Дунеон аэропорт «Дзӕуджыхъӕу»-ы лӕггӕдтӕй 2021 азы июлы чи спайда кодта, уыцы бӕлццӕтты нымӕц, 2019 азы (ома, пандемийы агъоммӕ) уыцы мӕимӕ абаргӕйӕ, сырӕзт 35 проценты бӕрц.
Афтӕ, мӕйы дӕргъы уӕлдӕфон бӕлццӕтты нымӕц 70 минӕй фӕфылдӕр (уыимӕ, 1,5 мин адӕймаджы абалц кодтой фӕсарӕнтӕм).
Азы авд мӕйы бӕрӕггӕнӕнтыл куы дзурӕм, уӕд уыцы ӕмгъуыдмӕ Ирыстоны уӕлдӕфон вагзал балӕггад кодта 390,8 мин адӕймагӕн (2019 азы уыцы ӕмгъуыдимӕ абаргӕйӕ, 26 проценты фылдӕр). Уыимӕ, 2020 азы бӕрӕггӕнӕнтӕй та — 1,5 хатты фылдӕр.
Специалисттӕ куыд зӕгъынц, афтӕмӕй уӕлдӕфон бӕлццӕтты нымӕцы рӕзт фыццагдӕр баст у, Мӕскуы, Бетъырбух ӕмӕ Сочимӕ традицион маршруттыл фылдӕр адӕм кӕй тезгъо кӕны, уыимӕ. Иннӕмӕй та, Дзӕуджыхъӕуӕй Баку ӕмӕ Ереванмӕ ног уӕлдӕфон балцытӕ кӕй байгом сты, уыимӕ.
Аэропорт «Дзӕуджыхъӕу»-ы генералон директор Сергей Чалов куыд радзырдта, афтӕмӕй 2021 азы мартъийӕ фӕстӕмӕ бӕлццӕтты зилдухы бӕрцыл ӕрвылмӕй дӕр ӕфты 12 проценты. Уыцы ӕууӕл фадат радта, цӕмӕй коронавирусы пандемийы агъоммӕ азы куыстадон бӕрӕггӕнӕнтыл зынгӕ бафта.
Уыимӕ, аэропорты кусджытӕ, сӕвзӕргӕ эпидемиологон уавӕр хынцгӕйӕ, сӕ архайд аразынц «Роспотребнадзор» ӕмӕ иннӕ цӕстдарӕг ведомствӕты домӕнты бындурыл. Кӕй зӕгъын ӕй хъӕуы, уӕлӕмхасӕн мадзӕлттӕ арӕзт цӕуы лӕггӕдты хӕрзхъӕддзинад бӕрзонддӕр кӕнынӕн ӕмӕ уӕлдӕфон балцыты графикты хӕлдтытӕ ма ‘руадзынӕн.
Данил Шепелев
