Эльбрусы хохмӕ систой сахъат ӕмӕ ӕнӕниздзинады цыбыргонд гӕнӕнтимӕ адӕмы ӕхсӕн профессион дӕсныдзинадӕй 10-ӕм дунеон чемпионат «Абилимпикс»-ы тырыса.
Экспедицийы уӕнгты ӕхсӕн уыдысты национ иугонд командӕ «Абилимпикс»-ы конкурсанткӕ Наталья Егоричева, национ центр «Абилимпикс»-ы техникон директор Максим Журкин, Цӕгат Кавказы аграрон-технологон колледжы директор Моурауты Алан, стӕй Профессион ахуырады рӕзты институты кусджытӕ.
8 августы — ома, Альпинизмы дунеон бон амынд цауы кадӕн Приэльбрусьейы, арӕзт пресс-конференцийы архайдтой Кӕсӕг-Балхъары рухсады министр Анзор Езаов, Цӕгат Ирыстоны ахуырады министры хӕстӕ рӕстӕгмӕ ӕххӕстгӕнӕг Алыбегты Эллӕ, стӕй экспедицийы уӕнгтӕ. Хохдзаутӕн раарфӕ кӕнгӕйӕ, хицауиуӕггӕнӕг адӕймӕгтӕ сӕ республикӕты инклюзивон ахуырады рӕзты тыххӕй хабӕрттӕ радзырдтой. Арфӕгӕнджытӕй иу уыд дунеон федераци «Абилимпикс»-ы вице-президент Ноэль Роже.
Компетенци «массажист»-ӕй национ иугонд командӕ «Абилимпикс»-ы конкурсанткӕ Наталья Егоричева экспедицийы архайды тыххӕй зӕгъы:
— Хохы цъупмӕ схызт мӕ цӕрӕнбонты нӕ ферох уыдзӕн. Ныфсхастдзинад ӕмӕ фӕразондзинад равдисынӕн 5642 метры бӕрзӕндӕн Эльбрусы хохмӕ дунеон чемпионат «Абилимпикс»-ы тырыса систам.
Пресс-конференцийы заман хохдзаутӕн Профессион ахуырады рӕзты институты ӕмӕ национ центр «Абилимпикс»-ы арфӕйы фыстӕджытӕ радтой.
Иннӕ аз Мӕскуыйы чи ацӕудзӕн, инвалидтӕ ӕмӕ ӕнӕниздзинады цыбыргонд гӕнӕнтимӕ адӕмы ӕхсӕн профессион дӕсныдзинады уыцы дунеон чемпионаты архайджытӕ сӕ зонындзинӕдтӕ равдисдзысты IT-технологийы, хойраджы, лӕггадкӕнынады, куыстадон аивады, стӕй куыстадон, сфӕлдыстадон ӕмӕ медицинон дӕсныйӕдты 55 компетенцийы.
Гӕлӕуты Наталья
