ацы мӕй фӕстаг сӕрдыгон мӕйыл кӕд нымад у, уӕддӕр нӕм сӕрд йӕ тӕмӕны кӕй бацыд, уый фидарӕй зӕгъӕн ис.
Арӕх августы республикӕйы хохрӕбын районты уӕлдӕфы температурӕ вӕййы 19-20 градусы, быдырон районты та — 23 градусы хъарм. Ростовы гидрометцентры рагагъоммӕйы бӕрӕггӕнӕнтӕм гӕсгӕ, ацы аз Цӕгат Кавказы федералон зылды уӕлдӕфы температурӕ уыдзӕн нормӕйы бӕрц, науӕд та — иучысыл уӕлдӕр. Ӕхсӕвы уӕлдӕфы рӕстӕмбис температурӕ фӕкъаддӕр уыдзӕн 15-21 градусы онг, бонӕй та температурӕ схӕццӕ уыдзӕн хъармы 22-28 градусмӕ, хицӕн бонты — 30-35 градусмӕ.
Бирӕ азты дӕргъы цӕстдарды бӕрӕггӕнӕнтӕм гӕсгӕ, ӕппӕтӕй уазалдӕр август уыд 1984 азы (уыцы заман уӕлдӕфы рӕстӕмбис температурӕ уыд 17 градусы хъарм), ӕппӕтӕй хъармдӕр август та уыд 2006 азы — 25 градусы. Августы хъарм, сатӕг ӕмӕ уаргӕ бонтӕ кӕрӕдзи арӕх ивдзысты. Августы мӕймӕ республикӕйы хохрӕбынты рауары 81-90 миллиметры, быдырон районты та — 43 миллиметры. Ацы аз рауардзӕн нормӕйы бӕрц науӕд та — иучысыл къаддӕр. Арӕх уыдзӕн тыхуарынтӕ, хицӕн бонты ранӕй-рӕтты уардзӕн их ӕмӕ уыдзӕн уаддымгӕ.
Светланӕ Сухова,
синоптик
