Ацы хатт нӕ рубрикӕйы уӕ размӕ цы къам рахастам, уый нӕм редакцимӕ ӕрбахаста зындгонд прозаик, газет «Рӕстдзинад»-ы иузӕрдион автор ӕмӕ хӕлар Дауыраты Дамир.
Къамимӕ цы ӕрмӕг уыд, уым Дамир бӕлвырд ӕрфыста ацы хуызистимӕ номдзыд иллюзионист Эмиль Киойы цардӕй иу цау. Писмойы загъд ис: «Цирчы аивады номдзыд артист Эмиль Кио 1971 азы бабӕрӕг кодта йӕ мад Косерханы райгуырӕн хъӕу Зилгӕ. Кӕддӕр йӕ цӕрджытӕн дзырд радта, ӕз уӕ хӕрӕфырт кӕй дӕн, уымӕй сӕрыстыр дӕн, ӕмӕ уын мӕ аивадӕй уӕ зӕрдӕтӕ барухс кӕндзынӕн, зӕгъгӕ. Ӕмӕ йӕ ныхасӕн хицау разынд. Мӕнӕ ныр паддзахадон фӕндагӕй Зилгӕмӕ фӕзилгӕйӕ, иу ӕртӕсӕдӕ метры куы бауайай, уӕд цъӕх-цъӕхид къуыбыры фарсмӕ ис рӕсугъд фӕз. Эмиль Кио хъӕумӕ куы ссыд, уӕд ацы фӕзмӕ ӕрбамбырд сты зилгӕйӕгтӕ ӕмӕ ма суанг нӕ республикӕйы районты цӕрджытӕй дӕр бирӕтӕ. Сӕ номдзыд хӕрӕфырты ӕмӕ йе сфӕлдыстадон ӕмцӕдисонты арӕхстдзинадмӕ кӕсынӕй нал ӕфсӕстысты. Ӕппӕты фылдӕр арфӕты аккаг скодтой Киойы. Фӕстӕдӕр та ацы фембӕлды тыххӕй йе ‘нкъарӕнтӕ раргом кодта йӕ интервьюйы нӕ бӕстӕйы центрон газеттӕй иуы уацхӕссӕгӕн, Зилгӕйы мыл куыд циндзастӕй ӕмӕ иттӕг зӕрдиагӕй сӕмбӕлдысты, ахӕм рухс ӕнкъарӕнтӕй дзаг фембӕлд мын дунейы бӕстӕты аивадуарзджытимӕ дӕр никуы уыд. Равдысты фӕстӕ та Кио зилгӕйӕгтимӕ зӕрдылдарынӕн систа йӕ къам. Йӕхӕдӕг дзы лӕууы дыккаг рӕнхъы астӕуӕй (кӕсӕнцӕстджын, бӕрзонд лӕг) йӕ разӕй бадынц Зилгӕйы кадджын хистӕртӕй иу Фидараты Мӕхӕмӕт, (галиуӕрдыгӕй дыккаг, йӕ фарсмӕ бады райкомы секретар Антонинӕ Мельникова, йӕ фарсмӕ хъӕуы колхозы сӕрдар Абӕгаты Сергей.
