Советон дуджы Цӕгат Ирыстоны кой, куыд промышленнон регионы, афтӕ дардмӕ уыд хъуыстгонд. Промышленносты алы къабӕзты ӕнтыстджынӕй чи куыста, ахӕм заводтӕ нӕм уыд дӕсгӕйттӕ. Уӕдӕй абонмӕ рӕстӕг цӕхгӕр аивта, ӕмӕ раздӕры хъуыстгонд заводтӕй сӕ кой ӕмӕ сӕ хӕлд бӕстыхӕйттӕ йеддӕмӕ ницыуал баззад.
Иу ахӕм завод — «Кристалл» знон бабӕрӕг кодта республикӕйы Сӕргълӕууӕджы хӕстӕ рӕстӕгмӕ ӕххӕстгӕнӕг Сергей Меняйло. Йемӕ уыдысты промышленност ӕмӕ транспорты министры хӕстӕ рӕстӕгмӕ ӕххӕстгӕнӕг Мӕрзойты Владимир, горӕты мэр Милдзыхты Вячеслав ӕмӕ иннӕ бӕрнон адӕймӕгтӕ.
Завод «Кристалл» арӕзт ӕрцыд 1963 азы ӕмӕ уагъта продукци ССР Цӕдисы, стӕй та Уӕрӕсейы Федерацийы хъахъхъӕнынады промышленностӕн. Сӕйраг продукци уыд ӕрхуы, хром, никель ӕмӕ сӕ ӕмтад. Заводы продукцийӕ пайдагонд цыд промышленносты алы къабӕзты: прибортӕ аразыны, атомон промышленносттӕ ӕмӕ ӕндӕрты.
Фӕлӕ цалдӕр азы размӕ завод фӕкъуыввитт, фӕйнӕрдӕм хаст фӕци, ӕмӕ, 16 гектары зӕхх чи ахсы, раздӕры уыцы хъуыстгонд заводы стыр бӕстыхӕйттӕ, цехтӕ, зӕххы хӕйттӕ ныр дзӕгъӕл лӕуд кӕнынц. Республикӕйы экономикӕ размӕ ракӕныны нысанимӕ заводы уыцы уавӕрмӕ ныр каст ӕрцыд республикӕйы разамынды ‘рдыгӕй. Заводы иу кӕцыдӕр хай уал йӕ къӕхтыл слӕууын кӕнын ӕмӕ дзы ногӕй ӕрхуы уадзын райдайынмӕ цӕттӕ чи у, ахӕм инвестор фӕзынд республикӕйы. Йӕ инвестицион проектимӕ уый базонгӕ кодта республикӕйы разамонӕджы. Инвестицион проектӕн разыйы дзуапп лӕвӕрд куы ӕрцӕуа, уӕд, инвесторы ныхасмӕ гӕсгӕ, афӕдзы кӕронмӕ бацӕттӕ кӕндзысты тайӕн цех, ӕрӕвӕрдзысты дзы хъӕугӕ промышленнон техникӕ ӕмӕ 1 февралмӕ нысан кӕнынц ӕрхуыйы фыццаг рауагъд.
Ӕрхуы уадзынӕй уӕлдай заводы бӕстыхӕйттӕй ма ӕндӕр цы хуызы спайдагӕнӕн ис, уыцы фарстӕн дзуапп дӕтгӕйӕ, Мӕрзойты Владимир куыд загъта, афтӕмӕй пълан кӕнынц туаггуыры станцӕ дзы саразын, клинкеримӕ баст куыстад дзы рапарахат кӕнын (ӕрмӕстдӕр, УГМК-имӕ ӕмбӕлгӕ процессуалон ахастдзинӕдтӕ фидаргонд куы ӕрцӕуа, уӕд), стӕй ма дзы рог промышленносты куыстуатӕн бынат бацӕттӕ кӕнын. Ӕппӕт адӕттӕ дзы арӕзт куы ӕрцӕуа, уӕд республикӕйы экономикӕйӕн уый уыдзӕн стыр пайда: иуӕй — адӕмӕн куысты бынӕттӕ, иннӕмӕй — бюджетмӕ ӕфтиӕгтӕ.
Сергей Меняйло инвестортӕн бафӕдзӕхста къуыримӕ бӕстон программӕ бацӕттӕ кӕнын ӕмӕ йӕ бавдисын, куыстыты бӕлвырд ӕмгъуыдтӕ дзы бацамонын, стӕй, республикӕйы разамындӕй цы ӕххуыс бахъӕуа, уымӕй зӕрдӕ бавӕрдта.
ДЕДЕГКАТЫ Зӕлинӕ
Къамтӕ систа ХЪАЙЫРТЫ Дианӕ
