Владимир Путин ӕмӕ Сергей Меняйло ӕрдзырдтой Цӕгат Ирыстоны социалон-экономикон райрӕзты фарстатыл

0
109

Уӕрӕсейы Президент Владимир Путинӕн знон кусӕг фембӕлд уыд Цӕгат Ирыстоны Сӕргълӕууӕджы хӕстӕ рӕстӕгмӕ ӕххӕстгӕнӕг Сергей Меняйлоимӕ. Ныхасы архайджытӕ ӕрдзырдтой республикӕйы дарддӕры социалон-экономикон райрӕзты фарстатыл.

Фембӕлды райдайӕны Уӕрӕсейы Президент куыд фӕнысан кодта, афтӕмӕй республикӕйы фӕрныгадмӕ фӕндагыл бирӕ ахсджиаг хъуыддӕгтыл бакусын хъӕуы.

— Комкоммӕ зӕгъӕн ис: уавӕры нывылдзинадӕн бирӕ лыггӕнинаг фарстатӕ аиуварс кӕнын хъӕуы. Республикӕйы рӕсугъддзинӕдтӕ дисы ӕфтауынц, йӕ адӕм дӕр зӕрдӕмӕдзӕугӕ сты, дарддӕры размӕцыдӕн дӕр хорз фадӕттӕ ис, — фӕбӕрӕг кодта Владимир Путин.

Сергей Меняйло Президентӕн арфӕ ракодта, республикӕмӕ иудадзыг бӕстон йӕ цӕст кӕй дары, стӕй йын радзырдта, республикӕйы разамынд йӕ ных цы фыццаградон нысантӕм сарӕзта, уый тыххӕй.

Фембӕлды райдайӕны ӕргом аздӕхтӕуыд Беслӕны социалон-экономикон рӕзтмӕ. Ныртӕккӕ горӕты рапарахат социалон инфраструктурӕйы ахсджиаг объектты арӕзтад ӕмӕ цалцӕг. Уыдоны нымӕцы: тагъд медицинон ӕххуысы станцӕ, поликлиникӕ, аивадон ӕмӕ музыкалон скъолатӕ, ӕвзонг техниктӕ ӕмӕ натуралистты станцӕтӕ, стадион «Пищевик» ӕмӕ афтӕ дарддӕр. Сӕрмагонд фӕрӕзтӕ  дихгонд цӕуынц, Беслӕны фыццӕгӕм скъолайы арӕзт террористон фыдракӕнды хъыгдард чи баййӕфта, уыцы адӕмӕн медицинон ӕххуыс ӕмӕ социалон реабилитацийӕн.

Боны фӕткы уыд Беслӕны мемориалон комплексы арӕзтад дӕр. Ӕрӕджы куыд сбӕрӕг, афтӕмӕй Терроризмы профилактикӕйы центры арӕзтады фыццаг къӕпхӕнӕн дихгонд ӕрцӕудзӕн 75 милуан сомы бӕрц.

Уыимӕ, Сергей Меняйло Президенты ӕргом аздӕхта иуӕй-иу лыггӕнинаг фарстатӕм дӕр. Йӕ ныхасмӕ гӕсгӕ, Беслӕны дарддӕры социалон-экономикон райрӕзты программӕйы цы мадзӕлттӕ снысан кодтой, уыдонӕн се ‘ппӕтӕн хъӕугӕ ӕхцайы фӕрӕзтӕ нӕма радих кодтой. Беслӕны фӕндагон-транспортон хызӕджы рацарӕзт, социалон нысаниуӕджы программӕтӕ, теракты бахауӕг адӕмы ахуырад ӕмӕ реабилитаци ӕмӕ иннӕ ахӕм мадзӕлттӕн 2025 азы онг нысангонд цӕуы 800 милуан сомы. Фӕлӕ уыцы бӕрцытӕм иуӕй-иу ивддзинӕдтӕ бахӕссын хъӕудзӕн. Владимир Путин зӕрдӕ бавӕрдта, Беслӕны дарддӕры социалон-экономикон райрӕзты программӕ ӕххӕст кӕнынӕн хъӕугӕ фӕрӕзтӕ фыццаградон фӕткмӕ гӕсгӕ дихгонд кӕй цӕудзысты, уымӕй.

Сергей Меняйло куыд радзырдта, афтӕмӕй республикӕйы экономикон рӕзтӕн ахъаз уыдзысты цымыдисаг туристон проекттӕ дӕр. Йӕ ныхасмӕ гӕсгӕ, ног туристон кластер саразынӕн республикӕйы хорз фадӕттӕ ис. Уыдоны нымӕцы: хӕххон-рекреацион комплекс»Мамысон»-ы арӕзтад, стӕй санаторитӕ ӕмӕ курортты (уымӕн та сӕйрагдӕр рахӕцӕн — хӕдбындур минералон дӕттӕ) райрӕзт. Нысангонд цӕуынц ӕндӕр проекттӕ дӕр.

— Уыцы программӕтӕ царды рауадзынӕн ахъаз уыдзӕн сӕрмагонд федералон проект «Туризм ӕмӕ уазӕгуарзондзинады индустри». Федералон проекты мадзӕлттӕ Цӕгат Ирыстоныл дӕр куы аххӕссой, уӕд инвестортӕ фылдӕр ӕргом аздахдзысты республикӕмӕ. Уӕвгӕ, ныртӕккӕ дӕр нӕ туристон проекттӕм егъау компаниты минӕвӕрттӕ цымыдисдзинад ӕвдисынц. Уыимӕ, федералон проект уӕлӕмхасӕн фадӕттӕ ратдзӕн республикӕйы туристон хъомыс тынгдӕр рагом кӕнынӕн, — бафиппайдта Сергей Меняйло.

