Коронавирусы ӕууӕлтӕм гӕсгӕ сӕвзӕргӕ санитарон-эпидемиологон уавӕр карздӕр кӕй кӕны, уый хынцӕгӕйӕ, РЦИ-Аланийы Сӕргълӕууӕджы хӕстӕ рӕстӕгмӕ ӕххӕстгӕнӕг Сергей Меняйлойы Указӕй уӕлӕмхасӕн гӕрӕнтӕ ӕвӕрд цӕуы дзыллон мадзӕлттӕ (куывдтӕ, чындзӕхсӕвтӕ, зианы кӕндтытӕ ӕмӕ афтӕ дарддӕр) аразыны фӕткы. Уыимӕ, Указӕй бӕлвырд амынддзинӕдтӕ лӕвӕрд ӕрцыд ӕхсӕнадон хӕлцады организациты куысты тыххӕй дӕр. Сӕрмагондӕй документы бӕрӕггонд ӕрцыд, ӕппӕт санитарон-эпидемиологон цӕстдарды домӕнтӕ дӕр ӕнӕмӕнг ӕххӕстгӕнгӕ кӕй сты, уый. Уыдоны нымӕцы — 1,5 метры социалон хииппӕрддзинады фӕтк дӕр.
Зындгонд куыд у, афтӕмӕй республикӕйы Сӕргълӕууӕджы Указӕй 2021 азы 23 июнӕй фӕстӕмӕ сӕ тыхы сты уӕлӕмхасӕн санитарон цӕстдарды ахӕм мадзӕлттӕ:
ӕхсӕнадон хӕлцады организацитӕ хъуамӕ кусой ӕрмӕстдӕр 6 сахатӕй 23 сахаты онг;
рӕстӕгмӕ хъуамӕ урӕд ӕрцӕуа базарадон центры цур кусӕг сывӕллӕтты хъазӕнуӕттӕ ӕмӕ фуд-кортты архайд, ӕхсӕвыгон клубтӕ, дискотекӕтӕ, кафӕн фӕзтӕ ӕмӕ ӕндӕр ахӕм бынӕттӕ дӕр хъуамӕ уой ӕхгӕд;
театртӕ, кинотеатртӕ ӕмӕ концертон залтӕ хъуамӕ кусой ахӕм фӕткмӕ гӕсгӕ: уыцы-иу рӕстӕг залы ӕппӕт бынӕттӕн се ‘мбис хъуамӕ уа уӕгъд;
паддзахадон хицаудзинады ӕмӕ бынӕттон хиуынаффӕйады оргӕнтӕм, медицинон организацитӕ ӕмӕ афтектӕм, базарадон организацитӕм, автовагзалтӕ ӕмӕ станцӕтӕм, стӕй ӕндӕр ӕхсӕнадон бынӕттӕм бацӕугӕйӕ, маскӕтӕ сты ӕнӕмӕнг даргӕ;
ӕппӕт организациты разамонджытӕ дӕр хъуамӕ фадӕттӕ саразой санитарон-эпидемиологон цӕстдарды мадзӕлттӕ ӕнӕкъуыхцыйӕ ӕххӕст кӕнынӕн;
куыстдӕтджытӕн амынд ӕрцыд, цӕмӕй, 65 азӕй уӕлӕмӕ кӕуыл цӕуы, стӕй алыхуызон хроникон низтӕ кӕй тыхсын кӕнынц, уыцы кусджыты раивой дӕрддзӕфмӕ архайды фӕткмӕ, кӕнӕ та сын радтой ӕрвылазон отпуск федералон закъонӕвӕрынады уагӕвӕрды бындурыл;
зианы кӕндтытӕ чи аразы, уыдон хъуамӕ ӕрбацӕуӕг адӕмы ифтонг кӕной маскӕтӕ ӕмӕ дезинфекцион фӕрӕзтӕй, уыимӕ, архайой, цӕмӕй саударӕн ӕмбырды архайджыты нымӕц уа къаддӕр.
Ныр уыцы фӕткмӕ уӕлӕмхасӕн бафтауинӕгтӕ хаст ӕрцыд. Афтӕ, ӕхсӕнадон хӕлцады кусӕндӕтты куывдтӕ, чындзӕхсӕвтӕ ӕмӕ ӕндӕр дзыллон мадзӕлттӕ аразгӕйӕ, залы уыцы-иу рӕстӕг 100 адӕймагӕй фылдӕр хъуамӕ ма уа. Уыимӕ, стъолты ‘хсӕн хъуамӕ ӕппынкъаддӕр уа 1,5 метры бӕрц.
Республикӕйы Сӕргълӕууӕджы Указӕй цӕстдарӕг ведомствӕтӕн амынд ӕрцыд, цӕмӕй санитарон-эпидемиологон цӕстдарды ацы ӕмӕ иннӕ мадзӕлттӕ ӕххӕст кӕныны фӕткмӕ уа бӕстондӕр цӕстдард.
Уый тыххӕй фехъусын кодта РЦИ-Аланийы Сӕргълӕууӕджы ӕмӕ Хицауады пресс-службӕ.
Нӕ уацхӕссӕг