Ацы ӕмӕ иннӕ фӕндӕттӕ Президент хорзыл банымадта. Уымӕй уӕлдай, федералон программӕтӕй иумӕ хаст ӕрцӕудзӕн Медицинӕ ӕмӕ реабилитацийы республикон центр дӕр (ацы кусӕндон рагӕй рацаразинаг у).

Федералон центры ӕххуыс бахъӕудзӕн Пульмонологон ӕххуысы республикон центры цалцӕджы хъуыддаджы дӕр. «Фыййагдоны цы медицинон кусӕндон ӕрбынӕттон, уым дзӕбӕх кӕнынц ӕрмӕст Ирыстоны цӕрджыты нӕ, фӕлӕ сыхаг регионты минӕвӕртты дӕр. Уыцы центры хорз фадӕттӕ ис рӕуджыты низтӕ дзӕбӕх кӕнынӕн. Уыимӕ йын хъӕуы йӕ архайд фӕхъомысджындӕр кӕнын. Хорз уаид, ӕнӕниздзинад хъахъхъӕнынады къабазы модернизацийы федералон программӕйы фӕлгӕты ацы центры цалцӕг ӕххӕстгонд куы ‘рцӕуид, уӕд. Уымӕй уӕлдай, центры саразын хъӕуы  уӕлӕмхасӕн бӕстыхай дӕр», — загъта Сергей Меняйло.

Республикӕйы разамонӕг ӕрлӕууыд Цӕгат Ирыстоны хъӕууон хӕдзарады къабазы уавӕрыл дӕр. Йӕ ныхасмӕ гӕсгӕ, агропромышленнон комплексы куыстуӕттӕ фылдӕр кӕнынц продукцийы рауагъд. Фӕфылдӕр хоры, дыргътӕ ӕмӕ халсарты тыллӕг, рӕзты фӕндагыл ис кӕсагдарынады къабаз дӕр…

Сергей Меняйлойы ныхасмӕ гӕсгӕ, агропромышленнон къабазы цымыдисагдӕр проектты дӕр хъӕуы федералон ӕххуыс.

Президент зӕрдӕ бавӕрдта, Цӕгат Ирыстоны хъӕууон хӕдзарады дарддӕры райрӕзты фарстатӕм федералон центры ‘рдыгӕй лӕмбынӕг цӕстдард кӕй уыдзӕн, уымӕй.

Фембӕлды сӕрмагонд ныхас рауад, йӕ рӕстӕджы сӕ архайд цы куыстуӕттӕн ӕрурӕдтой, уыдоны дарддӕры хъысмӕтыл дӕр. Афтӕ, ныртӕккӕ Цӕгат Ирыстоны промышленнон фӕзуӕтты 2 милуан квадратон метры бӕрцӕй ӕппындӕр пайдагонд нӕ цӕуы. Ахӕм куыстуӕттӕй иу — завод «Электроцинк». Ацы куыстуатӕн йӕ фӕзуат у 64 гектары бӕрц, йӕ куыстадон фӕзуӕтты иумӕйаг бӕрц та — 432 мин квадратон метры.

Уыцы къуырцдзӕвӕнӕй рацӕуыны нысанимӕ уӕрӕх ӕмгуыстад цӕуы федералон ведомствӕтимӕ. Цӕттӕгонд цӕуынц уыцы промышленнон фӕзуӕтты индустриалон парктӕ ӕмӕ куыстадон технопарктӕ саразыны программӕтӕ. Уымӕй уӕлдай, республикӕйы куыстуӕтты иу хай суыдзысты паддзахадон корпораци «Ростех»-ы дӕлхайӕдтӕ.  Уыцы ӕууӕл сын ратдзӕн промышленнон куыстад ногӕй рапарахат кӕныны фадат.

— Кӕддӕр Ирыстон зындгонд уыд йӕ 155 егъау куыстуаты продукцийӕ. Уыдонӕй ма ныртӕккӕ баззад 36. Цӕмӕй сӕ нымӕц ногӕй рӕзын райдайа, ууыл иумӕйаг хъарутӕй бакусдзыстӕм «Ростех»-ы разамындимӕ. Ацы хъуыддаджы нӕ бахъӕудзӕн федералон Хицауады ӕххуыс дӕр, — загъта Сергей Меняйло.

Республикӕйы разамонӕджы ныхасмӕ гӕсгӕ, ацы ӕмӕ иннӕ фарстатыл куыст цӕуы Экономикон рӕзты ӕмӕ Промышленност ӕмӕ базарады федералон министрадты минӕвӕрттимӕ.

Цӕгат Ирыстоны Сӕргълӕууӕджы хӕстӕ рӕстӕгмӕ ӕххӕстгӕнӕг Президенты ‘ргом аздӕхта ӕндӕр ахсджиаг фарстатӕм дӕр.

Ныхасӕн хатдзӕгтӕ кӕнгӕйӕ, Владимир Путин куыд фӕбӕрӕг кодта, афтӕмӕй боны фӕткы ӕппӕт фарстаты  фӕдыл дӕр бӕлвырд амынддзинӕдтӕ лӕвӕрд ӕрцӕудзӕн федералон Хицауад ӕмӕ профилон ведомствӕты разамонджытӕн. Уыимӕ, Президент йӕ хъуыдытӕ фӕбӕлвырд кодта, республикӕйы дарддӕры социалон-экономикон райрӕзтыл кусгӕйӕ, фыццаградон ӕргом  цы фарстатӕм аздахын хъӕуы, уый тыххӕй.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here